Pơma tơ̆ năr akŏm, Phŏ Thủ tướng Nguyễn Hòa Bình tơƀôh đon chơt hơiă ƀơ̆t ƀôh dôm jơnei mă plei Ia Nueng hlôi iŏk đei lơ̆m sơnăm âu ki. Phŏ Thủ tướng pôk pơ ư kon pơlei hlôi 1 ƀơ̆r đon, hơdrin iŏk yua khoa hŏk ki thuơ̆t lơ̆m jang sa, hơtŏk ‘lơ̆ng tơdrong hơrih sa, tơgop gĭt kăl lơ̆m pơjing tơring tơrang ‘nao tơ̆ tơring.

Phŏ Thủ tướng Nguyễn Hòa Bình athei khŭl jang chĭnh trĭ păng kon pơlei plei Ia Nueng, xăh Biển Hồ, pơlei tơm Pleiku hơnơ̆ng hơtŏk tơdrong joăt, mĭnh ƀơ̆r đon jang kiơ̆ đei yua dôm tơdrong Tơchơ̆t đơ̆ng Đảng păng dôm hơnăp jang mŭk drăm - tơpôl jăl jang 2020-2025, pơgơ̆r tơdrong jang pơjei băl kơkuh chơt hơiă Hop akŏm MTTQ Việt Nam ‘măng mă X păng tơgŭm bơngai đei tơdrong hơrih sa mơmat tat. Hơdai hăm, hơtŏk loi dơ̆ng chĕp vei tơdrong hơrih sa ‘lơ̆ng hơiă hơdrĕch hơdrŭng; jang kiơ̆ ‘lơ̆ng kon pơlei pơm tơm tơ̆ tơring, hơmet ming ‘lơ̆ng đon lui păng tơdrong drơ̆ng lăp, yak truh dôm ‘măng pôk rơih jăl jang 2025-2027 păng Hop akŏm Đảng rim tơring, tơgop pơjing plei Ia Nueng roi ‘năr roi pơdrŏng ‘lơ̆ng.