Gơmăng hei, (12/11) tơ̆ Hà Nội, hơiă kơ ‘măng tơbăt 94 sơnăm Năr pơjing Mặt trận Tổ quốc Việt Nam (18/11/1930 - 18/11/2024), Tổng Bí thư Tô Lâm truh hăm Năr tơguăt đĭ đăng hơdrĕch hơdrung hăm lơ kon pơlei tơ̆ phường Quán Thánh, kuơ̆n Ba Đình. Tổng Bí thư pơma hơdăh, jơhngâm pran đơ̆ng tơguăt đĭ đăng hơdrĕch hơdrŭng ling lang jĭ 1 lơ̆m dôm jơhngâm pran gĭt kăl hlŏh, pran hlŏh đơ̆ng đĭ đăng Đảng, đĭ đăng kon pơlei, đĭ đăng khul linh bơ̆n yak hlŏh rim tơdrong pơmat tat, pơlong nol, bơ̆ jang đei jơnei tơdrong jang tơplih ‘nao, atŏk tơiung teh đak pơma atŭm păng pơjing anih tơm rơngei hiôk hian, gơ̆h hơgei, ‘lơ̆ng rŏ pơma hơdrô̆.

Pơma hơdăh teh đak bơ̆n đei tôm tơdrong kăl păng oei dơ̆ng tơ̆ hơnăp tơdrong ‘lơ̆ng gĭt kăl vă mât lơ̆m chăl ‘nao, chăl jang tŏk đơ̆ng hơdrĕch hơdrung, mă lei vă jang đei tơdrong ‘nâu, Tổng Bí thư akhan, tơ̆ hơnăp kơnh athei hlôh vao kơjăp đon tơchĕng "iŏk kon pơlei pơm tơm, pơm tơ ‘ngla rim trong jang, tơdrong tơgŭm", "iŏk tơdrong hiôk chơt, phĭ tơtŏ dơnŏ ‘lơ̆ng đơ̆ng kon pơlei vă adrin bơ̆ jang”, akŏm jơhngâm hơmet pơ ‘lơ̆ng dôm tơdrong pơmat tat, “tơhlăk tăk” vă pơih trong, akŏm jơhngâm păng iŏk yoa ‘lơ̆ng rim tơdrong, pơjing đei tơdrong ‘lơ̆ng ‘nao, jơhngâm pran ‘nao vă atŏk tơiung mŭk drăm, tơpôl, pơm hơtŏk tơdrong arih xa găh tơmam drăm păng jơhngâm đon ăn kon pơlei, pơm ‘lơ̆ng ăn rim bơngai đei xa yoa dôm tơdrong jơnei đơ̆ng tơplih ‘nao, jang tŏk, ưh đei hŭt hơchăng bu tơ̆ rŏng.