Kơ iĕng Kơdră chĕp pơgơ̆r Teh đak Võ Thị Ánh Xuân sơkơ̆t hơdăh, Việt Nam ling lang lăng kơjăp atŏk tơ iung tơgoăt tơgoăl lơ tơdrong hăm Thụy Điển, trŏ lăp hăm tơdrong đei, kĕ jang păng ‘meh vă kơ ƀar teh đak. Ƀar păh drơ̆ng mĭnh nơ̆r akhan, ƀar teh đak kăl iung jang ‘lơ̆ng hloh dơ̆ng rim tơdrong đei kơ ƀar păh, atŏk kơtang jang hơdoi jơnei, ‘lơ̆ng, atŭm đei iŏk yua; pơma hơdăh găh tơdrong kăl lơ̆m jang hơdoi ƀar păh ƀar Kuô̆k hô̆i lơ̆m tơgoăt tơgoăl dih băl, drơ̆ng mĭnh nơ̆r atŏk kơtang ăn khul kơdră kơpal kuô̆k hô̆i ƀar teh đak tơƀơ̆p pơma dơnuh dih băl. Chă pơma dơnuh găh tơdrong lơ̆m tơring păng apŭng plĕnh teh mă ƀar păh lăng truh, ƀar păh drơ̆ng mĭnh nơ̆r atŏk kơtang iung jang hơdoi păng tơgŭm djru dih băl tơ̆ rim ‘măng hop akŏm lơ pang vă pơtrŭt kơtang xek tơlang rim tơdrong tơblăh vang, tơgar dih băl hăm trong rơngei hiôk hian ‘moi kiơ̆ yom kiơ̆ Tơdrong tơchơ̆t Liên hợp quốc păng khôi luơ̆t apŭng plenh teh; pơtrŭt kơtang mơdro sa hiôk hian, atŏk tơ iung kơjăp ‘lơ̆ng păng pơdrŏng hơnŭk hơnoa lơ̆m plei teh.