Ƀlep lơ̆m ‘măng iung năm tơmang teh đak Cộng hòa Peru păng vang năm Giĕng lêh Kơdră kơpal Hop akŏm Jang hơdoi mŭk drăm châu Á-Thái Bình Dương (APEC) 2024, pơgê năr 13/11 kiơ̆ jơ Việt Nam, tơ̆ Hơnih tơm Lima, Kơdră chĕp pơgơ̆r Teh đak Lương Cường năm ngôi păng bơ̆ jang hăm Công ty Viettel Peru (Bitel) - hơnih jang hơdoi kơ Grŭp jang Kmăi kmŏk-Viễn thông Ƀô̆ đô̆i (Viettel) tơ̆ Peru.  Iung pơma tơ̆ jơ bơ̆ jang, Kơdră chĕp pơgơ̆r Teh đak Lương Cường pơma hơdăh, hăm tơdrong chĕp pơgơ̆r, pơrô̆ jang đơ̆ng Quân ủy Trung ương, Hơnih tơm Ƀô̆ đô̆i vei lăng sơlam teh đak păng hơnơ̆ng, iŏk chĕp pơgơ̆r kơtă ‘noh Khul kơdră Đảng, Khul kơdră chĕp pơgơ̆r Viettel, kang ƀô̆, bơngai jang Bitel hlôi jang kiơ̆ ‘lơ̆ng jơhngơ̆m đon “Ƀô̆ đô̆i Ƀok Hô", jơhngơ̆m đon hơgei, nuih mơng, tơgoăt tơgoăl, yak hloh tơdrong tơnap tap tơdrong long vă tơchă đei trong jang hơ iă, tơgŭm ăn Bitel roi năr roi sơkơ̆t hơdăh hơnih dơ̆ng kơ dih păng hơnih dơ̆ng lơ̆m bơ̆ jang roi năr roi pơ koĕl kơtang tơ̆ Mi Latinh.. Kơdră chĕp pơgơ̆r Teh đak akhan tơdrong jơnei kơ Bitel tơƀôh hơdăh tơdrong kĕ jang păng jơhngơ̆m đon hơgei Việt Nam kĕ yak mơ̆t lơ̆m apŭng plĕnh teh, pơjei dih băl hơtŏ hơnơ̆ng lơ̆m apŭng plĕnh teh.