Pơma tơbăt tơ̆ ‘măng tơƀơ̆p, tang măt ăn rim grŭp jang, kŏng ty tơm dơnơm kơ Chile jei hôn bơnê kơtang tơdrong atŏk tơ iung mơdro sa kơ Việt Nam; ‘meh vă hơnih mơdro sa ƀar teh đak tơgĕch jang kiơ̆ ‘lơ̆ng rim tơdrong tơchơ̆t mơdro sa mă ƀar teh đak ‘noh jing teh đak vang jang hơdoi. Iung pơma tơ̆ tơƀơ̆p, Kơdră chĕp pơgơ̆r Teh đak Lương Cường pơma hơdăh, khei năr ou ki, mă đơ̆ng tơdrong jang mŭk drăm apŭng plĕnh teh đei lơ tơdrong tơplih, tơnap tap mă lei tơdrong tơgoăt tơgoăl păng jang hơdoi Việt Nam - Chile oei tŏk bŏk atŏk tơ iung ‘lơ̆ng hơ iă. Kơdră chĕp pơgơ̆r teh đak sơkơ̆t hơdăh, Việt Nam ling lang lăng ba, yak hơdoi hăm tơpôl hơnih mơdro sa pơ đĭ lơ̆m teh đak păng teh đak đe, lui yom, vei lăng tơdrong đei iŏk yua trŏ lăp đơ̆ng bơngai tơmơ̆t jên jang, adoi nhen sơđơ̆ng ‘lơ̆ng hơ iă đei iŏk yua ƀar păh Teh đak, bơngai tơmơ̆t jên jang păng kon pơlei; pơkăp pơjing rơvơn ‘lơ̆ng hơ iă mơdro sa păng tơmơ̆t jên jang ăn rim hơnih mơdro sa teh đak đe pơma atŭm păng Chile pơma hơdrô̆.