Tơ̆ jơ tơƀơ̆p, Kơdră chĕp pơgơ̆r Teh đak Lương Cường hôn bơnê kơ tơdrong ƀar teh đak, ƀar đảng tơbăt dih băl trong jang lei lăi găh hơpơi ‘meh vă rơngei hiôk hian, pơm tơm kơdih, hơtŏ hơnơ̆ng, gơ̆h hơgei tơpôl lơ̆m tơgoăt tơgoăl dih băl kơjăp, đei lơ tơdrong kĕ vă pơih să jang hơdoi, tơmơ̆t dơ̆ng păng tơgŭm djru dih băl lơ̆m atŏk tơ iung kơ yuơ đei iŏk yua kơ kon pơlei teh đak kơdih, kơ yuơ rơngei hiôk hian, jang hơdoi, atŏk tơ iung tơ̆ tơring păng lơ̆m apŭng plĕnh teh.

Kơdră chĕp pơgơ̆r Teh đak pơma hơdăh, Việt Nam ‘meh vă jang hơdoi hăm rim teh đak bôl boăl tơring Mi Latinh, mă kăl hăm Chile, teh đak gĭt kăl dơ̆ng hơlou, đei hơnăp jang kăl chông ba vang mơ̆t hơdoi lơ̆m tơring, tơgoăt tơring păng roi năr roi đei hơnăp jang kăl hloh dơ̆ng lơ̆m rim tơdrong lơ̆m plei teh. Kơdră chĕp pơgơ̆r Teh đak ‘meh vă lơ̆m khei năr ou kơnh, ƀar Đảng kăl atŏk kơtang jang hơdoi kơjăp păng tơlĕch jang kiơ̆ jơnei drơ̆ng mĭnh nơ̆r jang hơdoi ƀar păh Đảng,  adoi hơnơ̆ng hơmet pơ ‘lơ̆ng tơdrong lui yom dih băl kơdră kơpal păng trong jang hơdoi chinh trĭ pơm kơnăl păng pơchoh trong atŏk tơ iung tơgoăt tơgoăl jang hơdoi tôm tong ƀar teh đak, mă kăl rim tơdrong mă ƀar păh đei kĕ jang.

Lơ̆m ‘măng năm tơmang, Kơdră chĕp pơgơ̆r Teh đak Lương Cường hlôi năm ngôi ŭnh hnam Nhap ƀok kơdră tơm Chile Salvador Allende, mĭnh ‘nu boăl gĭt kăl kơ Ƀok Hô păng kon pơlei Việt Nam; năm ming gơvang pơkao tơ̆ Hơnih man tơbăt Kơdră chĕp pơgơ̆r Teh đak Hồ Chí Minh tơ̆ Chile.