Hnam trưng Đại học Tây Nguyên dang ei đei hloh 9.500 ‘nu hŏk tro, sinh viên; pơtho 5 tơdrong jang tiến sỹ, 12 tơdrong jang thạc sỹ păng chuyên khoa cấp một, 37 tơdrong jang đại học. Hơdai hăm ‘noh, hnam trưng oei bơ̆jang kiơ̆ tơdrong jang khăm hơmet jĭ păng pơvih ăn kon pơlei tơ̆ Hnam pơgang Đại học Tây Nguyên. 

Pơma tơ̆ lêh pơgơ̆r mơ̆t hŏk blŭng sơnăm hŏk ‘nao, Tiến sỹ Nguyễn Thanh Trúc, Kơdră vei lăng Hnam trưng Đại học Tây Nguyên tơbăt, hnam trưng hơnơ̆ng hơtŏk loi dơ̆ng tơdrong jang vei lăng đại học; hơmet pơ ‘lơ̆ng tôm khŭl jang kiơ̆ tŏ sĕt bơngai, đei yua jơnei; jang pơkeh tơdrong jang tơmơ̆t hơdai hnam trưng Cao đẳng Sư phạm Đắk Lắk lơ̆m Hnam trưng Đại học Tây Nguyên; hơmet ăn dôm tơdrong hiôk vă pơjing hnam trưng đại học tơring hơdrol kơ sơnăm 2030. Hnam trưng kŭm gô bơngơ̆t truh hloh dơ̆ng truh dôm tơdrong jang pơtho găh choh jang sa kơmăy kơmŏk ‘nao, kơmăy kơmŏk sinh học kiơ̆ tơdrong jang đơ̆ng Anih tơm vei lăng găh pơtho pơhrăm găh “Pơjing Hơnih pơtho pơhrăm ‘lơ̆ng tơ̆ pơlei tơm Buôn Ma Thuột păng pơlei tơm Đà Lạt”.