Ƀlep ƀât ‘măng tơbăt Năr khôi luơ̆t Việt Nam 9/11/2024, pơgê 7/11 tơ̆ Hà Nội, Tổng Bí thư Tô Lâm năm ngôi păng pơgơ̆r jơ bơ̆ jang hăm Khul chĕp kơ̆l Đảng kơ Anih tơm jang Tư phap găh tơdrong chĕp kơ̆l pơgơ̆r, bơ̆ jang dôm tơdrong jang đơ̆ng Anih tơm đơ̆ng blŭng jăl jang truh dang ei păng trong jang truh đĭ jăl Hop akŏm mă XIII kơ Đảng. Tơ̆ jơ bơ̆ jang, Tổng Bí thư Tô Lâm tang măt ăn Kơdră chĕp kơ̆l Đảng, Teh đak pơtruh nơ̆r ‘lơ̆ng hơiă hlŏh ăn khul kăn ƀô̆, bơngai jang lơ̆m Anih tơm jang Tư pháp păng Rim anih jang tư pháp lơ̆m teh đak.

Vă teh đak hơđơ̆ng jơhngâm yak tŏk lơ̆m Chăl jang tŏk ‘nao, jăh jang kĕh dôm tơdỏng jang gĭt kăl mă Đảng hlôi tơlĕch, Tổng Bí thư Tô Lâm athei, tơ̆ hơnăp kơnh, Anih tơm jang Tư pháp pơma atŭm păng rim Anih jang tư pháp pơma hơdrô̆, athei tơplih ‘nao mă pran tơdrong chih pơjing luơ̆t kiơ̆ hơnăp jang, tơdrong jang đei pơjao, năm truh đon pơhnŏng đơ̆ng rim kơ luơ̆t ‘nŏh: Vei lăng tơdrong đei yoa trŏ luơ̆t ăn rim bơngai păng khul tơpôl; vei kơjăp păng pơm ‘lơ̆ng ăn tơdrong sơđơ̆ng lơ̆m tơpôl; hơtŏk tơdrong jang tŏk mŭk drăm, tơpôl; pơm hơtŏ ‘lơ̆ng păng lei lăi băl lơ̆m tơpôl; druh kiơ̆ tơdrong jang tŏk đơ̆ng tơpôl; rơđăh rđong păng ƀônh jang kiơ̆; lăp ‘lơ̆ng drơ̆ng nơ̆r kơjăp; vang tơgop pơjing tơpôl rơgei, ‘lơ̆ng hơiă, jang tŏk pran.