Hăm hơnăn “Tưk tơiung tơdrong tơbôl păng mĭnh ƀơ̆r đon yoa mĭnh tơpôl jang tŏk pran păng hơnŭk hơnoa”, Hop akŏm hlôi tơlĕch lơ trong jang tih vă tưk tơiung dôm tơdrong pran ‘lơ̆ng đơ̆ng dôm teh đak vang jang, tơgĕch iŏk tơdrong ‘lơ̆ng đơ̆ng dôm trong jang tŏk ‘nao, jing anih truh tơmât jên jang ‘lơ̆ng hơiă tơ̆ tơring, păng pơjing jơhngâm pran ăn tơdrong jang hơdoi đơ̆ng dôm teh đak Campuchia - Lào - Myanmar - Việt Nam.

Pơma tơ̆ hop akŏm, Thủ tướng Phạm Minh Chính akhan, apŭng plenh teh oei ƀôh tơdrong tơplih jrŭ xă, pơih đei tơdrong ‘klơ̆ng hlŏh ăn 4 teh đak jang tŏk, tơdrong ‘lơ̆ng hlŏh lơ̆m chăl jang hơdoi păng tơplih ‘nao rơgei. ‘Nâu jĭ khei ‘năr măih vă tưk hơtŏk tơdrong jang hơdoi đơ̆ng dôm teh đak lơ̆m tơring.  Thủ tướng teh đak pơma hơdăh, Việt Nam ling lang năng kăl tơdrong jang hơdoi Campuchia – Lào – Myanmar – Việt Nam păng vă hơnơ̆ng tơgop đĭ jơhngâm vă pơm pơ ‘lơ̆ng hlŏh dơ̆ng tơdrong pơvei đơ̆ng sơ̆, teh đak jê̆ băl ‘lơ̆ng hơiă, vang jang đei yoa ngăl, vang jang tŏk lơ̆m chăl jang tŏk iung ‘nao.