Pơm kiơ̆ Tơdrong tơchơ̆t jang kơ tôm jăl jang, Hop akŏm ‘măng mă10 Ƀan châ̆p hanh Trung ương Đảng jăl 13 pơgơ̆r đơ̆ng năr 18/9 truh năr 20/9/2024 tơ̆ Anih tơm Hà Nội.

Hop akŏm ‘măng mă 10 Ƀan châ̆p hanh Trung ương Đảng jăl 13 hlôi pơma đam, tơgop nơ̆r gah dôm tơdrong: Hop akŏm Tơbang chĭnh trĭ kơ Ƀan châ̆p hanh Trung ương Đảng jăl 13; Chih akŏm Tơbang Sơkơ̆t minh ƀar tơdrong gah tơplih jang ‘nao kiơ̆ pơkăp xah hô̆i chuh nghĩa lơ̆m 40 sơnăm tơ̆ Việt Nam; Hop akŏm Tơbang tơdrong chih akŏm đơ̆ng Ƀan châ̆p hanh Trung ương Đảng jăl 13 gah sơkơ̆t tơdrong pơ-‘lơ̆ng Đảng păng Tơchơ̆t đơ̆ng Đảng; Chih akŏm tơbang gah sơkơ̆t 5 sơnăm pơm kiơ̆ Tơchơ̆t hơtŏk mŭk drăm – tơpôl 10 sơnăm 2021 - 2030; tơlĕch sơnong jang hơtŏk mŭk drăm – tơpôl 5 sơnăm 2026 - 2030; Chih tơbang sơkơ̆t pơm kiơ̆ Tơchơ̆t pôk rơih lơ̆m Đảng tơbang atŭm hăm Tơchơ̆t kơsô̆ 244-QĐ/TW, năr 09/6/2014 đơ̆ng Ƀan châ̆p hanh Trung ương Đảng jăl 11 păng chih akŏm tơplih, hơmet Tơchơ̆t pôk rơih lơ̆m Đảng; chih akŏm Tơchơ̆t gah asong bơngai jang lơ̆m Ƀan châ̆p hanh Trung ương Đảng jăl 13 păng Tơdrong asong bơngai jang kơ Ƀan châ̆p hanh Trung ương Đảng jăl 14; tơroi gah pơkăp bơngai jang kơpal ăn Anih tơm Chĭnh trĭ, Ƀan ƀĭ thư jăl 14, jăl jang 2026 - 2031; chih hơmet pơkăp bơngai jang lơ̆m Ƀan châ̆p hanh Trung ương Đảng jăl 14, jăl jang 2026 - 2031; Tơroi gah tơdrong pơm kiơ̆ Tơchơ̆t hơtŏk mŭk drăm – tơpôl sơnăm 2024, tơlĕch Tơchơ̆t vă hơtŏk mŭk drăm – tơpôl sơnăm 2025; Chih akŏm sơkơ̆t hơdah gah tơdrong pơkăp jên mong kơ teh đak ah sơnăm 2024, sơkơ̆t jên mong kơ teh đak ah sơnăm 2025; Tơchơ̆t jên hu – jên mong kơ teh đak lơ̆m 3 sơnăm đơ̆ng 2025 -2027; tơchơ̆t asong jang Ming man jăl trong gre treng đơ̆ng Tu – Pơbah; tơchơ̆t pơlei Huế lơ̆m Trung ương vei lăng; pôk hơmet bơngai jang kơ Anih jang Hơlen Trung ương jăl 13 păng minh ƀar tơdrong kăp gĭt nai.

Ƀok Tổng Bí thư, Kơdră teh đak bơ̆n Tô Lâm pơgơ̆r hop akŏm păng đei ƀai đŏk kăp gĭt ah jơ pơtơm păng pơtôch Hop akŏm.