Nơ̆r tơbăt đơ̆ng Hơnih tơm jang tơbôl Việt Nam tơbăt, iŏk đơ̆ng năr 21 truh năr 27/9/2024, Tổng Bí thư Ban Chấp hành Trung ương Đảng Cộng sản Việt Nam, Kơdră chĕp pơgơ̆r Teh đak Tô Lâm hăm Hơkăn ƀok atŭm hăm khul Kơdră kơpal Việt Nam gô vang năm Hop akŏm joăt joe hơnô̆ hơnăp kơnh, Jơnŭm chĕp pơgơ̆r Liên hợp quốc jăl 79, bơ̆ jang tơ̆ teh đak Mi. Kiơ̆ đơ̆ng rŏng ‘noh, Tổng Bí thư, Kơdră chĕp pơgơ̆r Teh đak Tô Lâm năm tơmang teh đak Cuba kiơ̆ nơ̆r krao hơvơn đơ̆ng Bí thư Ban Chấp hành Trung ương Đảng Cộng sản Cuba, Kơdră chĕp pơgơ̆r teh đak Cộng hòa Cuba Miguel Diaz Canel Bermudez. Kiơ̆ đơ̆ng bơngai pơma tơlĕch nơ̆r ăn Hơnih tơm jang tơbôl Việt Nam Phạm Thu Hằng,  tơchĕng hơlou, Tổng Bí thư, Kơdră chĕp pơgơ̆r Teh đak Tô Lâm gô iung pơma tơ̆ Hop akŏm joăt joe hơnô̆ hơnăp kơnh, tơ̆ Jơnŭm chĕp pơgơ̆r Liên hợp quốc jăl 79 păng đei rim ‘măng tơƀơ̆p dih băl ƀar păh găh ‘ngoăih hop akom lơ̆m ‘măng bơ̆ jang tơ̆ New York, Mi.