Kiơ̆ tơdrong dăr hơlen đơ̆ng Anih vei lăng choh jang xa păng atŏk tơiung tơring tơrang dêh char Đắk Lắk, tơ̆ dêh char đei dang 100 anih hơmơt đei teh hơlih hăm lơ tơdrong krê pha ra băl. Tơdra adrol lơ̆m dôm năr truh, yoa ƀơm đơ̆ng ‘mi kial kơsô̆ 4, tơ̆ Đắk Lắk hơnơ̆ng đei ‘mi păh lăp păng ‘mih tih.

Akŏm đĭ đăng đak ‘mi jur pơtŏ đei đơ̆ng 20-40 mm, đei tơring hlŏh 40 mm, tôch hơmơt đei đak tơjroh tơ̆ đak krong, thong đak iĕ; teh hơlih tơ̆ kông krang đei teh ưh kơjăp păng tơring tơter đak krong tơ̆ dôm apŭng: Ea Súp, Ea H’leo, Krông Búk, Cư M’gar, Cư Kuin, Buôn Đôn. Ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk ăn tơbăt, Anih vei lăng kon pơlei dêh char đei hla ar pơtho ăn dôm tơring hơlen năng mă ‘lơ̆ng tŏ ‘mi kial vă đei trong tơjră tơtom.