Ƀât blŭng khei 9, tơ̆ anih tĕch tơmam đe ƀok Nguyễn Quốc Lập tơter Trong gre dêh char kơsô̆ 1, thôn 5, xăh Ea Wer, apŭng Buôn Đôn, dêh char Đắk Lắk công an xăh hơlen năng kiơ̆ khei dôm tơmam vă tang găn, pĭt unh xa. Ƀok Lập tơroi, đơ̆ng rŏng iŏk đei nơ̆r roi tơƀôh, hlŏh 1 sơnăm adrol ki đĭ mât jang lơ̆m “Kueng kon pơlei tang găn, pĭt unh xa” hloi bơih. Anih tĕch tơmam đei răt hơmet tôm tơmam vă tang găn, pĭt unh xa đei: Kơƀinh pĭt unh, mut. Hơdrô̆ kơmăy tĭt re roi tơbăt unh xa đei chô̆ tŏk bŏk dôm hnam.

Ƀok Lập roi tơbăt găh trong bơ̆ jang đơ̆ng Khul tang găn unh xa lơ̆m kueng thoi âu: “Lơ̆m kueng âu đei 10 unh hnam, đei chô̆ kơmăy roi tơbăt unh xa ngăl, păng chô̆ tơtrơp tơ̆ băl. Mưh đei unh xa ‘nŏh tĭt kơmăy roi tơbăt, đĭ đăng 10 unh hnam gô băt ngăl, đang kơ ‘nŏh hơlen năng unh xa ƀât yơ, rim bơngai năm truh tơ̆ noh vang pĭt unh.” 

Kueng kon pơlei tang găn, pĭt unh xa đei pơjing tơ̆ xăh Ea Wer đei dôm unh hnam pơdro tơmam, phŏng, pơgang sơdrông, anih hơmet gre… tơtil băl. ‘Nhŏng Trần Văn Nam, bơngai jang lơ̆m Kueng, đei anih hơmet gre tơroi, rim unh hnam vang jang kiơ̆ ngăl. Tơdrong ‘nâu vă akŏm rim bơngai vang jang păng đei năng nhen “dôm tơpang ti vang tơgŭm” ăn khul linh tang găn, pĭt unh xa păng dŏng tơgŭm bơngai răm.

Kiơ̆ ‘nhŏng Nam, trong jang âu tơgŭm ăn rim bơngai hlôh vao păng răt hơmet tôm tơmam vă tang găn, pĭt unh xa kơtă ƀât anih đei unh xa blŭng a hloi: “Nhôn đei pơtho tơƀôh tôm găh trong tang găn, pĭt unh xa păng dŏng tơgŭm bơngai răm. ‘Ngoăih kơ ‘nŏh, oei chô̆ kơmăy roi tơbăt unh xa, răt kơƀinh pĭt unh, mong đak, chuơh vă pĭt unh... hăm dôm tơmam ƀônh đei unh xa ‘nŏh ming hơdrô̆, mưh lĕch tơ̆ ‘ngoăih dăh mă tang ‘măng ưh đei bơ̆ jang ‘nŏh athei pĭt pơđĭ kâu yao unh điên vă vei lăng, tang găn ‘lơ̆ng unh xa”.

Đơ̆ng dôm trong jang pơlong năng đei pơjing tơ̆ apŭng Buôn Đôn păng dôm apŭng, thĭ xăh, plt truh dang ei dêh char Đắk Lắk pơjing đei 303 “Kueng kon pơlei tang găn, pĭt unh xa”, 71 “Anih pĭt unh xa lơ̆m tơpôl”, păng 17 “Trong jang đĭ đăng kon pơlei tang găn, pĭt unh xa tơ̆ dôm anih jang, khŭl grŭp păng tơring kon pơlei oei xa”.

Trung tá Phùng Việt Đức – Phŏ Kơdră Anih Kanh sat tang găn, pĭt unh xa păng dơ̆ng tơgŭm bơngai răm Công an dêh char Đắk Lắk ăn tơbăt, kiơ̆ đơ̆ng dôm trong jang, khul jang kơpal hơnơ̆ng pơgơ̆r pơtâp pơhrăm lơ trong tang găn, pĭt unh xa hơmơt đei tơ̆ yăn âu vă rim bơngai vang jang băt. Đơ̆ng noh dôm bơngai vang jang đei pơtâp pơhrăm hơnơ̆ng, hơtŏk đon kơchăng tang găn, pĭt unh mưh đei unh xa đôh.

Trung tá Phùng Việt Đức ăn tơbăt: “Tơ̆ hơnăp kơnh, nhôn hơpơi ‘mĕh, kon pơlei hơnơ̆ng tơgŭm, vang pơjing dơ̆ng lơ trong jang “Kueng kon pơlei tang găn, pĭt unh xa”. Trong jang đơ̆ng nhôn ‘nŏh jĭ tang găn, pĭt unh xa jĭ tơdrong jang đơ̆ng đĭ đăng kon pơlei, khul linh, akŏm tôm tơmam pơyoa vă tang găn pĭt unh đei kơtă lơ̆m kon pơlei. Pơm thoi yơ mưh đei unh xa, rim bơngai jĭ linh tang găn, pĭt unh xa ngăl, vă găn ưh ăn unh xa lang xă, unh xa tih, găn ƀiơ̆ hiong răm găh bơngai păng tơmam drăm.”

Tơdrong pơih xă dôm trong jang “Kueng kon pơlei tang găn, pĭt unh xa” păng “Anih pĭt unh xa lơ̆m tơpôl” tơ̆ dêh char Đắk Lắk ‘nŏh jĭ tơdrong tôch gĭt kăl, vang tơgop, tưk tơiung tơdrong jang đĭ đăng kon pơlei vang tang găn, pĭt unh xa kiơ̆ nơ̆r pơtho đơ̆ng Anih tơm vei lăng Công an, mă loi ‘nŏh ƀât mă tơdrong unh xa, đôh đei roi krê hơmơt, ưh gơ̆h băt hơdrol. Đơ̆ng noh pơm tơjur ƀiơ̆ hiong răm găh bơngai păng tơmam drăm yoa đơ̆ng unh xa./.