Ƀok Tổng Bí thư, Kơdră teh đak bơ̆n Tô Lâm chơt hơ-iă hăm dôm tơdrong hơtŏk ‘lơ̆ng rŏ lơ̆m jang tơbôl kơ 2 teh đak; sơkơ̆t Việt Nam drơ̆ng minh lăng tơgĭt lơ̆m tơdrong jang tơbôl tơguăt tơguăl mă kăl noh đơ̆ng 2 đảng, 2 jơnŭm pơgơ̆r păng kon pơlei 2 teh đak. Ƀok Tổng Bí thư, Kơdră teh đak bơ̆n Tô Lâm bơnê kơ nơ̆r hơvơn năm tơmang truh teh đak Cuba đơ̆ng ƀok Ƀĭ thư mă mônh, Kơdră teh đak noh ƀok Miguel Diaz-Canel, tơbang tơdrong hơpơi ‘meh ‘măng năm tơmang gô kơhret tơdrong lui ngeh, tơguăt kơjăp hloh đơ̆ng ƀar hơdrung hơdrĕch; hơtŏk đei jơnei dôm tơdrong jang hadoi, hơtŏk tơdrong jang tơbôl Việt Nam - Cuba tŏk minh jăl jang ‘nao, hơtŏk tơ-iung tơpă păng kơjăp sơđơ̆ng.

Kơdră jang tang măt Orlando Nicolas Hernandez Guillen sô̆ hơ-iă đei tơƀơ̆p ƀok Tổng Bí thư, kơdră teh đak bơ̆n Tô Lâm hơdrol kơ ‘măng năm tơmang đei tơdrong pơkăp kơ 2 teh đak; sơkơ̆t hơdah Đảng, Jơnŭm pơgơ̆r teh đak păng kon pơlei Cuba hơnơ̆ng tơgŭm păng bơnê kơ dôm tơdrong jang đei jơnei lơ̆m jê̆ 40 sơnăm jang tơplih ‘nao hăm tơdrong pơgơ̆r đơ̆ng Đảng Cộng sản Việt Nam chĕp kơ̆l noh ƀok Tổng Bí thư, kơdră teh đak ƀok Tô Lâm.