Ƀok Trương Văn Quốc (56 sơnăm), oei tơ̆ xăh Ea K’tur, dêh char Đắk Lắk, ‘nao răt gre ô tô 5 anih ngôi so. Đơ̆ng rŏng kơ pơm đang hla ar tơm tơ̆ Lăm Kanh sat vei lăng trong nơnăm, ƀok hao gre vih păng năm tơ̆ Công an xăh Ea K’tur vă pơm hơmet dơ̆ng hla ar. Mă đơ̆ng đĭ kră bơih păng ưh kơ băt yoa kơmăy kơmŏk ‘nao dơ̆ng mă lei ƀok Quốc đei kăn ƀô̆ công an roi tơƀôh tôch hơlen. Gơnơm thoi noh, tơdrong pơm hla ar gre tôch hrĕnh.

Ƀok Trương Văn Quốc pơma: “Inh đei kăn ƀô̆ công an tơ̆ anih pơm hla ar roi tơƀôh pơm lơ̆m kơmăy phần mềm, chih tơroi thuê̆ păng hơlen năng kơsô̆ không gre, kơsô̆ kơmăy. Dang ei, inh đĭ nôp thuê̆, tĭt iŏk kơƀang sô̆ gre păng đe pơkă 2 – 3 năr dơ̆ng. Pơma atŭm khul công an xăh pơtho tơƀôh tôch hơlen ăn kon pơlei, trong pơm hla ar roi hrĕnh păng hiôk hian.”

‘Nhŏng Nguyễn Minh Tuấn, bơngai jang tơ̆ 1 Anih tĕch gre ô tô tơ̆ Đắk Lắk tơroi, 1 khei anih sư tĕch đei dang 40–50 tŏ gre ‘nao. Adrol ki, pơm hla ar, iŏk kơƀang sô̆ gre athei nôp tôm hla ar chih tơ̆ công an dêh char mă ưh ‘nŏh apŭng, hiong lơ jơnăr. Đơ̆ng khei 3 truh dang ei, trong pơm hla ar âu đei hơmet roi ƀônh gơnơm pơm hăm điên tư, tơmât hơdai đơ̆ng công an xăh hăm dôm anih tĕch mơdro. Tơdrong pơm hla ar gre hrei ‘nâu lăp hiong 2,3 jơ đĕch, bơngai răt iŏk đei kơƀang sô̆ gre đơ̆ng 2–3 năr đơ̆ng rŏng, tơplih ăn tơdrong athei gô kơtĕch giĕng, tơlŭt băl tơ̆ anih pơm hla ar nhen adrol ki.

“Dang ei ưh pă kơtĭt lơ liơ̆ kơsô̆ không, kơsô̆ kơmăy nhen adrol sơ̆ bơih, yoa hnam kơmăy đe chih hơmet kơphĭu kơsô̆ không gre, kơsô̆ kơmăy lơ̆m hla ar gre hloi bơih. Bơngai răt lăp roi tơbăt hơnăn, rim tơdrong ƀơm truh kơdih lơ̆m hla ar kăn kươk, app chih măt mư̆k 2, lê̆ nhôn nôp thuê̆ adrol kơ pơm hla ar păng đe sư gô iŏk đei tin nhắn lơ̆m điên thoăi kơdih. Đang kơ ‘nŏh nôp jên măt mă ưh ‘nŏh gơih kiơ̆ tai khoan kŭm bưh, ƀlă đơ̆ng noh kơtĭt iŏk kơƀang sô̆ kơtă lơ̆m điên thoăi đei phần mềm hloi. Tơdrong kơtĭt iŏk kơƀang sô̆, nôp thuê̆, lăp hiong đơ̆ng 2 – 3 jơ đĕch, đang kơ ‘nŏh pơm hla ar đang hloi bơih. Kon pơlei chih măt ‘nŏh bưu điên gô gơih kơƀang sô̆ gre truh tơ̆ hnam hloi”.

Thượng úy Nguyễn Tất Diệu, kăn ƀô̆ vei lăng tơdrong pơm hla ar gre kơ Công an xăh Ea K’tur tơroi, 1 khei anih iŏk pơm dang 200 blăh hô sơ ăn gre hon đa păng 60 blăh hô sơ ô tô, gre kôch teh, gre chưk... Đơ̆ng rŏng kơ hŭt lê̆ công an apŭng (đơ̆ng ‘năr 1/3), đĭ đăng hla ar pơm ‘nao, tơplih ming hơnăn tơ ‘ngla gre…đei pơm hăm kơmăy phần mềm păng điên thoăi rơgei ngăl. Đơ̆ng ‘năr 1/7 âu ki, anih jang hơtŏk thim kăn ƀô̆ kơna tơdrong iŏk pơm hla ar gre kŭm roi hiôk hian ƀiơ̆.

Thượng úy Diệu akhan, mưh kon pơlei roi juăt hăm trong pơm hla ar trư̆k tuyê̆n, pơm roi gơh, ‘nŏh tơdrong pơm hla gre roi hrĕnh ƀiơ̆ ‘năi: "Gre ‘nao dang ei đei pơm hla ar trư̆k tuyê̆n ngăl. Mưh răt gre tơ̆ Anih đe tĕch, kon pơlei nôp thuê̆ online lơ̆m điên thoăi; anih công an iŏk pơm hla ar păng pơm đang gơih hơlơ̆k dơ̆ng. Kon pơlei lăp ngôi gô păng răp iŏk hla ar gre kơtă tơ̆ hnam hloi. Hăm gre so, gre tơplih ming tơ ‘ngla plơ̆ng, tĕch mơdro dăh mă pơm hơmet ming, kon pơlei athei chĕp ba hô sơ păng gre năm truh vă nhôn hơlen năng tơ̆ yăn âu. Tơdăh gre ưh đei phă ngơ̆r kơsô̆ không, kơsô̆ kơmăy, kơmâu sơng ưh đei tơplih pơting hăm hla ar so ki ‘nŏh gô đei iŏk pơm hla ar nhen thoi gre ‘nao.”

Đơ̆ng rŏng 1 puăt khei tơmât hơdai dêh char, Đắk Lắk hơnơ̆ng đei dơ̆ng bơngai răt gre hăm kơhrĕng tŏ gre ôtô păng gre hon đa đei pơm hla ar ‘nao. Mă đơ̆ng gre oei pơm hla ar roi tŏk, khul bơngai jang tam mă tôm, mă lei hăm đon jang tơnăp păng adrin pơvih pơvăn, Công an dêh char Đắk Lắk oei pơgơ̆r pơm hla ar gre tôch hrĕnh, hiôk hian. Dôm tơdrong ‘nao lơ̆m tơdrong jang tơplih hăm kơmăy sô̆ ưh lăp tơjur ƀiơ̆ jơnăr, jên yak vih vât đĕch, mă oei tơƀôh hơdăh đon jang tơnăp “yoa kon pơlei mă pơvih pơvăn”./.