Pơma dơnuh hăm rim bơngai tang măt, Tổng Bí thư Tô Lâm sơkơ̆t hơdah, truh dang ei mă lơ̆m chăl rơngei hiôk hian, rim bơngai tang măt hlôi pơdơh kơ jang, mă lei adoi oei pơtoi vei sơđơ̆ng đon bơnôh “ƀô đô̆i Ƀok Hô”, adoi oei pơkăp “iung tơblah khŏm jơnei” jing anih gơnơm kơjăp ăn đe kôn mon kon sou.

Tổng Bí thư Tô Lâm lui ngeh, hăm đon tơchĕng, sơnong jang tơnăp, đon bơnôh gơh hơgei păng kiơ̆ kơ tơdrong kĕ đei kơ rim bơngai, khul tang măt pơtoi đei dôm tơgop hăm tơdrong jang kăch mang nuih mơng kơ Đảng, kơ kon pơlei; atŭm băl hơtŏk, iŏk yua jơhngơ̆m pran tôm kon pơlei vă hơ-'nhăk teh đak bơ̆n roi năr roi hơtŏk pran, pơdrŏng jơnap, kiơ̆ tom dôm teh đak pran lơ̆m tơring teh nhen tơdrong hơpơi 'meh đơ̆ng Ƀok Hô 'mêm kơ-eng.