Hơdah, đei 67 hŏk tro jăl mâm non, 155 hŏk tro jăl kơđeh, 101 hŏk tro THCS păng 25 hŏk tro THPT chih măt tơplih mơ̆t hŏk tơ̆ dôm hnam trưng lơ̆m tơring phương Quy Nhơn păng dôm phương tơjê̆. Dôm hô sơ adoi đei sơng iŏk hơlen lăng păng đei jơnŭm juăt jang hop akŏm, drơ̆ng nơ̆r ăn tơplih hnam trưng hŏk.

Pơtrŏ hăm tơdrong đei ƀôh, Anih jang Pơtho Pơhrăm dêh char Gia Lai hlôi jang atŭm hăm Anih jang vei lăng kon pơlei rim phương hơlen tôm hnam trưng, đei hloi tơmam pơtho pơhrăm, kơsô̆ hŏk tro păng bơngai pơtho. Ƀok Phạm Văn Nam, Kơdră Anih jang Pơtho Pơhrăm dêh char Gia Lai ăn tơbăt, tơdrong sơng iŏk hŏk tro tơplih hnam trưng hŏk athei jang tenh, vei sơđơ̆ng ăn hŏk tro gơh đei hnam trưng hŏk sơđơ̆ng hơdrol kơ sơnăm hŏk 'nao.