Mĭnh puăt sơnăm ‘nâu, akŏm kơsô̆ tơmam tơring (GRDP) dêh char Đắk Lắk tŏk hloh 7%. Akŏm thu mong jên jang teh đak lơ̆m tơring đei hloh 8.700 ti hlak jên, tŏk 1/3 pơting hăm khei ‘nâu sơnăm sơ̆. Kiơ̆ kơ ƀok Tạ Anh Tuấn, Kơdră Anih vei lăng kon pơlei dêh char Đắk Lắk, tơ̆ hơnăp kơnh ‘noh jĭ jăl jang “tŏk hrĕnh, pran” vă dêh char iŏk đei tơdrong hơgăt jang tŏk  8% pơđĭ sơnăm 2025. Kơdră Anih vei lăng kon pơlei dêh char athei: Thu mong jên jang sơnăm ‘nâu athei tŏk tŏ sĕt hloh 20% pơting hăm jô̆ tơchĕng hơdrol, ‘mơ ‘met jên pơ hoach hơnơ̆ng. Tŭn hrĕnh tơlĕch jên tơmơ̆t jang teh đak, mă loi ‘noh jĭ dôm tơdrong jang tơm, anih jang kăl, anih jang tơ̆ xăh - phường đơ̆ng rŏng kơ tơmơ̆t hơdai.

Akŏm hơmet pơtôch dôm tơdrong jang hiơ̆ hyĭn, tơplih ‘lơ̆ng đei yua tơmơ̆t jên jang. Hơtŏk tơiung hrơ̆ch tơring đak dơsĭ- bri, hăm dôm tơdrong jang vei lăng bri, hơtŏk tơiung rong ka hơdang, tơplih ‘lơ̆ng tơdrong jang sa kơjăp ăn kon pơlei oei tơ ter đak dơsĭ păng tơring groi kông; tŭn hrĕnh tơdrong jang sut hnam pơgia, hiah hiok, jang đang hơdrol kơ ‘năr 30/8/2025.