Hop akŏm đei măt đơ̆ng 146 ‘nu bơngai tang măt, dơ̆ng tang ăn hlŏh 7.000 ‘nu đảng viên. Hop akŏm hlôi drơ̆ng nơ̆r ăn tơdrong Tơchơ̆t đơ̆ng Khul kơdră chĕp kơ̆l Đảng dêh char găh tơdrong rơih bơngai jang lơ̆m Khul kơdră chĕp kơ̆l Đảng ƀô̆ phường Buôn Ma Thuột jăl jang 2025-2030 đei 28 ‘nu bơngai. Ƀok Từ Thái Giang, Kơdră jang lơ̆m Khul kơdră chĕp kơ̆l Đảng dêh char đei pơjao pơm Bí thư Đảng phường.

Truh akŏm păng đei nơ̆r pơtho lơ̆m hop akŏm, ƀok Nguyễn Đình Trung, Bí thư Đảng dêh char Đắk Lắk lui, hăm trong vă jang tôch hơdăh păng đon adrin tôch pơneh, Đảng ƀô̆ păng kon pơlei phường Buôn Ma Thuột vă hơnơ̆ng yak kiơ̆ trong jang tŏk, tơgăl hăm anih dơ̆ng jĭ phường tơm, vang tơgop gĭt kăl ăn tơdrong jang tŏk pran kơ dêh char Đắk Lắk lơ̆m jăl jang đơ̆ng 2025-2030 păng dôm sơnăm đơ̆ng rŏng dơ̆ng.