Đơ̆ng đei pơhrăm iŏk yua kơmăy kơmŏk, ƀok Phùng Ngọc Quát, bơngai vei lăng kueng 6, thôn Cao Thành, xăh Ea Kao, pơlei tơm Buôn Ma Thuột, dêh char Đắk Lắk, ưh pă athei năm jơ̆ng hoh tơ̆ rim hnam vă roi tơbăt. Grŭp Zalo kơ kueng sư đei pơm hlôi tơgŭm sư roi tơbăt rim tơdrong vă rim bơngai vang băt, bơ̆ jang kiơ̆ păng tơroi nơ̆r tơgop: “Dôm app VNelD dăh mă dôm grŭp Zalo tơ̆ lơ̆m kueng nhôn tôch kơ hiôk ăn kon pơlei dôm tơdrong roi tơbăt tơ̆ xăh, tơ̆ kueng gơih ăn kơ kueng nhôn gơh tơroi kơtă kiơ̆ app vă ƀônh kơ hlôh hloh, dăh mă đei tơdrong jang hôp kiơ kơ kueng kơ tơring kŭm hrĕnh hloh, dă ƀiơ̆ athei năm roi tơbăt ăn rim bơngai, rim hnam”.

Kơmăy kơmŏk kơsô̆ hơtŏk tơdrong hiôk, ƀônh, ‘mơ ‘met jơ năr ăn pơđĭ kon pơlei, anih mơdro sa păng dôm anih jang vei lăng teh đak, tơgop hơtŏk ‘lơ̆ng đei yua tơdrong jang.... Mă lei tơ̆ Đắk Lắk hăm ưh kơ tŏ sĕt bơngai, iŏk yua đơ̆ng kơmăy âu lơ̆m pơm dôm tơdrong pơvih pơvăn teh đak, ‘noh tam mă iŏk đei nhen ‘meh vă.

Yă Đào Thị Mai tơ̆ phường Tân Lợi, pơlei tơm Buôn Ma Thuột, dêh char Đắk Lắk tơroi: “Ĭnh tam mă gơh yua kơmăy kơsô̆ pơm bơ̆n hla ar găh teh kơna ĭnh kŭm ‘meh vă anih jang teh đak păng păih kơmăy kơmŏk tơgŭm ĭnh găh tơdrong ‘noh nhen tơroi tơbăt jơ̆p jang ăn kon pơlei yua kơmăy kơsô̆ lơ̆m pơm hla ar vă dă ƀiơ̆ kơ hiong jơ năr, kon pơlei dă ƀiơ̆ kơ năm vih vơ̆t”.

Vă pơm kơđeh tơdrong hơtăih găh tơdrong gơh iŏk yua kơmăy kơsô̆ đơ̆ng rim kon pơlei, dêh char Đắk Lắk hlôi pơjing hloh 2.000 grŭp jang kơmăy kơsô̆ tơpôl hăm vă jê̆ 12.000 bơngai jang lơ̆m khŭl. Găh lơ lơ̆m kơsô̆ đe sư ‘noh dôm bơngai mơlôh, pơnam, hơnhăk kơmăy kơmŏk truh rim ŭnh hnam kon pơlei.

‘Nhŏng Nguyễn Văn Mạnh, bơngai jang lơ̆m grŭp kơmăy kơsô̆ tơpôl xăh Ea Ninh, apŭng Cư Kuin, roi tơbăt: “Hăm tơdrong jang pơjing tơpôl kơsô̆, nhôn oei tơlĕch jang tơdrong jang roi tơbăt tơƀôh hơiă hăm tơdrong jang lôp gre roi tơbăt, tŭn pran tơdrong jang kla jên điện tử kŭm nhen dôm nơ̆r tơroi găh vang tơgŭm tơplih kơsô̆, tơdrong jang kla jên điện tử đei yua hloi kŭm hăm 1,2 tơdrong nhôn tŏk bŏk tơlĕch jang hơnhăk ăn đei yua ‘lơ̆ng”.

Yak hơdai hăm kon pơlei oei đei dôm anih mơdro sa viễn thông. Ƀok Nguyễn Văn Thản, Phŏ Kơdră vei lăng VNPT Đắk Lắk roi tơbăt, kŭm hăm dôm anih mơdro sa lơ̆m tơdrong jang, VNPT Đắk Lắk hlôi jang đang tơƀĕnh hơyuh 4G lơ̆m dêh char, trong tơley cáp quang kŭm hlôi đei tơlĕch jang truh tơ̆ rim ŭnh hnam. Hơdai hăm ‘noh, anih jang kŭm hlôi vang pơtho ăn kang ƀô̆ tơ̆ apŭng păng dôm grŭp jang kơmăy kơsô̆ tơpôl vă kơ đe băt hơdăh dôm kơmăy kơsô̆, pơyua ăn roi tơbăt păng pơtho kon pơlei. “Hrei ‘nâu, VNPT hlôi vang pơtho ăn jang ƀô̆ tơ̆ apŭng, kang ƀô̆ grŭp jang kơmăy kơsô̆ tơpôl vă băt hơdăh dôm kơmăy kơsô̆ pơyua ăn tơdrong jang roi tơbăt truh kon pơlei păng pơtho kon pơlei iŏk yua. Lơ̆m tơdrong jang pơvih pơvăn ăn teh đak, nhôn tŏk bŏk vei sơđơ̆ng tơdrong jang hơdai đơ̆ng dôm anih jang nhen thuê̆, dôm anih jang kŏng chư̆ng lơ̆m tơdrong jang teh vă pơm tơdrong hiôk ăn kon pơlei lơ̆m pơm bơ̆n hla ar 1 trong hiôk tơ̆ hơnăp kơnh”.

Đắk Lắk tơlĕch tơdrong hơgăt truh hơtuch sơnăm 2025, đei 80% kang ƀô̆, bơngai jang teh đak gơh yua kơmăy kơsô̆ kloh klĕch; 70% kon pơlei ‘lŏ đei pơtho roi tơbăt tơdrong hlôh vao kơsô̆; 80% ‘nu bơngai jang lơ̆m dôm anih mơdro sa, hơp tak xăh gơh yua kơmăy hơgei pơyua ăn pơm tơlĕch. Ƀok Ra Lan Trương Thanh Hà, Phŏ Kơdră vei lăng Anih jang Khoa hŏk păng Kơmăy kơmŏk dêh char Đắk Lắk roi tơbăt, vă pơtrŭt tơplih, hơdai hăm tơgŭm hơdrol tơmơ̆t jên jang lơ̆m tơdrong jang viễn thông, mạng 4G/5G tơ̆ dôm tơring thŭng, dêh char gô akŏm hơtŏk ‘lơ̆ng tơdrong gơh băt đơ̆ng kang ƀô̆ tơring, tŭn pran tơdrong jang roi tơbăt, hơtŏk loi dơ̆ng pơtho kơmăy kơsô̆ truh rim kon pơlei. “Tơ̆ hơnăp kơnh, nhôn gô hơnơ̆ng vang jang tơgŭm ăn dêh char dôm trong jang vă tơlĕch jang đei yua tơdrong jang đơ̆ng rim grŭp jang kơmăy kơsô̆ tơpôl, dôm bơngai jang tơgŭm ăn khŭl kơdră păng anih jang, tơgŭm kon pơlei gơh băt păng vang jang lơ̆m tơdrong jang tơplih kơsô̆”.

Gơnang đơ̆ng dôm hơyak năm hơdrin, tơnăp, kơmăy kơsô̆ tŏk bŏk tơpă jing 1 păh kơ tơdrong hơrih sa kon pơlei, đơ̆ng pơlei pơla tơring hơtăih hơtŏ truh anih kơdrơ̆m. Păng đơ̆ng rŏng rim năr, tơ̆ Đắk Lắk ‘noh đei dơ̆ng lơ bơngai jing kon pơlei kơsô̆, pơm đei jing 1 pôl kơsô̆ tôm, ‘mêm mơnat păng đei yua. ‘Nâu jĭ tơdrong ‘lơ̆ng gĭt kăl vă dêh char jing khŭl kơdră chĕp kơ̆l kơsô̆, tơpôl kơsô̆, mŭk drăm kơsô̆.