Lơ̆m dôm năr âu ki, dôm anih jang kơpal kơ dêh char oei tơlĕch trong hơmet pơ ‘lơ̆ng teh hlŭn, hơđăh tôch hơmơt ƀât taluy trong Hồ Chí Minh tơ̆ Km1936+ 080 păng Km1936+300 găh thôn 3, xăh Quảng Tín, apŭng Đắk R’lấp. 2 anih âu đei teh hlŭn, hơđăh păih taluy thong păng anih oei chưk hơmet, rŏ năng gô ƀơm ưh ‘lơ̆ng truh tơ̆ trong gre, tôch krê hơmơt.

Tơ̆ 2 anih âu, anih vei lăng trong gre Hồ Chí Minh oei pơm hơmet trong hơđăh tơ̆ jih hơbong đak lŏk ro vă găn ưh ăn ƀơm kơnê̆ truh tơ̆ trong gre. Atŭm hăm ‘nŏh, jang hơdoi hăm khul kơdră tơring, tơlĕch trong choh kôch hŭt teh, chưk hơmet mă ‘lơ̆ng vă huei pơm hơlih taluy trong, hơtâp kơƀang roi tơbăt, chô̆ tơlei văr anih hlŭn, hơđăh.