‘Năr 26/12, Anih chĕp kơ̆l Đảng dêh char Gia Lai pơgơ̆r hop akŏm pơtôch 7 sơnăm bơ̆jang Tơdrong tơchơ̆t kơsô̆ 18 đơ̆ng Khul kơdră chĕp kơ̆l Trung ương Đảng jăl XII găh hơmet ming anih jang chinh trĭ, tŏ sĕt bơngai, bơ̆ jang rơgei, đei yoa. Kiơ̆ trong vă jang truh âu kơnh, Gia Lai hơnơ̆ng hơmet ming anih jang vei lăng, rŏ năng vă kăt tơjur 7 anih jang kơpal, 31 lăm bơ̆ jang vei lăng.

Dêh char Gia Lai vă tơmât hơdai dôm anih jang kơpal đei: Ban Tuyên giáo păng Anih krao hơvơn kon pơlei dêh char; Anih tơlĕch nơ̆r sơkơ̆t, tơmât jên jang hăm Anih vei lăng jên hu; Anih vei lăng choh jang xa păng atŏk tơiung tơring tơrang hăm Anih vei lăng tơmam drăm cham char; Anih vei lăng ming man hăm Anih vei lăng trong nơnăm, chơ chuĕn; Anih jang Khoa hŏk, kơmăy kơmŏk hăm Anih tơroi tơbăt; Anih jang Nội vụ hăm Anih vei lăng bơngai jang xa, linh jĭ rơka păng tơpôl. Hơdai hăm ‘nŏh, Anih vei lăng jang pơgang vă iŏk jang dơ̆ng tơdrong jang vei lăng jơhngâm pran kăn ƀô̆ đơ̆ng Anih vei lăng, năng tông jơhngâm pran kăn ƀô̆ dêh char. Anih vei lăng pơtho pơhrăm dêh char iŏk jang dơ̆ng tơdrong vei lăng pơtho tơdrong jang đơ̆ng Anih vei lăng bơngai jang xa, linh jĭ rơka păng tơpôl. Atŭm hăm ‘nŏh, dêh char vă pơjing Anih vei lăng hơdrĕch kon kông – Tơdrong lui khop kiơ̆ đơ̆ng tơmât hơdai Anih vei lăng hơdrĕch kon kông hăm Anih vei lăng tơdrong lui khop.