Anih vei lăng kon pơlei dêh char Kon Tum athei dôm anih jang, tơring tơrang jăh tơlĕch trong Hơmet ming anih jang, kăt tơjur anih jang kiơ̆ trong tŏ sĕt bơngai, đei yoa ‘lơ̆ng. Mă hơdăh, dêh char Kon Tum vei kơjăp 5 anih jang kơpal ‘nŏh: Anih jang Tư phap dêh char; Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng; Anih dăr hơlen kơ dêh char; Anih pơvih ăn Anih vei lăng kon pơlei dêh char păng Anih jang tơbôl kơ dêh char. Hăm dôm anih âu vă bơ̆jang hơmet ming kăt tơjur bơngai jang tơ̆ rim anih jur tŏ sĕt hlŏh ‘nŏh 15%.

Kon Tum oei vă tơmât hơdai Anih tơlĕch nơ̆r sơkơ̆t tơmât jên jang hăm Anih vei lăng jên hu dêh char jing anih jang Mŭk drăm – jên hu; tơmât hơdai Anih vei lăng trong nơnăm, chơ chuĕn păng ming man, rŏ năng gô iŏk hơnăn Anih vei lăng ming man păng trong nơnăm; tơmât hơdai Anih vei lăng tơmam drăm, cham char hăm Anih vei lăng choh jang xa păng atŏk tơiung tơring tơrang jing Anih vei lăng choh jang xa păng cham char; tơmât hơdai Anih vei lăng tơdrong tơroi tơbăt hăm Anih jang Khoa hŏk păng kơmăy kơmŏk jing anih jang đei hơnăn krao ‘nao ‘nŏh Anih vei lăng jang Khoa hŏk, kơmăy kơmŏk păng roi tơbăt; tơmât hơdai Anih jang Nội vụ hăm Anih vei lăng bơngai jang xa, linh jĭ rơka păng tơpôl, vă iŏk hơnăn krao ‘nao ‘nŏh Anih jang Nội vụ păng tơdrong jang. Atŭm hăm ‘nŏh, dôm anih jang kơpal âu athei kăt tơjur tŏ sĕt hlŏh ‘nŏh 30% bơngai jang đơ̆ng rŏng kơ tơmât hơdai.