Lơ̆m jơ ‘năr hơheo tơngiĕt kơ khei hơtuch sơnăm, Trung tá Lâm Mạnh Tuyển, kang ƀô̆ Kơđông Ƀô̆ đô̆i vei lăng sơlam teh đak Ia Chiă (Ia Grai, dêh char Gia Lai) năm ngôi hăm yă Puih Yơng, vă jê̆ 80 sơnăm hơrih sa hơdrô̆ hơdrăn oei lơ̆m pơlei Beng, tơring Ia Chía. Lơ sơnăm ou kơ yuơ jơhngơ̆m pă gan pran jăng, yă Yơng ưh kơ gơ̆h chă yơ yak ou to păng jei lơ sơnăm ou ki, Trung tá Tuyển atŭm hăm rim bơngai lơ̆m khul năm ngôi, khăm jĭ jăn ăn kơ yă. Mưh sơng iŏk pơgang đơ̆ng tơpang ti rim ƀô̆ đô̆i, yă Puih Yơng chhưu lơ̆m jơhngơ̆m pơma:“Ba tôch bơnê kơ rim đe mih ma ƀô̆ đô̆i vei lăng sơlam teh đak truh năm ngôi, tơgŭm djru, khăm ming hơmet jĭ jăn ăn kơ ĭnh hơnơ̆ng lơ lou. Ba ji ŭnh hnam mơmat tat, hơrih sa hơdrô̆ hơdrăn, kơ yuơ klo hăm kon hơ ‘lơ̆p lôch đĭ đăng bơih, đei ‘măng chă jĭ jăn ưh kơ đei kon jên vă chă năm khăm, ming hơmet, năr ou đe mih ma truh năm khăm păng ƀơk ăn pơgang vă ming hơmet jĭ ăn bơngai kră krŭt nhen ĭnh lơ lou.”

Jei jĭ bơngai kră tơƀơ̆p lơ tơdrong ưh kơ hiôk lơ̆m jơhngơ̆m jăn, ƀok Ksor Bơng, 74 sơnăm oei tơ̆ pơlei Bi, tơring Ia O tơbăt, Khul ƀok thây pơgang ƀô̆ đô̆i găh Kơđông ƀô̆ đô̆i vei lăng sơlam Teh đak Ia O, ling lang jĭ dôm bơngai mă kon pơlei hơvơ̆h hơvơi hơpơi tơƀơp mă blŭng. Gơnơm tơdrong tơgŭm djru phăl hơlăng đơ̆ng rim ƀok thây pơgang ƀô̆ đô̆i vei lăng sơlam teh đak, kon pơlei dang ei pă gan tơtăm tơdrong jĭ jăn ưh kơ kĕ klăih dăh mă kơdou năm ming hơmet jĭ jăn tơ̆ hơtăih, tơhoach lơ bơih:“Tơgŭm ăn kon pơlei ưh kơbăt dôm yơ hloi văi, kơđông ƀô̆ đô̆i pơjing mĭnh hnam pơgang lơ̆m pơlei hloi, mưh chă jĭ jăn kon pơlei năm truh chă ming hơmet, dôm pơgang ming hơmet ou to jĭ kơ yuơ kơđông chă tơgŭm ăn ngăl. Mưh chă jĭ ăn, chep pơlŏ, jĭ klak ‘noh kon pơlei năm tơ̆ ou chă apĭnh, đe mih ma ƀơk ăn đĕch. Tơdăh jĭ dêh hnang ‘noh chơ choen năm tơ̆ hnam pơgang kơpal.”

Lơ sơnăm ou ki, khul Ƀok thây Pơgang ƀô̆ đô̆i găh Kơđông ƀô̆ đô̆i vei lăng sơlam teh đak iung jang ting ring tơdrong jang vei lăng năng tông jơhngơ̆m jăn ăn ƀô đô̆i, khăm ming hơmet jĭ jăn đĕch ăn kon pơlei oei lơ̆m tơring sơlam teh đak păng kon pơlei teh đak boăl Campuchia hai. ‘Ngoăih chă khăm, ming hơmet jĭ jăn, rim ƀok thây pơgang oei pơtho tơbăt ăn kon pơlei trong tang găn hơlou, tơjră tang găn hăm rim tơdrong jĭ ngăl tơƀơ̆p; pơm kiơ̆ oei sa rơgoh ‘lơ̆ng, khoa hŏk, sŏng sa pai sĭn, nhă đak rơ̆, tep dăng kơmŭng ... Kiơ̆ đơ̆ng noh tơgŭm ăn atŭm hăm tơdrong jang pơgang tơring pơm hơtŏk jơhngơ̆m đon hlôh vao kơ kon pơlei găh bơ̆ jang pơgang, tang găn jĭ jăn, vei lăng rơgoh cham char păng đei ming hơmet jĭ jăn ‘lơ̆ng hơ iă. Trung tá Trần Anh Tuấn- Ƀok thây pơgang ƀô̆ đô̆i găh Kơđông Ƀô̆ đô̆i vei lăng sơlam Teh đak Ia O, apŭng Ia Grai, dêh char Gia Lai tơbăt:“Tơdrong jang chă khăm kơ khul ƀok thây pơgang ƀô̆ đô̆i ‘noh khăm ăn đĕch, rim khei jei năm truh tơ̆ hơnih chă ƀơk ăn pơgang păng khăm ming hơmet jĭ jăn ăn kon pơlei, đơ̆ng noh pơjing đei jơhngơ̆m đon tơgoăt tơgoăl dih băl kơjăp ƀar păh kơđông ƀô̆ đô̆i vei lăng sơlam teh đak hăm kon pơlei, pơjing đei jơhngơ̆m đon lui yom păng ‘mêm kơ eng hloh đơ̆ng kon pơlei hăm ƀô̆ đô̆i vei lăng sơlam teh đak. Bơ̆n jei iung jang hơdoi hăm hnam pơgang tơring dăh mă Kŏng ty 74, Kŏng ty 75 iung jang chă khăm, ƀơk pơgang ăn kon pơlei ‘noh nhôn jei vang iung jang vă chă khăm ming hơmet jĭ jăn ăn kon pơlei mơ̆n”

Đơ̆ng sơnăm 2023 truh dang ei, atum hăm khăm ming hơmet jĭ jăn tơ̆ hơnih jang, Khul ƀok thây pơgang Ƀô̆ đô̆i vei lăng lam teh đak tơ̆ Gia Lai hlôi pơgơ̆r lơ ‘măng jur năm tơ̆ pơlei pơla chă khăm jĭ, ƀơk pơgang ăn vă jê̆ 2.000 ‘nu bơngai păng pôk ăn dang 600 triu hlak jên ăn ŭnh hnam tơnap tap oei tơ̆ tơring sơlam teh đak. Ƀok Ksor Tuông, Kơ iĕng Kơdră chĕp pơgơ̆r Hơnih vei lăng kon pơlei tơring Ia O, apŭng Ia Grai tơbăt, dôm tơdrong jang kơ ƀok thây pơgang ƀô̆ đô̆i hlôi tơgop gĭt kăl pơm hơtŏk jơhngơ̆m đon hlôh vao găh vei lăng năng tông rơgoh cham char, tang găn kĕ rim tơdrong jĭ jăn ou to.“Khul ƀok thây pơgang ƀô̆ đô̆i găh Kơđông ƀô̆ đô̆i vei lăng sơlam teh đak iung jang tôch tơnăp lơ̆m chă pơtho khan, pơtho tơbăt ăn kon pơlei vei lăng năng tông rơgoh ‘lơ̆ng cham char. Yak truh hăm rim ŭnh hnam kon pơlei chă tŏk ngôi, khăm jĭ jăn ăn bơngai kră, đe hơ ioh. Hlŏh đơ̆ng chă hơlen đei ƀôh, tơdrong kơdih vei lăng năng tông jơhngơ̆m jăn pran jăng grăng akou păng vei lăng cham char kon pơlei iung jang kiơ̆ tôch kơ ‘lơ̆ng, găh măt bơngai chă jĭ pơlŏ tŏ hơdrap tơjur tôch kơ lơ, rim tơdrong jĭ ou to kĕ tang găn ưh kơ lê̆ đei tơdrong jĭ hơbuh lơ̆m tơring. ‘Noh jĭ mĭnh păh gơnơm đơ̆ng tơdrong tơgŭm djru vei lăng năng tông jơhngơ̆m jăn pran jăng grăng akou đơ̆ng kon pơlei, đơ̆ng rim kang ƀô̆. Ƀô̆ đô̆i lơ̆m tơring”

Dôm tơdrong jang gĭt kăl, tơpă đơ̆ng khul ƀok thây pơgang ƀô̆ đô̆i vei lăng sơlam teh đak dêh char Gia Lai hlôi atŭm hăm kơdră chĕp pơgơ̆r đảng, kơdră chĕp pơgơ̆r tơring, hnam pơgang tơring bơ̆ jang ‘lơ̆ng vei lăng năng tông jơhngơ̆m pran jăng grăng akou ăn kon pơlei. Tơgop hơmet pơ ‘lơ̆ng jơhngơm đon tơgoăt tơgoăl pôm nơ̆r ƀơ̆r đon ƀô̆ đô̆i-kon pơlei tơ̆ tơring sơlam teh đak, vei lăng năng tông kơjăp iăp kơtang tơring sơlam teh đak kơ Teh đak.