Tơ̆ jơ tơƀơ̆p, rim bơngai tang măt hlôi atŭm lăng phim tơbang gah jăl trong 80 sơnăm tơ-iung pơjing, tơjră kơnê̆, vơ̆ pran đơ̆ng Khul linh Kon pơlei Việt Nam păng khul linh dêh char Đăk Lăk adoi nhen Kuân khu 5. Yă H’Yim K’Đok, Phŏ Kơdră Anih jang vei lăng kon pơlei dêh char Đăk Lăk pơtruh nơ̆r thơ thâu hăm jơhngơ̆m jăn, pơtruh nơ̆r hmach bơnê kăp gĭt hăm dôm tơdrong tơgop tih tên đơ̆ng đe ƀok hlôi tơgop ăn tơdrong tơblah, tơ-iung pơjing păng vei lăng teh đak.

Phŏ Kơdră Anih jang vei lăng kon pơlei dêh char Đăk Lăk tơroi gah jang hơtŏk mŭk drăm – tơpôl kơ dêh char Đăk Lăk ah sơnăm 2024. Yă H’Yim K’Đok hơpơi 'meh, đe kang ƀô̆ kơpal kơ khul linh hlôi pơdơh đĭ jăl sơnăm pơm jang, pơtoi tơgop kơ̆l 'ngok hơgei, pơtho tơdrong hlôh vao vă pơjing kơjăp tơdrong akŏm tôm kon pơlei vei lăng teh đak, vei sơđơ̆ng anih dơ̆ng lơ̆m tơpôl kon pơlei păng khul linh dêh char roi năr roi pran kơtang hloh.