Kơdră Quốc hội Trần Thanh Mẫn hmach chơt hơiă kơ Bơngai tang măt hlôi jang đang jăl jang tơ̆ Việt Nam; hôn bơnê păng lăng ‘lơ̆ng dôm tơdrong vang tơgop ‘lơ̆ng đơ̆ng Bơngai tang măt lơ̆m jăl jang, tơgop hơnhăk tơdrong pơvei Jang hơdai gĭt kăl tôm tơdrong Việt - Australia hơtŏk tơiung roi ‘năr roi jrŭ să.

Kơdră Quốc hội pơma hơdăh, Việt Nam ling lang lăng kăl pơtrŭt tơdrong pơvei tơbôl păng jang hơdai gĭt kăl tôm tơdrong Việt – Australia jing 1 lơ̆m dôm teh đak jang hơdai tih hloh lơ̆m tơdrong pơvei jang tơbôl. Kơdră Quốc hội ‘meh vă Bơngai tang măt gô hơnơ̆ng đei dôm tơdrong tơgop ăn tơdrong pơvei 2 teh đak, hơtŏk loi dơ̆ng lơ̆m dôm tơdrong jang mŭk drăm, joh ayŏ, pơtho pơhrăm; ŭnh hơyuh; Bơngai tang măt gô đei lơ ƀai chih hloh dơ̆ng găh teh đak păng kon bơngai Việt Nam vă kơ dôm kon pơlei Austrailia hlôh hloh găh Việt Nam.