Kơ iĕng Thủ tướng Teh đak Bùi Thanh Sơn hôn bơnê kơtang 7 tơdrong jơnei kơ Hơnih vei lăng Mơdro sa, tơgop gĭt kăl lơ̆m tơdrong iŏk đei jơnei atŭm lơ̆m teh đak jang keh đang păng hloh trong tơlĕch ăn đĭ đăng 15 trong tơlĕch ăn, lơ̆m ou, tŏk GDP lơ̆m sơnăm 2024 iŏk đei hloh 7%. Mă kăl ‘noh tơdrong jang kmăi kmŏk pơm tơlĕch tơmam drăm tŏk kơtang păng tŏk tơ̆ rim tơring tơrang. Tĕch răt hăm teh đak đe iŏk đei truh 800 ti USD, găh tĕch tơ̆ teh đak đe iŏk đei dang 403 ti USD. Mă kăl ‘noh tĕch mơdro tơ̆ teh đak đe tŏk kơtang, hăm tơdrong hơmet pơ ‘lơ̆ng hơ iă kơ rim tơmam drăm tơm, mư̆h tŏk 13,6% pơtêng hăm sơnăm 2023. Yak mơ̆t lơ̆m sơnăm 2025, kiơ̆ đơ̆ng Kơ iĕng Thủ tướng Bùi Thanh Sơn, tơdrong mă blŭng ‘noh kăl pơjing đei khôi luơ̆t hơdăh ‘lơ̆ng hơ iă, tơpăt păng ưh kơ đei tơdrong găn ga lơ̆m tơdrong bơ̆ jang ăn atŏk tơ iung pơm tơlĕch tơmam drăm, tĕch mơdro tơmam drăm.