Iung pơma tơ̆ ‘Măng hop akŏm ‘măng mă 44 kơ Hơnih chĕp pơgơ̆r Kuô̆k hô̆i, pơgơ̆r lơ̆m pơgê năr 14/4, Kơdră chĕp pơgơ̆r Kuô̆k hô̆i tơbăt, gô ăn tơgop nơ̆r, lăng hơlen, tơchơ̆t 42 tơdrong; hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013; lăng hơlen rim tơdrong găh hơnih ou gơ̆h jang vă tĕnh koăng hơmet pơ ‘lơ̆ng tơnap tap, tơhlăk tơhlĭn ăn rim Hơnih mơdro sa. Mă kăl, Hơnih chĕp pơgơ̆r Kuô̆k hô̆i gô ăn tơgop nơ̆r găh hla bơar athei: hơmet ming, tơmơ̆t dơ̆ng mĭnh ƀar apăng kơ Khôi luơ̆t tơm Teh đak sơnăm 2013; pơjing Hơnih pơm tơlĕch hơmet ming, tơmơ̆t dơ̆ng mĭnh ƀar apăng Khôi luơ̆t tơm Teh đak sơnăm 2013; iŏk nơ̆r tơgop đơ̆ng Kon pơlei găh trong vă pơjing hơmet ming, tơmơ̆t dơ̆ng mĭnh ƀar Khôi luơ̆t Tơm teh đak sơnăm 2013 lơ̆m 1 khei. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, tơdrong hơmet ming Khôi luơ̆t tơm Teh đak ‘noh tơdrong jang tôch gĭt kăl hăm tơdrong jang lơ, tih tên, đei ƀơm truh hơnăp jang kơ lơ hơnih bơ̆ jang, tơklep hăm trong tơlĕch jang pơm kơ toei, hơmet ming khul bơ̆ jang kơ khul chinh trĭ, kiơ̆ Nơ̆r pơma pơtôch kơsô̆ 126, 127 đơ̆ng Hơnih tơm Chinh trĭ păng Hơnih chĕp pơgơ̆r Trung ương. Lơ̆m khei năr pơgơ̆r ‘Măng hop akŏm, Hơnih chĕp pơgơ̆r Kuô̆k hô̆i kăl jang keh đang tơdrong lăng hơlen, pơdrơ̆ng kiơ̆ rim tơdrong tơchơ̆t hơmet ming dơ̆ng hơnih bơ̆ jang tơring; adoi, ăn tơgop nơ̆r vă pơtruh ăn Kuô̆k hô̆i pơdrơ̆ng kiơ̆ tơdrong Tơchơ̆t hơgrop jing mĭnh kơ dêh char păng pơm pơkeh rim tơdrong kiơ̆ Tơdrong bơ̆ jang Jăl 2 hlôi đei tơlĕch ăn.