Đơ̆ng rŏng mơ̆ng roi tơbăt đơ̆ng Anih tơm vei lăng găh Kơmăy kơmŏk, Mơdro sa, nơ̆r tơgop đơ̆ng bơngai tang măt dôm anih tơm, anih jang, pơma pơtôch, Thủ tướng Phạm Minh Chính akhan truh jơ năr âu, păih Mi hlôi tơlĕch ăn jơ năr pơma đam hơdăh, ăn ƀôh đon ‘lơ ‘lŏ, kiơ̆ nơ̆r pơkăp lơ̆m tơƀơ̆p pơma dơnuh kơdră kơpal păng dôm ‘măng bơ̆jang, tơƀơ̆p đơ̆ng rŏng ‘noh đơ̆ng 2 păh. Thủ tướng athei, lơ̆m kơplăh pơma đam kăl kơ lăng kiơ̆ tơdrong, đei ƀôh hơdăh vă hơmet ming jơnăr mă lăp ăn pơ đĭ 2 păh.

Thủ tướng athei hơmet ăn hơlen dôm tơdrong pơma đam; lăng kiơ̆ ‘meh vă đơ̆ng Việt Nam păng athei đơ̆ng Mi, lăng kiơ̆ pơtôch tơchĕng hơlen, dôm tơdrong kăl hơdăh đơ̆ng Việt Nam păng vei sơđơ̆ng dôm nơ̆r pơkăp apŭng plĕnh teh vă tơlĕch trong jang pơma đam trŏ lăp, tơƀôh jơhngơ̆m đon pơjing, lăp đon păng gĭt kăl ‘noh jĭ tơdrong jang hơdai kơjăp, kiơ̆ lơ̆m jơhngơ̆m đon tơbôl mă lei rơđăh rơđong, tơpăt.