Thủ tướng teh đak bơ̆n Phạm Minh Chính ră hơdah, 'măng năm tơmang kăp gĭt lơ̆m khei năr 2 teh đak tơbăt 75 sơnăm iung jang tơbôl (1950-2025) păng Việt Nam tơbăt 80 sơnăm năr tơ-iung pơjing teh đak. Thủ tướng sơkơ̆t hơdah Việt Nam ưh kơ layơ hiơt tơdrong tơgŭm kăp gĭt mă Hungary hlôi 'măn ăn Việt Nam lơ̆m tơdrong iung tơjră vă iŏk rơngei teh đak hơdrol ki păng khei năr tơ-iung pơjing teh đak hrei ou.

Ƀar pah drơ̆ng nơ̆r pơtoi tơlĕch jang tơnăp dôm tơchơ̆t pơdrơ̆ng kơ 2 teh đak, hơtŏk pran tơdrong jang hơdoi lơ̆m dôm tơdrong jang juăt jue nhen tĕch pơdro – asong jang, khua hŏk-kŏng ngê̆, pơtho hŏk pơhrăm, vei sơđơ̆ng tơpôl, y yuơk, joh ayŏ - tơmang pơhiơ̆ păng hơpeh hơpong kon pơlei, atŭm hăm noh pơih să tơdrong jang hadoi hăm tơdrong jang mă 2 pah pran păng kăl tơgŭm nhen tơplih kơmăi kơsô̆, tơdrong hơgei kơmăi kơmŏk 'nao, choh jang xa, pơm pơgang, asong bơngai jang.