Pơma tơ̆ hop akŏm, Kơdră teh đak Lương Cường pôk pơ ư păng hơiă hăm dôm tơdrong jơnei mă Quân ủy Trung ương, Anih tơm vei lăng khul linh teh đak păng đe kăn ƀô̆, linh, công nhân, bơngai jang lơ̆m khul linh iŏk đei lơ̆m sơnăm 2024. Drơ̆ng nơ̆r hăm dôm trong vă jang, tơdrong jang đei tơlĕch, Kơdră teh đak athei Quân ủy Trung ương, Anih tơm vei lăng khul linh teh đak hơnơ̆ng hlôh vao kơjăp tơdrong jang, bơ̆jang ‘lơ̆ng dôm hơnăp jang roi tơƀôh gĭt kăl hăm Đảng, Teh đak găh khul linh, vei lăng teh đak; kơchăng, hơbĕch hơbal, hơtŏk đon tơchĕng hơlen, tơdra hơdrol, đei trong tơjră gơ̆h hơgei, đei yoa hăm rim tơdrong, ưh gơ̆h lê̆ đei tơdrong ưh ê, vei lăng kơjăp ‘lơ̆ng tơdrong rơngei, hiôk hian vă pơjing, tưk tơiung teh đak.

Kơdră teh đak athei đĭ đăng khul linh hlôh vao kơjăp, bơ̆ jang ‘lơ̆ng trong jang đĭ đăng kon pơlei vang vei lăng teh đak, tơdrong tơblăh đơ̆ng kon pơlei, vei lăng teh đak lơ̆m chăl ‘nao, gơnang đơ̆ng kon pơlei, iŏk "kon pơlei pơm tơm"; Atŭm hăm ‘nŏh bơ̆ jang ‘lơ̆ng trong jang hơdoi khul linh  hăm mŭk drăm, mŭk drăm hăm vei lăng teh đak; tơchĕng hơlen, hơmet ming mă lăp ‘lơ̆ng khul linh lơ̆m chăl ‘nao.