Kơdră teh đak adrol ki, ƀok Trần Đức Lương rơnĕh ‘năr 5 khei 5 sơnăm 1937 tơ̆ xăh Phổ Khánh, apŭng Đức Phổ, dêh char Quảng Ngãi. Ƀok vang jang kăch mang khei 02 sơnăm 1955. Đơ̆ng khei 02/1955 truh khei 9/1955 ƀok năm hŏk pơhrăm tơ̆ tơring Găh Tu, hŏk sơ cấp tơ̆ Anih chă hơlen năng teh. Đơ̆ng rŏng kơ ‘nŏh, ƀok bơ̆ jang tơ̆ Khul chă hơlen năng teh 20 bơ̆ jang lơ tơdrong đơ̆ng bơngai jang ki thuơ̆t, Bơngai vei lăng grŭp truh Phŏ kơdră khul jang ki thuơ̆t. Đơ̆ng rŏng kơ khei 'năr năm hŏk chuyên tu tơ̆ Đại học Mỏ - Địa chất, hơnơ̆ng lơ̆m 20 sơnăm blŭng kơ tơdrong jang, ƀok năm tơ̆ jơ̆p tơring bri kông, chă dăr lăng păng tơchĕng hơlen teh, tơgop gĭt kăl ăn tơdrong chih akŏm kơsô̆ 'măn răk ăn teh đak vă pơyoa ăn tơdrong jang atŏk tơiung mŭk drăm, tơpôl. Ƀok đei pơjao lơ tơdrong kăl nhen: Pơm Phŏ Kơdră Anih chih lakak teh, Kơdră Anih vei lăng teh; Phŏ kơdră vei lăng Anih jang Khoa hŏk păng ki thuơ̆t kơ Quốc hội.

Dôm bơngai jang hơdoi hăm ƀok Trần Đức Lương lơ̆m Anih chă hơlen năng teh oei hơnơ̆ng ƀlŏk truh lơ tơdrong hơiă hăm bơngai jang hơdoi, bơngai chĕp kơ̆l tôch tơnăp. Čhưu jơhngâm mưh kơtơ̆ng Kơdră teh đak adrol ki, ƀok Trần Đức Lương lôch, TS hơlen năng teh Nguyễn Thành Vạn, sơ̆ pơm Phŏ kơdră Anih chih Lakak teh păng tơmam lơ̆m teh kơ Việt Nam (găh Anih tơm vei lăng choh jang xa păng cham char) tơroi:

“Hăm inh, Kơdră teh đak Trần Đức Lương mă hơdrol sơ̆ nhôn juăt krao ‘nŏh ‘nhŏng Trần Đức Lương. Sư jĭ 1 ‘nu bơngai ‘nhŏng, jĭ 1 ‘nu bơngai thây. Sư hŏk pơhrăm tôch tơnăp păng đei khei ‘năr tơchĕng hơlen năng  teh tôch đunh, bơ̆ jang tôch rơgei. Sư bơ̆jang tơpăt hăm bơngai juăt jang đơ̆ng Liên Xô, sư adrin hŏk pơhrăm kơdih păng gơ̆h pơma nơ̆r Nga tôch rơgei, sư chă pơma tơblang rim tơdrong hăm nơ̆r Nga, khul juăt jang găh teh đơ̆ng Liên Xô kŭm ƀôh chrih kơđon ‘năi. Dôm tơdrong ƀơm truh tơ̆ teh mă đơ̆ng rŏng âu nhôn pơgơ̆r jang, sư hơnơ̆ng hơlen năng, vang tơgop nơ̆r, roi tơƀôh tôch gĭt kăl. Sư chơng hơnhăk, pơtho tơƀôh ăn inh lơ tơdrong păng inh hŏk đei lơ tơdrong ‘lơ̆ng đơ̆ng ‘nhŏng Trần Đức Lương.”

Đơ̆ng sơnăm 1987 truh khei 8/1992, ƀok Trần Đức Lương đei pơjao pơm Phŏ Kơdră Jơnŭm pơgơ̆r teh đak (dang ei ‘nŏh Phó Thủ tướng teh đak), atŭm hăm ‘nŏh pơm Bơngai tang măt ăn Việt Nam tơ̆ Khul tơgŭm băl mŭk drăm. Păng đơ̆ng khei 9/1992, ƀok pơm Phó thủ tướng truh sơnăm 1997. 10 sơnăm pơm Phó Thủ tướng, kŭm jing khei ‘năr teh đak oei adrin jang kiơ̆ trong tơplih ‘nao đơ̆ng Đảng, tơplih trong jang mŭk drăm đơ̆ng jang atŭm jing jang dih dih tơ̆ anih tĕch mơdro chăl 'nao kiơ̆ trong xã hội chủ nghĩa hăm ƀĕnh tơdrong pơmat tat. Lơ̆m khei 'năr 'nŏh, kơdih kâu Phó Thủ tướng Trần Đức Lương kŭm hăm Khul kơdră teh đak iŏk jang lơ tơdrong tôch trăp trĭ ƀât blŭng chăl tơplih 'nao vă hơnhăk teh đak dar dĕh tŏk klăih đơ̆ng pơmat tat, vang tơgop jang đei lơ tơdrong jơnei tih lơ̆m tơdrong jang tơplih 'nao.

Kŭp yom, hôn bơnê kơ tơdrong arih păng bơ̆jang đơ̆ng Kơdră teh đak Trần Đức Lương hlôi plang ăn teh đak, lơ̆m noh đei hloi chăl ƀok pơm Phó Thủ tướng, PGS.TS Bùi Thị An, Bơngai tang măt Quốc hội jăl 13, Kơdră Anih vei lăng tơmam drăm bri brăh, Cham char păng Atŏk tơiung tơpôl, Phŏ Kơdră vei lăng Grŭp dôm Khul jang Khoa hŏk păng ki thuơ̆t Hà Nội pơma: “Chăl ƀok Trần Đức Lương pơm Phó Thủ tướng, teh đak oei tôch pơmat tat. Mă lei ƀok adrin tôch ai, adrin kŭm hăm Khul kơdră teh đak, hăm đon rơgei đơ̆ng kơdih păng jơhngâm pran teh đak, đơ̆ng rŏng kơ ‘nŏh sư chă dăr hơlen, hŏk iŏk dôm tơdrong kăl đơ̆ng teh đak đe vă hơnhăk teh đak bơ̆n yak hlôi chăl pơmat tat jang tŏk pran găh mŭk drăm, vei lăng sơđơ̆ng chinh trĭ, anih dơ̆ng kơ teh đak roi tŏk. Lơ̆m noh đei lơ tơdrong tơgop đơ̆ng ƀok Trần Đức Lương hăm hơnăp jang pơm Phó Thủ tướng, vei lăng kơmăy kơmŏk tôch pơmat tat, mă gơ̆h jang tŏk hlôi.”

Lơ̆m 2 jăl jang pơm Kơdră teh đak (1997-2006), ƀok Trần Đức Lương đei lơ tơdrong tơgop tih tên lơ̆m tơdrong jang kơtă lơ̆m teh đak păng jang tơbôl, vang vei kơjăp tơdrong sơđơ̆ng chinh trĭ, atŏk tơiung tơdrong mŭk drăm păng hơtŏk anih dơ̆ng lơ̆m apŭng plenh teh ăn teh đak Việt Nam. Ƀok Trần Đức Lương tôch tơrek truh tơdrong pơjing Teh đak chĕp kơ̆l pơgơ̆r kiơ̆ khôi luơ̆t xã hội chủ nghĩa, hơtŏk tơdrong hơmet ming trong pơm hla ar vei lăng, hơtŏk hơnăp jang, pơm kiơ̆ khôi luơ̆t lơ̆m tơdrong arih xa tơpôl. Lơ̆m khei ‘năr âu, dôm tơdrong hơmet trong pơgơ̆r, khul kơdră chĕp kơ̆l păng trong pơm hla ar vei lăng dar dĕh đei tơlĕch jang, pơih trong ăn tơdrong jang hăm kơmăy kơmŏk ‘nao păng mât jang hơdoi.

Bơngai chih hla ar tơroi Hà Đăng, sơ̆ pơm Kơdră vei lăng Đon tơchĕng – Jŏh ayŏ kơ dŏ xoang kơ Trung ương tơroi truh dôm tơdrong ‘lơ̆ng hơiă đơ̆ng Kơdră teh đak Trần Đức Lương: “Ƀok Trần Đức Lương pơm Kơdră teh đak đei lơ tơdrong ‘lơ̆ng. Mă loi ‘nŏh jĭ khei ‘năr bơ̆n oei akŏm jơhngâm bơ̆jang tôch pran, mă lei kŭm tơƀâp lơ tơdrong pơmat tat ‘năi, ‘nŏh ƀok Trần Đức Lương hơnơ̆ng tơrek truh tơdrong jang atŏk tơiung mŭk drăm, tưk tơiung mŭk drăm tơpôl đơ̆ng kơdih. Atŏk tơiung trong jang đơ̆ng kơdih. Ƀok Trần Đức Lương oei jing 1 ‘nu Kơdră  teh đak đei ƀĕnh jơhngâm đon ‘lơ̆ng băt ‘mêm kon pơlei, ‘nhŏng oh păng hăm rim kăn ƀô̆. Dôm tơdrong ƀok jang đei tơƀôh hơdăh khei ‘năr ƀok sek tơlang rim tơdrong tôch rơgei ƀât oei pơm Kơdră teh đak.”

Ưh lăp jing 1 ‘nu Kơdră chĕp kơ̆l rơgei,  đei bưng ai tih đĕch, Kơdră teh đak adrol ki ƀok Trần Đức Lương oei jing 1 ‘nu đảng viên tôch tơpăt, đĭ jơhnơr adrin yoa tơdrong tơchĕng ‘lơ̆ng đơ̆ng cộng sản. Đơ̆ng sơnăm 1959 hloi, ƀok hlôi mât jang lơ̆m Đảng, yak hlŏh 65 sơnăm pơtâp pơhrăm, plang pơyơ̆r ưh đei pơdơ̆h. Lơ̆m rim tơdrong jang, kơchư̆k jang, ƀok hơnơ̆ng tơƀôh jơhngâm đon tơnăp năm hơdrol, iâm dim, huei pơ ang pơrŏ păng oei xa tôch ‘lơ̆ng hăm kon pơlei. Hăm dôm tơdrong tơgop tih tên ăn teh đak, ƀok Trần Đức Lương hlôi đei Đảng păng Teh đak hơpăh ăn lơ tơmam hơpăh kăp gĭt nhen Mê đai Sơnglŏng dreng, Grat 65 sơnăm jang Đảng păng lơ mê đai, tơmam hơpăh kăp gĭt nai đơ̆ng teh đak Việt Nam păng Apŭng plenh teh.

Kơdră teh đak adrol ki, ƀok Trần Đức Lương lôch hơchăng. Đảng, Teh đak păng kon pơlei Việt Nam hiong lê̆ 1 ‘nu Kơdră chĕp kơ̆l gơ̆h hơgei, đei jơhngâm đon jang tơnăp ‘lơ̆ng păng hơnơ̆ng năng tơdrong đei yoa kơ teh đak păng kon pơlei 'nŏh kăl hlŏh. Tơdrong arih păng bơ̆ jang đơ̆ng ƀok hơnơ̆ng jing um rup ang hơdăh tơƀôh trong chong glung ăn rim jơhnơr kăn ƀô̆, đảng viên jang kiơ̆./.