Dôm jĭt ‘nu sinh viên năm jang tơgŭm lơ̆m păng ‘ngoăih kơ dêh char Đắk Lắk, oei adrin bơ̆jang dôm tơdrong jang vei sơđơ̆ng tơdrong arih xa tơ̆ xăh sơlam Ea Rốk păng Ia Lốp, dêh char Đắk Lắk, atŭm hăm ‘nŏh vang bơ̆ jang lơ tơdrong jang gĭt kăl tơ̆ tơring. Khul 45 ‘nu sinh viên jang tơgŭm đơ̆ng Hnam trưng Đại học Nam Cần Thơ jang hơdoi hăm đe đoàn viên, druh dăm tơ̆ tơring bơ̆ jang lơ tơdrong tôch đei yoa, nhen: hơpăh hla ar hŏk păng tơmam hŏk pơhrăm ăn đe hŏk tro jăl mônh, pơm anih ngôi pơchơt păng pơgơ̆r hŏk he ăn đe hơioh, hơpăh aloa ăn dôm hnam hŏk hôp. Găh noh dơ̆ng, kơhrĕng blăh hla Kơ teh đak đei pơjao ăn kon pơlei, rơbâu tô mitôm ƀâu phu ‘lơ̆ng đei sŏng ăn đe oh păng bơngai kră sŏng xa.

Iŏk đei tơmam păng hla ar hŏk ăn kon drŏ nglo vă mât lăm 4, yă Huỳnh Thị Cẩm Tú, tơ̆ plei Dự, xăh Ia Lốp, dêh char Đắk Lắk, hơiă pơma: “Tơ̆ âu jĭ tơring hơtăih yăih kơna iŏk đei tơmam thoi âu tôch hơiă, đe kon mon kŭm tôch ‘nă hal. Bơnê kơ đe boăl sinh viên đơ̆ng hơtăih năm truh tơ̆ âu asong ăn đe kon mon tơmam tôch kăp gĭt âu”.

Ưh lăp hơnhăk ba tơmam đĕch, khul jang tơgŭm oei pơgơ̆r roi tơbăt khôi luơ̆t găh tang găn đe tơrôp, et yoa ma túy păng tĕch bơngai, vang tơgop pơm hơtŏk đon hlôh vao, băt trong vei lăng kơdih ăn kon pơlei tơ̆ tơring sơlam. Akŏm đĭ đăng kơjă tơmam lơ̆m tơdrong jang đei hlŏh 300 triu hlak jên. Sinh viên Mai Huỳnh Đặng, bơngai lơ̆m khul jang tơgŭm tơroi, 1 giĕng năm jang tơgŭm ưh đei đunh, mă lei đei lơ tơdrong ưh đei lai yơ hiơt, ưh lăp hăm kon pơlei đĕch mă kơdih hăm rim sinh viên hai.

“Hlŏh kơ rim tơdrong oh gô chang păng hlôi hơmet hơdrol. Yoa oh đĭ đei ‘măng năm bơ̆ jang tơgŭm lơ̆m pơyan he rơgŏh ‘lơ̆ng tơ̆ Tây Nguyên bơih mă lei ‘măng mă  âu đei lơ tơdrong tôch hơiă. Đơ̆ng rŏng kơ ‘măng năm bơ̆ jang âu oh đei lơ tơdrong hlôh vao 'nao, ƀai hŏk 'nao ăn dôm 'măng năm jang tơgŭm đơ̆ng rŏng dơ̆ng, tơgŭm ăn oh hơmet pơ 'lơ̆ng kơdih kâu mưh bơ̆ jang lơ̆m tơpôl”.

Tơ̆ xăh Hòa Phú, dêh char Đắk Lắk, hlŏh 500 ‘nu kăn ƀô̆, linh Trung đoàn 584 (Anih chĕp kơ̆l pơgơ̆r khul linh dêh char Đắk Lắk) kŭm hăm lơ đoàn viên druh dăm tơ̆ tơring ‘nao pơgơ̆r năm jang Pơyan he 2025 kiơ̆ trong jang đơ̆ng Anih chĕp kơ̆l pơgơ̆r khul linh dêh char păng Anih MTTQ Việt Nam dêh char. Lơ̆m khei bơ̆ jang đunh 45 năr, đe kăn ƀô̆, linh păng đoàn viên druh dăm tơ̆ dôm xăh Hòa Phú, Ea Kiết păng phường Tân Lập (dêh char Đắk Lắk) vang pơm hơmet ming trong tơ̆ tơring, pơtăm ‘long, man anih tơguăt linh hăm kon pơlei, man hnam ăn unh hnam đei kŏng, hơmet ming cham char tơ̆ pơlei pơla, xăh – phường, păng tơgŭm ăn kon pơlei tơplih hăm kơmăy sô̆, pơm hla ar lơ̆m khei ‘năr ‘nao tơmât hơdai dêh char. Vang bơ̆ jang pơgê ‘nâu hei tơ̆ xăh Hòa Phú, Đại úy Phan Thanh Tài, găh Khul 303 - Trung đoàn 584 (Anih chĕp kơ̆l pơgơ̆r khul linh dêh char Đắk Lắk) ăn tơbăt, tơdrong jang âu đei pơgơ̆r đơ̆ng năr ‘nâu truh ‘năr 30/8, tơchĕng hơdrol vă pơm hơmet ming 150 tŏ hnam tơgŭm ăn dôm unh hnam đei kŏng, pơm hơmet ming 90 km trong tơ̆ pơlei pơla, pơtăm rơbâu tơm ‘long tơ̆ dôm xăh ‘nao:

“Đơt 1 sơnăm 2025, nhôn krao akŏm hlŏh 100 ‘nu kăn ƀô̆, linh vă bơ̆ jang dôm tơdrong jang tơ̆ 2 xăh păng 1 phường, kôch hơmet răih nang, hơbong đak, puih hơmet râm rĕk, tơgŭm ăn dôm unh hnam đei kŏng… Kiơ̆ đơ̆ng noh, vang tơgop hơmet kơjăp tơdrong pơvei đơ̆ng linh hăm kon pơlei, pơjing tơdrong hiôk hian vă nhôn jang đang 'lơ̆ng tơdrong vei lăng sơđơ̆ng teh đak”.

Vang bơ̆ jang lơ̆m ‘măng mă âu hai, tơ̆ xăh Hòa Phú, dêh char Đắk Lắk, đoàn viên, druh dăm tơ̆ tơring adrin bơ̆ jang lơ tơdrong nhen vei lăng rơgŏh cham char, tơgŭm ăn kon pơlei tơplih hăm kơmăy sô̆, pơtho tơƀôh trong pơm hla ar hăm điên tư. ‘Nhŏng Lê Dương Bá Ước, Phŏ Kơdră Anih MTTQ Việt Nam xăh Hòa Phú, vei lăng Đoàn xăh tơroi: Mă đơ̆ng tơring ‘nao đei tơmât hơdai, đei lơ tơdrong jang, mă lei khul đoàn viên, druh dăm hơnơ̆ng năm hơdrol, vang yak hơdoi hăm đe ƀô đô̆i chă krao hơvơn kon pơlei păng pơjing tơring tơrang ‘nao.

"Đoàn xăh jang hơdoi hăm Trung đoàn 584 tơgŭm năr kŏng ăn kon pơlei yoă ƀa, phĕ chĕh phe păng tiu lơ̆m pơyan kăt yoă. ‘Ngoăih kơ ‘nŏh, nhôn oei tơlĕch jang lơ tơdrong jang kơ đe druh dăm, nhen pơm kơthŭng mong râm rĕk tơ̆ thôn 8, xăh Hoà Khánh (so).”

Dôm tơdrong jang tôch rơđăh ‘lơ̆ng, đei yoa lơ̆m tơdrong jang tơgŭm pơyan he 2025 tơ̆ Đắk Lắk ưh lăp tơƀôh đon tơnăp, adrin bơ̆ jang đơ̆ng druh dăm sơnăm mơlôh đĕch mă oei tơgop ‘lơ̆ng vă pơm hơtŏk tơdrong arih xa ăn kon pơlei tơ̆ tơring sơlam, tơring hơtăih yăih. Đơ̆ng dôm tơmam iĕ, dôm tơdrong jang lơ̆m tơpôl truh hloi tơdrong krao hơvơn kon pơlei, đĭ đăng hlôi păr ang tơdrong ‘lơ̆ng, băt ‘mêm băl, hơmet kơjăp tơdrong pơvei đơ̆ng sinh viên, linh păng kon pơlei.