Pơgê hei (17/6), tơ̆ Hà Nội, Hnam hŏk Chính trị quốc gia Hồ Chí Minh pơgơ̆r Hop akŏm pơjei băl ‘mêm kơ teh đak ‘măng mă VI (2025-2030). Truh hop akŏm, Phŏ Kơdră teh đak Võ Thị Ánh Xuân- Phŏ Kơdră mă mônh kơ Anih pơgơ̆r pơjei pôk hơpăh kơ Trung ương; kŭm hăm 193 ‘nu bơngai tang măt – ‘nŏh jĭ dôm bơngai jang rơgei lơ̆m tơdrong pơjei băl ‘mêm teh đak đơ̆ng 2020-2025 tơ̆ Hnam hŏk păng dôm Hnam trưng chinh trĭ dêh char, plt găh Trung ương vang hop akŏm.

Pơma pơih blŭng Hop akŏm, TS Nguyễn Duy Bắc, Phŏ Kơdră chĕp kơ̆l Hnam hŏk chính trị quốc gia Hồ Chí Minh ăn tơbăt, Hop akŏm vă năm truh tơdrong hơiă ăn Hop akŏm Đảng lơ̆m teh đak ‘măng mă XIV, Hop akŏm pơjei băl ‘mêm teh đak lơ̆m teh đak ‘măng mă XI, Hop akŏm Đảng ƀô̆ tơ̆ Hnam hŏk ‘măng mă XV jăl jang đơ̆ng 2025 – 2030. Bơ̆ jang kiơ̆ nơ̆r pơtho đơ̆ng Ƀok Hô ‘mêm kơ eng “Pơjei băl ‘nŏh ‘mêm kơ teh đak, ‘mêm kơ teh đak ‘nŏh athei pơjei băl” păng “tơdrong jang rim năr ‘nŏh jĭ tơdrong pơih blŭng ăn tơdrong pơjei băl”, hăm tơdrong chĕp kơ̆l đơ̆ng Đảng, lơ tơdrong pơjei băl ‘mêm kơ teh đak đei tơlĕch. Đảng păng teh đak bơ̆n hơnơ̆ng năng kăl hơnăp jang đơ̆ng pơjei, pôk hơpăh, năng ‘nâu jĭ trong chĕp kơ̆l pơgơ̆r đơ̆ng Đảng, jĭ tơdrong vă vei lăng teh đak păng jơhngâm pran vă jang đang ‘lơ̆ng tơdrong jang chinh trĭ.