Lơ̆m noh, kăl kơ lăng truh hloh ‘noh jĭ tơdrong vang truh Hop akŏm Mŭk drăm Việt Nam - Hokkaido păng sơng kơdră vei lăng Hokkaido. Pơma tơ̆ Hop akŏm Mŭk drăm Việt Nam - Hokkaido, Phŏ Thủ tướng Nguyễn Chí Dũng pơma hơdăh, tơdrong pơvei mŭk drăm đơ̆ng 2 păh oei đei lơ hơnih hơtŏk tơiung, păng tơlĕch ăn 1,2 trong tơƀôh jang hăm khŭl kơdră păng tơpôl mơdro sa 2 păh nhen: hơtŏk loi dơ̆ng jang hơdai mŭk drăm, joh ayŏ đơ̆ng Hokkaido păng rim tơring kơ Việt Nam, tơchĕng hơlen hrôih pơih trong păr tơpăt tơƀưh Hokkaido păng dôm tơring kơ Việt Nam.

Phŏ Thủ tướng pơma hơdăh, Khŭl kơdră teh đak Việt Nam pơkăp ling lang vang yak hơdai, pơm tơdrong hiôk ‘lơ̆ng ăn dôm bơngai tơmơ̆t jên jang lơ̆m păng ‘ngoăih teh đak, lơ̆m noh đei dôm bơngai tơmơ̆t jên jang kơ Nhật Bản păng Hokkaido, tơmơ̆t jên jang tĕch mơdro kơjăp, đei yua, đunh đai tơ̆ Việt Nam.