Pơma tơ̆ hop akŏm, Thủ tướng pơma hơdăh: Tơdrong hơgăt tih hloh ‘noh jĭ truh năr tơbăt 100 sơnăm pơjing Đảng păng teh đak, Việt Nam athei hơtŏk tơiung hrĕnh, rơgoh, kơjăp păng iŏk đei jang tŏk 2 kơsô̆. ‘Meh thoi noh, kăl đei lơ jên jang, lơ̆m noh Anih jang jên hu apŭng plĕnh teh gô pơm hơnăp jang gĭt kăl, tơmơ̆t dơ̆ng jên ăn jang tŏk.

Thủ tướng athei, vă anih jang bơ̆jang jơnei, kăl kơ pơjing trong jang khôi luơ̆t ‘nao, rơđăh, pơm tơdrong hiôk ăn bơngai tơmơ̆t jên jang. Hơdai hăm, athei jang đang anih jang kăl ‘nao, pơm lăp hăm ‘meh vă hơtŏk tơiung păng lăp hăm trong jang jơ̆p plei teh hơdai hăm tơdrong hiôk Việt Nam. Găh bơngai jang, Thủ tướng pơma hơdăh, kăl kơ đei khŭl jang gơh hơgei, ‘lơ̆ng. Mă loi, pơjing hơnih tĕch mơdro tŏk pran, hiôk hian ăn bơngai tơmơ̆t jên jang, yak truh mơdro sa hiôk hian, đei trong jang lăp ‘lơ̆ng.