Tơpôl bơngai Việt tơ̆ Phalăng dang ei đei hlŏh 300.000 ‘nu bơngai, lơ̆m noh dang 50.000 ‘nu bơngai đei hŏk jrŭ păng rơbâu ‘nu bơngai tĕch mơdro. Thủ tướng ăn tơbăt, ‘măng năm ngôi tơ̆ Phalăng mă âu tơƀôh hơdăh đon pơhnŏng đơ̆ng Việt Nam hơnhăk tơdrong pơvei jang hơdoi gĭt kăl tôm tơdrong Việt Nam – Phalăng roi đunh roi ‘lơ̆ng, đei yoa.

Lơ̆m dôm ‘măng bơ̆ jang, Thủ tướng athei dôm kơdră chĕp kơ̆l teh đak Phalăng pơjing tơdrong hiôk hian ăn tơpôl bơngai Việt Nam tơ̆ Phalăng mât hơdai ‘lơ̆ng hăm tơpôl tơ̆ teh đak ‘nâu, vei kơjăp dôm tơdrong juăt ‘lơ̆ng đơ̆ng joh ayŏ kơ dŏ xoang păng nơ̆r Việt, tơgop ‘lơ̆ng ăn mŭk drăm, tơpôl kơ Phalăng. Thủ tướng athei păih Phalăng hơnơ̆ng pơjing tơdrong ‘lơ̆ng vă bơngai Việt mât oei xa hơdai ‘lơ̆ng hơiă, vei kơjăp nơ̆r Việt păng dôm tơdrong jŏh ayŏ kơ dŏ xoang ‘lơ̆ng đơ̆ng sơ̆, vang tơgop pơm gơbng tơƀưh ăn 2 teh đak. Thủ tướng krao hơvơn tơpôl hơnơ̆ng hơtŏk tơdrong tơguăt 1 ƀơ̆r đon, hưch hanh kơ hơdrĕch hơdrung, vang tơgop ‘lơ̆ng ăn tơdrong jang tŏk đơ̆ng Việt Nam păng tơiung jơhngâm ‘mêm kơ teh đak ăn jơhnơr mơlôh.