Tơ̆ jơ sơng, Tổng Bí thư lăng ‘lơ̆ng dôm tơdrong tơgop ‘lơ̆ng păng hơdrin đơ̆ng Bơngai tang măt ăn tơdrong pơtrŭt pơvei 2 teh đak khei ‘năr âu ki, hăm tơdrong hơiă ‘noh jĭ tơdrong hơtŏk tơdrong pơvei 2 teh đak tŏk jang hơdai gĭt kăl tôm tơdrong păng hmach chơt hơiă kơ Bơngai tang măt hlôi jang đang tơdrong jang tôch kơ jơnei tơ̆ Việt Nam. 

Kiơ̆ lơ̆m Jang hơdai gĭt kăl tôm tơdrong, 2 teh đak kăl kơ hơnơ̆ng hơtŏk loi dơ̆ng pơtrŭt tơdrong lui ngeh chĭnh trĭ păng vang tơgŭm găh trĕng lăng păng tơdrong jang hăm dôm tơdrong lơ̆m tơring păng apŭng plĕnh teh. Ƀlep ƀơ̆t ‘măng âu, Tổng Bí thư tơƀôh jơhngơ̆m đon bơnê kơ Khŭl kơdră teh đak Australia hlôi tơgŭm Việt Nam lơ̆m lơ tơdrong jang nhen pơgang, tơlĕch jang ăn khŭl lĭnh năm vei lăng rơngei Liên hợp quốc, tơjră tơplih tŏ ‘mi kial păng tơplih ŭnh hơyuh, pơm tơdrong hiôk ăn tơpôl 350 rơbâu ‘nu bơngai Việt tơ̆ Australia; pơma hơdăh Việt Nam ‘meh vă hơtŏk loi dơ̆ng tơdrong pơvei, jang hơdai hăm Australia yua kơ tơdrong đei yua kơ kon pơlei 2 teh đak, kŭm nhen tơgop lơ̆m tơdrong rơngei, sơđơ̆ng tơ̆ tơring păng apŭng plĕnh teh.