VOV4.Bahnar - Krông Pách jĭ apŭng đei bơ ngai vih đơ̆ng pơ lei tơmt Hồ Chí Minh păng dôm dêh char găh pơ băh lơ hlŏh kơ dêh char Dak Lak, hăm hlŏh 2.700 ‘nu bơ ngai. Vă kon pơ lei vih đei anih oei hơ drô̆ sơ đơ̆ng ‘lơ̆ng, lăp hăm tơ drong tang găn jĭ Covid-19, apŭng Krông Pách đei lơ trong jang hơ iă, rơ gei tơ gŭm ăn kon pơ lei păng unh hnam đe sư sơ đơ̆ng jơ hngâm ƀiơ̆. Trong jang tôch lăp ăn tơ̆ tơ ring tơ rang âu gơ̆h tơ mât yoa tơ̆ dôm tơ ring nai tơ̆ Tây Nguyên.

Vang vih hơ dai đơ̆ng dêh char Bình Dương, Đồng Thanh Hiếu păng 1 ‘nu buăl tŏk bŏk pơm kiơ̆ ăn oei hơ drô̆ lơ̆m kang kưt pơm pơ gia tŏk bŏk mir cheh phe tơ̆ plei Cao Bằng, xăh Ea Knuếc, apŭng Krông Pách. Sư tơ băt, hloh 3 khei ưh kơ đei tơ drong jang lơ̆m tơ ring đei jĭ, kơ sô̆ jên chă pơ đom hlôi yua truh jên tuch luch. Lăp ƀơ̆t Bình Dương pơm rơ hơi ăn gơh yak vih vơ̆t, sư hlôi hao gre hon đa vih tơ̆ pơ lei. Yua kơ unh hnam ưh kơ đei hơ nih ăn oei hơ drô̆ kơ na sư đei khŭl kơ dră tơ ring hơ met ăn oei hơ dai hăm 1 ‘nu dơ̆ng lơ̆m kang kưt mir cheh phe:

        “Vih ‘noh mĕ ƀă păng pơ lei hơ met ăn kang kưt kơ oh vih hơ dai 2 ‘nu ‘nhŏng oh ăn oei hơ drô̆ tơ̆ âu. Rim năr ‘noh mĕ ƀă ƀa tơ mam sa ăn, mĕ ƀă lê̆ tơ̆ hơ la, gô mĕ ƀă năm ‘noh oh jur iŏk. Vih ‘noh oh băt hơ dăh ăn oei hơ drô̆ 1 trong tơ păt.”

Ăn oei hơ drô̆ lơ̆m kang kưt tŏk bŏk pơ gar cheh phe

Ƀok Triệu Văn Đường, thôn phŏ plei Cao Bằng, xăh Ea Knuếc tơ băt, lơ̆m dôm năr âu ki, pơ lei hlôi sơng lơ bơ ngai vih đơ̆ng dôm dêh char găh pơ băh. Vă hơ met hơ nih oei lăp, vei sơ đơ̆ng ‘lơ̆ng tang găn jĭ kiơ̆ ƀlep tơ drong hơ găt, Khŭl chă vei lăng kơ dih kơ pơ lei hlôi dăr hơ len kơ sô̆ unh hnam đei hnam lơ̆m mir cheh phe, đei hnam lê̆ hoh, đang kơ ‘noh pơ ma dơ nuh drơ̆ng nơ̆r hăm dôm unh hnam kon pơ lei asong mơng dôm hnam ‘noh vă pơm hơ nih ăn oei hơ drô̆. Tơ drong jang dăr lăng bơ ngai ăn oei hơ drô̆ đei Khŭl chă vei lăng kơ dih păng grŭp Covid tơ pôl kơ pơ lei bơ̆ jang kiơ̆ tơ păt:

        “Mưh vih ăn oei hơ drô̆ athei tơ roi tơ băt ăn kon pơ lei athei pơm kiơ̆ ƀlep 5k vă vei sơ đơ̆ng ăn kon pơ lei kŭm nhen rông ƀôt kơ pơ lei nhôn. Rim năr kŭm năm hơ len lăng đei oei hơ drô̆ dăh ưh, yua kơ bơ ngai đon băt kơ dih oei ưh kơ đei ‘noh inh kŭm athei tơ tă hơ nơ̆ng.”

Unh hnam asong tơ mam ăn bơ ngai ăn oei hơ drô̆

Oei tơ̆ xăh Ea Yiêng, xăh tơ ring 3 kơ apŭng Krông Pách, yua đơ̆ng hnam lơ̆m mir tŏ sĕt dêh, khŭl kơ dră tơ ring hlôi iŏk yua dôm hnam hŏk hôp tơ pôl kơ rim pơ lei păng 1,2 hơ nih jang tơ pôl pơm hơ nih ăn oei hơ drô̆ păng krao ‘nâu jĭ dôm “hnam kon pơ lei rong”. Lơ̆m rim hơ nih đei pơm chĕng găn lăm hăm chai ni lông hơ tŏ hăm kơ sô̆ bơ ngai ăn oei hơ drô̆. Khŭl chă vei kơ dih rim pơ lei jang hơ dai hăm grŭp Covid tơ pôl păng khŭl hơ druh tơ dăm năm krao hơ vơn phe sŏng tơ mam sa, hơ met ăn bơ ngai pai gŏ, chă asong ăn bơ ngai lơ̆m “hnam kon pơ lei rong”. Khŭl hơ druh tơ dăm tơ ring hlôi tơ lĕch jang lơ tơ drong jang tơ gŭm phe sŏng tơ mam sa vă vei sơ đơ̆ng ‘lơ̆ng ăn kon pơ lei sơ đơ̆ng jơ hngơ̆m pơm kiơ̆ ăn oei hơ drô̆. ‘Nhŏng Trần Đức Hậu, Phŏ Kơ dră Khŭl jang vei lăng hơ druh tơ dăm Việt Nam apŭng Krông Pách tơ băt:

        “Khŭl jang vei lăng hơ druh tơ dăm Việt Nam apŭng pơ gơ̆r tơ drong jang kơ trĭu ‘măng por sŏng vang tơ gŭm dôm ‘măng sŏng sa ăn Khŭl chă vei lăng kơ dih, tơ gŭm răh por sŏng tơ̆ kơ sơ̆ nhen kŭm asong ăn khŭl jang ăn oei hơ drô̆ tơ̆ tơ ring.”

            Tơ̆ apŭng Krông Pách, dêh char Dak Lak, lơ̆m kơ sô̆ hloh 2.700 ‘nu kon pơ lei vih tơ̆ tơ ring đơ̆ng pơ lei tơm Hồ Chí Minh păng dôm dêh char găh pơ băh ‘noh đei 11 ‘nu tŏk bŏk ăn oei hơ drô̆ akŏm tơ̆ apŭng, 54 ‘nu bơ ngai ăn oei hơ drô̆ akŏm tơ̆ dôm xăh păng 2670 ‘nu bơ ngai ăn oei hơ drô̆ tơ̆ hnam. Vei sơ đơ̆ng tơ drong ăn oei hơ drô̆ tơ păt vă tang găn jĭ, Anih vei lăng kon pơ lei apŭng hlôi klăih song hơ dăh hơ năp jang đơ̆ng rim anih jang kơ pal. Kiơ̆ kơ ‘noh, anih jang pơ gang bơ̆ jang pơm test hrĕnh ăn kon pơ lei 3 năr 1 ‘măng, rim năr krao điên thoăi athei kon pơ lei chă pơ tŏ kơ dih yuh hơ kâu, răp hơ len lăng jơ hngơ̆m jăn; rim khŭl jang, grŭp tơ pôl chă hơ vơn jên, tơ mam tơ gŭm ăn kon pơ lei hơ dai hăm jên jang đơ̆ng teh đak. Yă Nguyễn Thị Kim Oanh, Phŏ Kơ dră Anih vei lăng kon pơ lei apŭng Krông Pách tơ roi:

        “Apŭng kŭm tơ lĕch ăn lơ hla ar vă athei jang kiơ̆ tŭn pran tơ drong jang đơ̆ng grŭp tơ pôl COVID tơ̆ rim xăh, thị trấn dăr hơ len dôm ŭnh hnam đei bơ ngai ăn oei hơ drô̆ păng tơ roi tơ băt hơ nơ̆ng ăn Khŭl pơ gơ̆r jang tang găn jĭ kơ xăh 1 năr 2 ‘măng. Apŭng kŭm hlôi pơ jing grŭp vei lăng sơ đơ̆ng tơ drong arih sa tơ pôl, grŭp âu kŭm vei sơ đơ̆ng kon jên kơ apŭng kŭm nhen kon jên krao hơ vơn đơ̆ng rim  bơ ngai đei jơ hngơ̆m đon ‘mêm mơ nat vă tơ gŭm tơ tom ăn rim kon pơ lei ăn oei hơ drô̆ lơ̆m khei ‘năr tơ ƀơ̆p mơ mat tat yua đơ̆ng jĭ COVID -19.”

Dôm tơ năr chĕng găn lăm hăm chai ni lônghơ tŏ hăm kơ sô̆ bơ ngai ăn oei hơ drô̆

Gơ nang đơ̆ng trong jang lăp, tơ drong jang ăn oei hơ drô̆ kon pơ lei vih đơ̆ng pơ lei tơm Hồ Chí Minh rim dêh char găh pơ băh tơ̆ apŭng Krông Pách tŏk bŏk iŏk đei tơ drong drơ̆ng lăp đơ̆ng kon pơ lei. Mă đơ̆ng băt oei lơ mơ mat tat păng krê hơ mơt, mă lei hăm tơ drong hơ met ăn ‘lơ̆ng đơ̆ng rim kơ dră rim anih jang păng tơ drong vang tơ gŭm đơ̆ng kon pơ lei, lui ngeh Krông Pách gô vei lăng jơ nei jĭ Covid-19 tơ̆ tơ ring.

 VOV Tây Nguyên

Thuem: Tơ blơ̆