VOV4.Bahnar - Vă tơ gŭm ăn hơ druh tơ dăm hlôi đei pơm glăi đei ƀrŏk đơ̆ng hnam pơ nă, oei sa hơ dai dơ̆ng hăm tơ pôl, Anih jang Đoan apŭng Mdrắk, dêh char Dak Lak hlôi pơ gơ̆r lơ tơ drong jang tơ ƀơ̆p pơ ma dơ nuh, pơ lung, tơ gŭm hơ druh tơ dăm gơh tŏk iŏk rim jên tơ gŭm. Gơ nang đơ̆ng ‘noh, hlôi tơ gŭm ăn lơ hơ druh tơ dăm yak hloh dôm tơ drong kơ dơ̆ mơ lâu, hơ drin yak hloh.

        Hơ ngŭr vei lăng pơ gar kuich ‘nao pơ tăm sơ năm mă 2, Nguyễn Thanh Tĩnh (28 sơ năm), oei tơ̆ thôn 5, xăh Cư Prao, apŭng Mdrắk, dêh char Dak Lak tơ roi, hơ drol sơ̆, yua kơ sơ năm mơ lôh tam mă băt tơ chĕng jrŭ, đei bôl buăl kơ nê̆ pơ hlŭ pơ tơm kơ na ƀơ̆t tŏk bŏk hŏk tơ drong jang tơ̆ pơ lei tơm Buôn Ma Thuột, sư hlôi pơm glăi tơ tông klĕ mŭk drăm păng athei oei lơ̆m hnam pơ nă 3 sơ năm 1 puăt. Sơ năm 2019, đơ̆ng rŏng kơ đĭ khei ‘năr phak, sư ƀrŏk tơ̆ pơ lei hăm tơ chĕng kơ dơ̆ mơ lâu, ưh kơ pơ̆n. Đei ŭnh hnam păng khŭl kơ dră pơ lung, sư dar deh tơ plih trong tơ chĕng, hơ drin pơm dơ̆ng tơ drong arih sa. Sư gơ nang kơ mĕ ƀă dơ̆ng tŏk iŏk jên vă pơ tăm 5 sao kuich hơ lam hăm kam păng mit thái, đào thim 3 hơ lŭng ka hăm xă vă jê̆ 1 hek tar. Sư kŭm đei Anih jang Đoan apŭng Mdrắk tơ gŭm 1 kăp pơ be yŏng vă rong, hơ tŏk iŏk yua. Nguyễn Thanh Tĩnh tơ roi:

        Ĭnh ƀôh rong pơ be tơ̆ âu tôch kơ hiôk, đei lơ tơ mam sa ăn kơ pơ be păng ĭnh kŭm pơm hơ drong. Dang ei Anih jang Đoan apŭng hlôi tơ gŭm 1 kăp pơ be ‘noh ĭnh ƀrŏk tơ mơ̆t dơ̆ng jên vă răt dơ̆ng 2,3 tŏ vă ĭnh rong vă hơ tŏk tơ iung mŭk drăm, kĕ pơm dơ̆ng iŏk yua ăn kơ dih kâu, ăn kơ dôm buăl nai jang hơ dai, hơ druh tơ dăm nai vang đei tơ drong arih sa thoi ĭnh jang kiơ̆.

Pơ jao tơ đăh ‘long ăn kơ dôm đe hơ druh tơ dăm ƀrŏk đơ̆ng hnam pơ nă tơ̆ apŭng Mdrắk

      Kŭm tơ chĕng vă tơ gĕch iŏk yua 1 hek tar teh đei hơ drol vă hơ tŏk tơ iung pơ gar ‘long sa plei păng vei rong kon tơ rong, Hồ Văn Hoàng, oei tơ̆ thôn 20, xăh Ea Riêng, apŭng Mdrắk tơ băt, sư ‘nao choh hơ met  ming păng lĕch đơ̆ng hnam pơ nă sơ năm sơ̆. Yak hloh dôm tơ drong tơ chĕng ưh kơ ‘lơ̆ng păng kơ dơ̆ mơ lâu, sư pơ hnŏng gô hơ tŏk tơ iung mŭk drăm, pơm pơ drŏng trŏ ƀlep. Dang ei, sư hlôi pơ tăm đei vă jê̆ 300 tơ nơm ‘long vải thiều hơ lam hăm sầu riêng păng nhãn. Sư kŭm sir hơ lŭng xă vă jê̆ 3 sao vă rong ka, hơ met ming iŏk yua. Tơ drong mơ mat tat dang ei đơ̆ng Hoàng ‘noh ưh kơ măh jên tơ mơ̆t jang. Băt hơ dăh tơ drong ‘meh vă đơ̆ng sư, Anih jang Đoan apŭng Mdrắk hlôi tơ gŭm sư tŏk iŏk 20 triệu hlak jên ưh kơ đei jên cheh đơ̆ng jên tŏk iŏk hơ druh tơ dăm tơ iung tơ drong jang sa, pơ tho tơ ƀôh trong hơ tŏk tơ iung lăp vă iŏk kơ đeh rong kơ jung. Hồ Văn Hoàng tơ roi:

        Đơ̆ng rŏng dôm tơ drong ƀơ̆h ƀơm pơm glăi đơ̆ng ĭnh ‘noh ĭnh kŭm brŏk oei sa hơ dai dơ̆ng hăm tơ pôl, jang sa, yak hloh mơ mat tat, hơ drin yak hloh jơ nei lơ̆m tơ drong arih sa ĭnh. Ĭnh tơ chĕng vă yua jên tơ mơ̆t jang lơ̆m tơ drong jang pơ tăm ‘long sa plei păng vei rong nhŭng.

        Nguyễn Thanh Tĩnh păng Hồ Văn Hoàng jĭ 2 lơ̆m kơ sô̆ hơ druh tơ dăm brŏk đơ̆ng hnam pơ nă đei Anih jang Đoan apŭng Mdăk tơ gŭm lơ̆m sơ năm ‘nâu. Kiơ̆ kơ Lê Tuấn Anh, Phó Bí thư đoan, Kơ dră Khŭl vei lăng hơ druh tơ dăm Việt Nam apŭng Mdrăk, đơ̆ng sơ năm 2014 truh dang ei, apŭng Mdrắk hlôi tơ gŭm ăn hloh 50 ‘nu hơ druh tơ dăm brŏk đơ̆ng hnam pơ nă mơ̆t oei sa hơ dai hăm tơ pôl, hăm rim trong nhen asong tŏk iŏk jên ưh kơ đei jên chĕh dăh mă gơh tŏk iŏk jên tơ gŭm, tơ gŭm hơ drĕch ‘long pơ tăm, kon tơ rong. Pơ gơ̆r rim ‘măng pơ ma đam, pơ ma dơ nuh vang tơ roi tơ drong hlôh vao jang sa, vei rong kon tơ rong vă hơ druh tơ dăm tơ ƀơ̆p, hŏk pơ hrăm dih băl. Kiơ̆ đơ̆ng noh pơ trŭt, pơ lung dôm hơ druh tơ dăm hlôi đei pơm glăi yak hloh tơ drong ưh kơ pơ̆n, kơ dơ̆ mơ lâu păng dôm tơ drong lăng ưh kơ hơ iă đơ̆ng tơ pôl vă yak hloh, pơm pơ drŏng.

        Mă mônh ‘noh tơ gŭm đe buăl vă kơ đe buăl ưh pă kơ dơ̆ mơ lâu, mơ̆t oei hơ dai hăm tơ pôl. Mă ƀar ‘noh ‘moi kiơ̆ đơ̆ng đe buăl vă pơm bơ ngai jang tơ roi tơ băt pơ tho dơ̆ng ăn jơ hnơr mơ lôh ‘nĕ kơ rok kiơ̆ đe sư. Tơ̆ hơ năp kơnh ‘noh Khŭl jang vei lăng hơ druh tơ dăm Việt Nam apŭng hơ nơ̆ng pơ gơ̆r rim tơ drong jang pơ ma đam, pơ ma dơ nuh tơ roi tơ drong hlôh vao kŭm hăm đe buăl. Pơ jing 1 grŭp jang hơ dai hơ tŏk tơ iung mŭk drăm đơ̆ng rim buăl hơ druh tơ dăm, tơ klep hơ dai rim buăl hơ druh tơ dăm ƀrŏk đơ̆ng hnam pơ nă mơ̆t bơ̆ jang vă vang hơ dai hăm rim khŭl jang pơ gơ̆r rim tơ drong kơ đoan tơ̆ hơ năp kơnh.

Pơ jao jên tơ iung tơ drong jang sa vă pơm tơ drong hiôk ăn hơ druh tơ dăm brŏk đơ̆ng hnam pơ nă, mơ̆t oei sa hơ dai dơ̆ng hăm tơ pôl

        Kiơ̆ hơ len lăng đơ̆ng Anih jang Đoan apŭng Mdrắk, đơ̆ng rim tơ drong jang tơ gŭm, lơ hơ druh tơ dăm brŏk đơ̆ng hnam pơ nă tơ̆ tơ ring hlôi hơ drin yak hloh, hơ drin vang jang lơ̆m khŭl jang đoan păng hơ drin pơ hrăm, jing dôm bơ ngai jang mŭk drăm hơ gei. 1,2 hơ druh tơ dăm brŏk đơ̆ng hnam pơ nă đơ̆ng rŏng khei ‘năr pơ hrăm păng hơ drin hlôi đei dơ̆ng lơ̆m khŭl jang kơ Đảng, jing dôm bơ ngai brŏk hơ drin păng tơ ƀôh ăn lơ hơ druh tơ dăm nai hŏk pơ hrăm. Gơ nang đơ̆ng noh hlôi hơ tŏk iŏk yua, pơ trŭt ăn lơ hơ druh tơ dăm brŏk đơ̆ng hnam pơ nă nai hơ drin yak hloh đơ̆ng ƀơh ƀơm glăi vă pơm dơ̆ng tơ drong arih sa ‘lơ̆ng hơ iă.

            H’Xíu H’Mốc: Chih

Thuem: Tơ blơ̆