Tŏk bŏk lơ̆m pơyan phĕ cheh phe. Đei plei lơ, đei tŏ ‘noh đei kơjă dơ̆ng kơna bơngai pơtăm cheh phe tơ̆ plei BuN’Doh, xăh Đắk Wer, Đắk Rlấp (Dak Nông) bu bu kŭm chhôk ‘nă. Ŭnh hnam Điểu Suynh oei tơ̆ plei BuN’Doh đei 7 hek tar teh pơtăm tiu, sầu riêng, mắc ca. Lơ̆m noh đei 4 hek tar cheh phe tŏk bŏk lơ̆m khei ‘năr plei lơ hloh. Sơnăm sơ̆ iŏk đei 10 tấn cheh phe găr, sơnăm ‘nâu tơchĕng hơdrol hloh 13 tấn. Pơyan hơdrol, cheh phe lăp tơ̆ kơjă 40 rơbâu hlak jên 1 kĭ, dang ei kơjă tŏk hloh 1 puăt, vă dang 60 rơbâu hlak jên 1 kĭ. Điểu Suynh tơbăt: Dôm năr kơ âu hơ kăn sư jĭ pơ lŏ lĕch đe tŏk bŏk hơmet tơ̆ hnam pơgang dêh char. Gơmăng sư năm tơ̆ hnam pơgang vei lăng hơkăn, mă lei pơgê hrôih đĭ đei măt tơ̆ mir vă klăih song jang, vei lăng hloh 10 ‘nu tŏk bŏk phĕ cheh phe ăn ŭnh hnam. Dôm sơnăm kơ âu, Điểu Suynh đei kon pơlei lui pôk pơm bơngai pơgơ̆r pơlei plei BuN’Doh kơna lơ̆m pơyan phĕ cheh phe, sư roi hrăt hrot dơ̆ng hăm dôm tơdrong jang: Klăih song jang ăn mih ma duch nă răp vei lăng pơgar tang găn bơngai tơ tông klĕ hai, krao hơvơn kơchăng lăp phĕ iŏk cheh phe đum vă vei sơđơ̆ng ‘lơ̆ng hai. Điểu Suynh tơbăt; lơ̆m pơlei đei truh 31 ŭnh hnam tŏk iŏk jên đơ̆ng anih mong jên vă tơmơ̆t jên jang sa. Hơdrô̆ ŭnh hnam sư hơdrol sơ̆ ƀơ̆t lăp tŏk iŏk jên đơ̆ng anih mong jên hloh 1 ti hlak jên. Mă lei đĭ kla răh, dang ei lăp hre 400 triệu hlak jên, ƀơ̆t mă hnam, pơgar ‘long sư đei kơjă vă dang 15 ti hlak jên. “Anih mong jên Argibank Nhân Cơ pơm tơdrong hiôk ăn kơ nhôn tŏk iŏk jên tơgŭm đơ̆ng sơnăm 2012 truh dang ei. Sơ̆ lơ kon pơlei tam mă gơh tŏk iŏk jên tơgŭm đơ̆ng  Argibank, kon pơlei athei tŏk iŏk tơ̆ ‘ngoăih hăm jên cheh tôch kơ lơ. Iŏk đơ̆ng đei jên tŏk iŏk đơ̆ng Agribank nhôn hlôi đei jên lơ̆m jang sa, vei lăng cheh phe, kơ su...  Đơ̆ng noh nhôn đei hơtŏk tơiung mŭk drăm ŭnh hnam, tơgop tơplih um ai tơring tơrang.”

Ưh khan lăp tơ̆ Đắk RLấp, mă kon pơlei bơngai M’ Nông tơ̆ apŭng tơring hơtăih hơtŏ, tơring sơlam Tuy Đức kơ dêh char Dak Nông kum gơh tŏk iŏk jên đơ̆ng Agribank tôch kơ ƀônh ƀŏ. Tơdrong ‘nâu ưh khan lăp găn lê̆ tơdrong chă tŏk iŏk jên đe tơ̆ ‘ngoăih hăm jên cheh lơ mă oei tơgŭm kon pơlei đei jên vă răt tơmam, phŏng vei lăng ‘long pơtăm tơtom pơyan jang. Dang ei hlôi đei 237 ŭnh hnam bơngai M’ Nông đei tŏk iŏk 44 ti 800 triệu hlak jên tơ̆ Anih mong jên Agribank Tuy Đức vă tơmơ̆t jên jang sa. ‘Nhŏng Điểu Jâng oei tơ̆ plei Diêng Ngaih xăh Đăk R’Tih tơbăt: Đunh kơ âu 2 sơnăm sư hlôi tŏk iŏk 500 triệu hlak jên vă răt phŏng păng ‘long hơdrĕch mắc ca, sầu riêng brŏk pơtăm tơ̆ mir să 3 hek tar. Dang ei pơgar ‘long bluh jing ‘lơ̆ng, ƀĕnh tơdrong hơmĕng. “Iŏk đơ̆ng đei jên tŏk iŏk tơgŭm đơ̆ng Anih mong jên găh choh jang sa hơtŏk tơiung tơring tơrang, ĭnh hlôi tơmơ̆t jên jang lơ̆m pơtăm, vei lăng cheh phe, tiu, sầu riêng... Găh lơ ‘noh ĭnh răt phŏng săy ăn kơ tiu, cheh phe, mắc ca păng sầu riêng… Đơ̆ng kon jên âu tôch kơ đei yua hăm nhôn, jên cheh tôch tŏ sĕt kơna kon pơlei tôch kơ sơđơ̆ng jơhngơ̆m.”

Ƀok Thân Văn Chí, phŏ Kơdră vei lăng Anih mong jên Agribank tơ̆ Dak Nông tơbăt: Agribank tơ̆ Dak Nông đei khŭl jang truh tơ̆ đĭ đăng dôm apŭng lơ̆m dêh char hăm 14 anih jang tĕch mơdro. Kang ƀô̆ asong tŏk iŏk jên hlôh băt tơring, kơna ăn tŏk iŏk ƀlep bơngai păng đe sư iŏk yua jên ƀlep tơdrong, hơtŏk đei iŏk yua. Truh dang ei hlôi đei 3.500 ŭnh hnam bơngai kon kông kơtă anih đei tŏk iŏk jên đơ̆ng Agribank tơ̆ Dak Nông hăm kơ sô̆ rơkăh hre tŏk truh 570 ti hlak jên. “ ‘Moi kiơ̆ kon jên đơ̆ng kơdih, nhôn tơgŭm kon pơlei găn đei tơdrong tŏk iŏk jên đe tơ̆ ‘ngoăih hăm jên cheh lơ mă bơ̆n ƀôh khei ‘năr âu ki hlôi pơm ƀơm lơ ưh kơ ‘lơ̆ng ăn dôm ŭnh hnam. Hơdai hăm tơdrong asong tŏk iŏk jên, ‘noh nhôn tơlĕch jang dôm tơdrong jang vei sơđơ̆ng tơdrong arih sa tơpôl, pơm man dôm hnam oei ăn dôm ŭnh hnam đei tơdrong arih sa mơmat tat. Khei ‘năr âu ki nhôn bơ̆jang kiơ̆ ‘lơ̆ng trong jang tơgŭm âu. Đei lơ ŭnh hnam kon kông hlôi đei pơm hnam vă oei sa 1 dơnơ̆ng jang sa dơ̆ng mĭnh ƀôt. Tơ̆ hơnăp kơnh nhôn gô hơnơ̆ng hơtŏk tơiung đei yua dôm tơdrong jang vă hơnhăk kon jên truh đei lơ hloh hăm kon pơlei hloh dơ̆ng vă tơgop tơgŭm kon pơlei đei tơdrong arih sa hăm mŭk drăm roi ‘năr roi ‘lơ̆ng hloh”.