Ŭnh hnam mŏ Hà Thị Eng oei tơ̆ thôn 5, tơring Cư Kbang, apŭng Ea Súp, dêh char Dak Lăk đei 6 ‘nu mă lei lăp hơdrô̆ mŏ ‘noh bơngai jag tơm. Teh choh jang sa iĕ, jang sa iŏk đei gơnang đơ̆ng jang ăn kơđe rim năr ưh kơ măh vei lăng năng tông ăn 3 ‘nu kon oei ‘lơ̆p, tơnei kră pă ke jang sa păng klo hơnơ̆ng jĭ jăn. Sơnăm 2023, gơnơm đei Tơdrong jang tơm teh đak tơjur dơnuh kơjăp ‘lơ̆ng tơgŭm ăn hloh 35 triu hlak jên răt rong 4 tŏ rơmo yŏng. Truh dangei rơmo hlôi chông đei 6 tŏ. Mŏ Hà Thị Eng lui gô đei tơdrong hơrih sa ‘lơ̆ng rŏ hloh dơ̆ng:“Ŭnh hnam ưh kơ đei yă kiơ, găh teh lăp đei 5-6 sao chŭn na jei kĕch yoă đei lăp 50-60 ƀi đĕch. Ŭnh hnam bơ̆n đei tơgŭm ăn rơmo, đei kơdră tơring lăng ba păng đei hŏk pơhrăm vei lăng năng tông rơmo. Khei năr kơnh, ba hơdrin vă ŭnh hnam yak hloh dơnuh.”

Hăm mŏ Hà Thị Yêu, oei tơ̆ thôn 5 tơring Cư Kbang, ‘măng ŭnh sa lơ̆m sơnăm 2013 pơm ăn ŭnh hnam măh dơnuh hin. Vă đĭ sơnăm 2014, mŏ đei pôk ăn hnam ‘mêm mơnat. Sơnăm 2023 ŭnh hnam mŏ đei tơgŭm ăn dơ̆ng 4 tŏ rơmo yŏng. Hăm tơdrong tơgŭm djru đơ̆ng teh đak păng hơdrin jang sa, ŭnh hnam mŏ Hà Thị Yêu hlôi yak hloh dơnuh hin:“Mưh đei rơmo bơih, ba tŏk iŏk dơ̆ng jên vă tơmơ̆t jang sa hơdrol mưh rơmo su ‘noh tech kla ăn kơ đe jên tŏk iŏk. Dang ei ŭnh hnam ơ̆n hơrih sa sơđơng ƀiơ̆, hlôi yak hloh dơnuh, ưh kơ băt chă pơma yă kiơ bơih, lăp băt bơnê kơ Đảng păng khul kơdră teh đak.”

Cư Kbang ‘noh tơring tơnap tap hloh kơ apŭng Ea Sŭp, găh lơ ‘noh bơngai kon kông, ŭnh hnam dơnuh tơmơ̆t vă jê̆ 58%. Ƀok Cao Thanh Hoài, Kơ iĕng Kơdră chĕp pơgơr Đảng tơring Cư Kbang tơbăt, vă bơ̆ jang tơjur dơnuh kơjăp ‘lơ̆ng, tơring hlôi tơlĕch lơ trong jang atŏk tơ iung mŭk drăm tơpôl. Mă kăl đơ̆ng mă jang kiơ̆ 3 Tơdrong jang tơm Teh đak hlôi pơjing đei tơplih hơ iă, tơgop gĭt kăl pơm tơplih tơdrong hơrih sa ăn kon pơlei:“Tơdrong tơmơ̆t jên jang găh trong hnam, găh ptrong jang sa rong kon tơrong ăn kon pơlei, mă kăl tơdrong jang tơgŭm rơmo ăn kon pơlei hlôi đei tơdrong vang tơgŭm păng lăp đon đơ̆ng kon pơlei. Hloh 1 sơnăm hơlen ‘noh hlôi iŏk jơnei hơ iă adoi nhen kon jên tơlĕch jang đei iung jang ‘lơ̆ng. Ŭnh hnam dơnuh mĭnh sơnăm tơjur 5-7%."

Lơ̆m apŭng sơlam teh đak Ea Súp, dôm sơnăm ou ki, khul kơdră đảng, kơdră tơring hlôi tơlĕch jang kiơ̆ jơnei kơ rim trong tơlĕch jang đơ̆ng Đảng, teh đak pơjing tơplih hơdăh lơ̆m atŏk tơ iung mŭk drăm tơpôl. Mă kăl pơjing đei 56 trong jang atŏk tơ iung choh jang sa; pơih mơjĭt lăm pơtho tơdrong jang; ba bơngai jang năm jang tơ̆ Hàn Quốc; tơgŭm kon pơlei tŏk iŏk jên hloh 121 ti hlak jên vă tơmơ̆t jang sa mơdro sa ...; ƀơk kơtheh Ƀao hiêm Tơpôl đei 53.240 ŭnh hnam; pơm tơjur kon jên hŏk pơhrăm ăn 13.650 ‘nu hŏk tro… Ƀok Nguyễn Thanh Tuấn, Kơ iĕng Kơdră chĕp pơgơ̆r Hơnih vei lăng kon pơlei apŭng Ea Súp, dêh char Dak Lăk tơbăt:“Sơ̆ ŭnh hnam dơnuh lơ̆m apŭng Ea Sŭp tôch kơ lơ, lơ hloh 60%.Hloh 3 sơnăm tơlĕch jang rim tơdrong jang tơm tơjur dơnuh kơjăp ‘lơ̆ng, truh dang ei apŭng hlôi tơjur pă 42%. Vă bơ̆ jang tơjur dơnuh kơjăp ‘lơ̆ng Hơnih vei lăng kon pơlei apŭng hlôi tơlĕch 3 Tơdrong jang tơm Teh đak, tơlĕch lơ tơdrong vă jang găh tơgŭm djru hnam oei, teh oei, teh jang sa ăn rim ŭnh hnam kon kông.”

Kiơ̆ đơ̆ng ƀok Nguyễn Thanh Tuấn, apŭng Ea Súp tok bŏk pơrô̆ pơtho tơbăt vă pơm hơtŏk jơhngơ̆m đon hlôh vao, atŏk jơhngơ̆m đon hơdrin jang sa vă kĕ yak hloh dơnuh ăn kon pơlei; adoi tơ iung pơjing păng langsă trong jang sa hơnhăk đei iŏk yua kơjăp. ‘Ngoăih kơ ‘noh, apŭng hơnơ̆ng chă hơvơn kon jên hu tơmơ̆t jang ming man trong nơnăm tơgŭm ăn atŏk tơ iung muk drăm-tơpôl, tơgop xut xa pơngot tơvĕt tơjur dơnuh kơjăp ‘lơ̆ng.