Kră pơlei Cao Dáng, hơdrung Raglay, oei tơ̆ pơlei A Xây sơ̆ ‘noh hlôi lơ sơnăm jang Kơdră chĕp pơgơ̆r Hơnih vei lăng kon pơlei, Ƀĭ thư Đảng tơring Khánh Nam, apŭng Khánh Vĩnh mĭnh tơring đei truh 80% kon pơlei ‘noh bơngai kon kông. Dôm sơnăm ‘noh, pơngot rơvĕt, dơnuh hin ling lang druh kiơ̆ kon ppơlei. Ƀok Cao Dáng hlôi pơ̆n tơplih đơ̆ng jang ƀa kông jing jang chŭn na ƀa đak, sir sơlŭng rong ka, pơtăm kơtao, pơtăm krô̆i pung ... Dang ei ŭnh hnam đei 2ha kơtao, 2ha ‘long keo lai, 3 sao ‘long krô̆i pung hơkar jơk hơnhăk đei iŏk yua kơjăp. Ƀôh ƀok Cao Dáng jang sa lĕch, kon pơlei kon kông lơ̆m pơlei, tơring jang kiơ̆, lơ ŭnh hnam hlôi yak hloh dơnuh. Ƀok tơbăt:“Kon pơlei lơ̆m pơlei lăng ba jang, hŏk kiơ̆, jang kiơ̆. Chă pơtăm ‘long sa plei kăl tuh phŏng mơ̆r, choh ‘ngiĕt rơgoh, tơruih đak vă ‘long bluh vơ̆ jing ‘lơ̆ng, đei plei trem. Kon pơlei hơdrung Raglay ƀôh ba jang ‘noh jei jang kiơ̆. Ba chă pơtho ăn kon pơlei jang. Sơ̆, lơ̆m pơlei ou tŏ sĕt mă lei hrei ou lơ ŭnh hnam hlôi pơtăm ‘long sa plei, jang mir pơgar să”.

Vă đĭ sơnăm 2021, apŭng Khánh Sơn oei vă jê̆ 5.000 ŭnh hnam dơnuh, vă jê̆ dơnuh, ‘noh hloh 66% kon pơlei pơla; găh apŭng Khánh Vĩnh oei hloh 5.000 ŭnh hnam dơnuh, ŭnh hnam vă jê̆ dơnuh, tơmơ̆t 60% kon pơlei. Kơ yuơ lơ loh ‘nou jĭ 2 lơ̆m 74 apŭng dơnuh lơ̆m teh đak jăl sơnăm 2021-2025.

Hăm kơrŭn đĭ ai ba 2 tơring hrôih yak hloh apŭng dơnuh, dêh char Khánh Hòa hlôi akŏm kon jên jang đơ̆ng Trung ương, tơring păng chă hơvơn đơ̆ng lơ khul anai vă tơmơ̆t jang hrơ̆p mĭnh ‘măng rim trong jang atŏk tơ iung mŭk drăm-tơpôl. ‘Ngoăih tơmơt jên jang pơm trong hnam ‘noh dêh char Khánh Hòa lăng kơjăp rim trong jang choh jang sa, atŏk jang sa iŏk yua kơjăp, tơjur dơnuh ăn rim ŭnh hnam. Rim trong jang tơplih ‘long pơtăm, rong kon tơrong đei tơlĕch jang kiơ̆ tơ̆ rim pơlei pơla. Ưh khan lăp pơgơ̆r pơtho tơbăt, ƀơk ăn hơdrĕch ‘long pơtăm mă lei rim đang viên, bơngai đei kon pơlei lui yom oei jang hơdrol, pơm jŭk yŭk trong hơlou vă kon pơlei ƀôh, jang kiơ̆. Dôm bơngai đei kon pơlei lui yom oei pơrô̆ pơrôp, pơtho tơbăt pơm hơtŏk jơhngơ̆m đon hlôh vao hơdrin jang sa kơ ŭnh hnam dơnuh, ŭnh hnam vă jê̆ dơnuh. Kră pơlei Xuân Nghi, oei lơ̆m pơlei Dốc Gạo, thĭ trân Tô Hạp, apŭng Khánh Sơn, dêh char Khánh Hòa tơbăt:“Choh jang sa mă kăl pơtăm sâu riêng, pơtăm hrou hăm prit vă đei chă tĕch mơdro kơ ‘năr. Bơngai kon kông ‘măng blŭng chă pơtăm lăp tŏ sĕt kơ yuơ tim gan joăt. Nhôn chă pơtho khan ăn đe sư, đei tơdrong lăng ba kơjăp đơ̆ng Teh đak chă pơtho ăn pơtăm hloi ‘long pơtăm, hrei ou đei lơ bơngai pơtăm bơih. Bơngai pơtăm tŏ sĕt hloh jei truh 200 dơnơm, đei bơngai chă pơtăm truh kơ hek tar hloi, đei ŭnh hnam hlôi đei ƀôh”.

4 sơnăm ou ki, kon jên jang Trung ương păng tơring hlôi tơmơ̆t jang ăn apŭng Khánh Sơn hloh 600 ti hlak jên. Truh vă đĭ sơnăm 2024, mĭnh lơ̆m dôm tơdrong ‘lơ̆ng hơ iă hloh kơ apŭng ‘noh hlôi jang keh đang tơdrong pơjao yak hloh apŭng dơnuh; găh ŭnh hnam dơnuh, ŭnh hnam vă jê̆ dơnuh hlôi tơjur kơtang lăp pă hloh 31%. Jang sa iŏk đei jô̆ hơtŏ măt bơngai lơ̆m apŭng ‘noh 36 triu 120.000 hlak jên lơ̆m 1 ‘nu 1 sơnăm, tŏk lơ hloh 2 ‘măng pơtêng hăm đĭ sơnăm 2020.

Truh dang ei, Khánh Sơn hlôi yak hloh lơ̆m hơnăn apŭng dơnuh, hrôih hloh 1 sơnăm pơtêng hăm trong tơlĕch jang kơ Tơdrong tơchơ̆t Hop akŏm tih Đang ƀô̆ apŭng, jĭ hơyak gĭt kăl hloh vă apung lăng truh jang keh đang kơtang hloh dơ̆ng. Ƀok Bùi Hoài Nam, Ƀĭ thư Đảng apŭng Khánh Sơn tơbăt, choh jang sa tŏk bŏk jing tơdrong jang mŭk drăm tơm mưh tơmơ̆t hloh 70% lơ̆m trong pơprŏ jang mŭk drăm, jei jing hơyak vă apŭng “xut hŭt dơnuh” tĕnh koăng lơ̆m dôm sơnăm tơjê̆ ou păng đei hơmŏ gô pơih trong ‘lơ̆ng tơgŭm ăn kon pơlei hơdrin đei jing ŭnh hnam đei ƀôh, ŭnh hnam pơdrŏng. Lơ̆m apŭng đei 29 ‘nu bơngai đei pôk pơ ư jĭ bơngai đei kon pơlei lui yom, lơ̆m ou 24 ‘nu bơngai ‘noh đang viên, ‘nou jĭ khul gĭt kăl hloh vă apŭng iŏk đei jang keh đang rim trong tơlĕch jang truh ou kơnh. Ƀok Bùi Hoài Nam tơbăt:“Hơtŏk hơnăp jang kơ bơngai đei kon pơlei lui yom lơ̆m kon pơlei pơla, đe sư ‘noh dôm bơngai jang sa đei iŏk yua kơjăp đơ̆ng rim trong jang choh jang sa tơ̆ apŭng Khánh Sơn. Đơ̆ng noh, hơnơ̆ng lang să rim trong jang choh jang sa, pơm hơtŏk jơhngơ̆m đon kơchăng lơ̆m vei lăng cham char rơgoh ‘lơ̆ng, kon pơlei hơdrin tơklep kơjăp hăm teh, hăm mir pơgar pơm pơdrŏng ‘lơ̆ng hơ iă. Truh ou kơnh, apŭng gô tơlĕch rim trong pơkăp dôm yơ unh hnam yak hloh dơnuh kơjăp ‘lơ̆ng, găh unh hnam pơdrŏng dôm yơ, ŭnh hnam đei ƀôh dôm yơ lơ̆m kon pơlei kon kông”.

Ƀok Nghiêm Xuân Thành, Bí thư Đảng dêh char Khánh Hòa hlôi athei 2 apŭng Khánh Sơn, Khánh Vĩnh lăp đơ̆ng rŏng đei drơ̆ng yak hloh apŭng dơnuh ‘noh ‘nĕ kơ lê̆ vih hơlơ̆k dơnuh dơ̆ng mă lei kăl atŏk tơ iung jing apŭng đeh ƀôh, apŭng pơdrŏng hăm kơdih kơrŭn. ‘Meh vă lơ loh, rim tơring kăl sơkơ̆t hơdăh klăh asong kon jên tơmơ̆t jang. Tơdrong tơmơ̆t jên jang trŏ ƀlep gô pơjing đei hơyak pran ăn atŏk tơ iung. Kiơ̆ kơ ƀok Nghiêm Xuân Thành, rim tơring kăl kơchăng mă brĕ tơdrong atŏk tơ iung tôtong rim kơ loăi ‘long pơtăm đei iŏk yua kơjăp, atŏk tơ iung kơjăp ‘lơ̆ng tơklep hăm choh jang sa păng vei lăng ‘lơ̆ng cham char:“Đảng viên pơm juk yŭk trong hơlou, kon pơlei kơdou druh kiơ̆ đơ̆ng rŏng găh atŏk tơ iung choh jang sa hơnhăk đei iŏk yua kơjăp, tôch chơt hơ iă. Bơ̆n hlôi tơlĕch trong jang, pơrô̆ pơrôp kon pơlei păng iung jang hơdrol. Bơ̆n hlôi chông ba păng hlôi iung jang nŏng bơih. Tơdrong kăl hlŏh kơ dêh char Khánh Hòa ‘noh tơjur dơnuh, tŏk đei ƀôh, tŏk pơdrŏng. 2 apŭng yak hloh dơnuh hơdrol 1 sơnăm, ‘nou jĭ tơdrong hơdrin tih tên hloh. Yak hloh dơnuh ‘noh jing khei ‘năr gĭt kăl hloh”.