Nhôn năm trŭh tơ̆ apŭng Lâm Hà ƀlep lơ̆m jơ ‘năr kon pơlei tơ̆ au tŏk bŏk chơt hơ iă lơ̆m Năr pơm lêh tơgoăt tơgoăl-kơkuh chơt hơ iă Apŭng iŏk đei jing tơring tơrang ‘nao. Gŭt đing tơdrô “Dà Mpao”, ƀok Kră Jan Nhang -  Kră pơlei kơ pơlei Dà mpao, tơring Đạ Đờn, apŭng Lâm Hà chơt hơ iă tơroi: ‘nau tơmam drăm OCOP kơ tơring, đei hơnhăk ba tơƀô̆h tơbăt lơ̆m năr lêh. Kră pơlei oei tơblang hơdăh găh tơdrô ge krao hơnăn “Dà Mpao” ‘nŏh nơ̆r K’Ho, dăh nơ̆r bơ̆n akhan “Thong đak hơpơi”.“Kon pơlei vang năm Năr pơm lêh tơgoăt tơgoăl jĭ tôch chơt hơ iă, Đảng, Teh đak đunh đunh pơgơ̆r năr lêh tơgoăt tơgoăl au, đĭ đăng rim bơngai vang năm kơna tôch chơt hơ iă. Kon pơlei vang tơgop năr jang, mŭk drăm jên hu, plang ăn teh vă pơm trong, vei lăng năng tông pơlei pơla rơgoh ‘lơ̆ng, jang sa roi năr roi atŏk tơ iung. Kon pơlei jei vei kơ jăp tơdrong oei sa joăt joe sơ̆ ki nhen tôn chĭng chêng, dui brai vai tanh khăn ... Găh atŏk tơ iung mŭk drăm ‘noh rim bơngai chă rong kon kơlap, kon tơrong, pơtăm chehphe, jang chŭn mir. Gơnơm đơ̆ng nŏh kơna tơdrong erĭh sa kơ kon pơlei roi năr roi atŏk tơ iung”.

Trong tơm đơ̆ng thi trân Đinh Văn năm truh rim tơring đei pơ̆ih să, găn hloh mir pơgar chehphe ƀlĭk ƀlăk atŭm hăm ‘long sâu riêng păng ‘long sa plei. Trŭh tơ̆ rim tơring pơlei ‘lơ̆ng rŏ, đei lơ pơbŭng hnam tih ‘lơ̆ng, kon pơlei tŏk bŏk vei lăng năng tông pơkao, ‘long pơrŏ 2 păh jĭh trong păng chă choong hơpuih hơmet pơ ‘lơ̆ng vă sơng sơnăm ‘nao. Ƀok K’Brối- Kơdră chĕp pơgơ̆r Dơnŏ anĭh Mặt trận Tổ quốc Việt Nam tơring Liên Hà tơbăt: “Liên Hà” ‘nŏh hơnăn kơ mĭnh tơring tơ̆ apŭng Đan Phượng, pơlei tơm Hà Nội, mư̆h kon pơlei mơ̆t tơ̆ Lâm Đồng tơ iung pơjing mŭk drăm ‘nao. Lơ̆m tơring đei hlŏh 2.000 ŭnh hnam kon pơlei hăm dang 9.000 ‘nu măt bơngai. Lăp đơ̆ng rŏng đei drơ̆ng “Tơring tơrang ‘nao” đơ̆ng sơnăm 2019, pơđĭ kon pơlei hơnơ̆ng tơgum djru vă tơ iung pơjing tơring tơrang ‘nao ‘lơ̆ng hlŏh dơ̆ng.“Lăp đơ̆ng rŏng tơring Liên Hà đei drơ̆ng jing tơring tơrang ‘nao ‘nŏh đei Tơdrong tơchơ̆t jang ƀar păh Dơnŏ anĭh vei lăng kon pơlei păng Dơnŏ anĭh Mặt trận tổ quốc, hơnơ̆ng iung jang kiơ̆ mĭnh nơ̆r ƀơ̆r đon hơdrin iŏk đei kơtang hlŏh dơ̆ng kơ tơdrong jang tơring tơrang ‘nao. Rim sơnăm, Mặt trận tổ quốc chă hơvơn rim hơnĭh, mă kăl ‘nŏh rim kră pơlei, thôn trơng rim pơlei pơla kon kông, vang kơrŭn jơhngơ̆m iung jang tơ iuntg pơjing tơring tơrang ‘nao tơ̆ rim pơlei pơla, yak trŭh tơ iung pơjing tơring tơrang ‘nao kơtang hlŏh dơ̆ng”.

Kiơ̆ tơbăt đơ̆ng Dơnŏ anĭh vei lăng kon pơlei apŭng Lâm Hà, dêh char Lâm Đồng, hlŏh 35 sơnăm tơ iung pơjing, atŏk tơ iung păng 10 sơnăm tơlĕch jang kiơ̆ Tơdrong jang Teh đak tơ iung pơjing tơring tơrang ‘nao, apŭng Lâm Hà hlôi iung jang kơtang tôm tơdrong.Lơ̆m jăl jang 2015 – 2020, atŏk mŭk drăm rim sơnăm kơ apŭng Lâm Hà đei 7,6% lơ̆m sơnăm. Hơdrô̆ sơnăm 2022 au ki, tŏk mŭk drăm Lâm Hà đei 8,5%, Jang sa iŏk đei jô̆ hơtŏ măt bơngai đei vă jê̆ 57 triu hlak jên. Dôm sơnăm au ki, akŏp kon jên chă hơvơn tơ iung pơjing tơring tơrang ‘nao lơ̆m apŭng hlŏh 5.300 ti hlak jên. Trŭh dang ei, trong hnam au to đei lăng ba kơ jăp tơmơ̆t jên jang ‘lơ̆ng.

Hăm dôm tơdrong jang iŏk đei jơnei, năr 12/7/2022, Thủ tướng Teh đak hlôi Tơchơ̆t drơ̆ng nơ̆r apŭng Lâm Hà, dêh char Lâm Đồng iŏk đei tơring tơrang ‘nao. Năr 19/10/2022, Kơdră chep pơgơ̆r Tĕh đak tơlĕch Tơdrong tơchơ̆t pôk ăn Mê đai jang pran kơtang dơ̆ng mă Pêng ăn Dơnŏ anih Đảng, Khŭl kơdră chĕp pơgơ̆r păng Kon pơlei apŭng Lâm Hà hlôi jang pran kơtang lơ̆m tơdrong pơting dih băl “Lơ̆m teh đak vang kơrŭn jơhngơ̆m tơ iung pơjing tơring tơrang ‘nao”. Ƀok K'Tân – Kơ iĕng Kơdră chĕp pơgơ̆r Dơnŏ anih Măt trân Tổ quốc apŭng Lâm Hà, dêh char Lâm Đồng sơkơ̆t hơdăh, iŏk đei tơdrong au, ‘ngoăih tơdrong lăng ba kơ jăp đơ̆ng Đảng, Tĕh đak, tơ ƀô̆h tơbăt jơhngơ̆m pran tơgoăt tơgoăl rim hơdrĕch hơdrung lơ̆m apŭng. “Mặt trận Tổ quốc Việt Nam apŭng Lâm Hà đei hơnăp jang dăr lăng rim tơdrong jang, tơgoăt tơgoăl akom rim răih kon pơlei. Ƀlep tơbăt 35 sơnăm năr pơjing apung Lâm Hà, ‘nao au apŭng pơgơ̆r pơm lêh drơ̆ng nơ̆r apŭng tơring tơrang ‘nao. Rim răih kon pơlei kơ rim hơdrĕch hơdrung lơ̆m apŭng tôch chơt hơ iă. Lơ̆m au đei tơdrong vang tơgop đơ̆ng Dơnŏ anih Mặt trân rim hơnih. Hơdrô̆, Dơnŏ anih MTTQ đei 10 tơdrong jang, 10 trong pơkăp vă xek tơchơ̆t drơ̆ng jing tơring tơrang ‘nao, tơring chŏh jang sa ‘lơ̆ng păng đei hloi tơdrong vei lăng năng tông erĭh sa ăn kon pơlei”. 

Sơnăm ‘nao 2023 hlôi truh, kon pơlei rim hơdrech hơdrung apŭng Lâm Hà, dêh char Lâm Đồng đei dơ̆ng lơ tơdrong chơt hiôk ‘nao. ‘Nŏh jing hơyak pran vă khul Đảng, Khŭl kơdră chĕp pơgơ̆r păng Kon pơlei rim apung apŭng hơnơ̆ng atŏk tơ iung joăt joe tơgoăt tơgoăl, vang kơrŭn jơhngơ̆m, mĭnh nơ̆r ƀơ̆r đon tơ iung pơjing apŭng Lâm Hà roi năr roi pơdrŏng pran kơtang.