Pă chă mơ hoal, pă chă pơjoăl kôn mon kon sou chă chơ ba mưh truh jơ ‘năr iŏk jên khei pơdơ̆h jang, dăh mă pơm hla bơar ƀao hiêm, ƀok Nguyễn Văn Minh oei tơ̆ tơring Ea Ning, apŭng Cư Kuin, dêh char Dak Lăk dang ei gơ̆h chă lăng hơlen dôm tơdrong lơ̆m tai khoan hơnih mong jên păng rim tơdrong tơgŭm djru ăn kang ƀô̆ pơdơ̆h jang lơ̆m tai khoan điên tư hlôi pơm keh đang hăm hơnih mong jên ƀao hiêm tơpôl dêh char. Ƀok Nguyễn Văn Minh tơbăt, đơ̆ng mă rim bơngai lơ̆m khul jang kmăi kmok kơsô̆ pơlei pơla kơ tơring năm kai tơơ̆t păng pơtho plôih lăng ưng yŭng ou ƀok ƀôh tôch rơvơn.“Pă chă năm bơih dăh mă dôm năr bơ̆n ưh kơ văn hmă hmă pơm hla bơar ăn bơngai nai dơ̆ng pang tang măt gô đunh ‘mơ̆i mă iŏk đei. Đơ̆ng mă đei trong jang ou, mư̆h truh năr pơkă ‘noh đe sư pơtruh ăn jên hloi. Nhôn iŏk yua lơ lou joăt bơih adoi pă đei tăh toh iŏk jên bơih, tơdrong chă răt tơmam drăm ou to lăp phĭn lơ̆m mã QR jĭ tôch rơvơn”.

Pă đei chă yak rim koeng, kơleng rim hnam rim khul jang kmăi kmŏk kơsô̆ pơlei pơla tơ̆ tơring Ea Ning, apŭng Cư Kuin, dêh char Dak Lăk oei chă klăh asong dih băl năm bơ̆ jang lơ̆m hơnih jang mĭnh ‘măng tơ Hơnih bơ̆ jang vei lăng kon pơlei tơring vă tơgŭm, pơtho tơbăt ăn kon pơlei. Hăm jơhngơ̆m đon phăl hơlăng, hơnăp jang ‘lơ̆ng lơ̆m tơgŭm djru đơ̆ng rim khul jang kmăi kmŏk kơsô̆, roi năr roi đei lơ kon pơlei Đak Lăk hlôi iŏk yoa ‘lơ̆ng hơ iă rim ư̆ng yŭng kơsô̆ tơgŭm ăn tơdrong jang kăl nhen: jang pơgang, pơtho pơhrăm, tơgŭm djru tơpôl ‘moi kiơ̆ kmăi kmŏk kơsô̆, vang tĕch mơdro tơmam drăm lơ̆m điên tư. Ƀok Nguyễn Văn Mạnh, bơngai jang lơ̆m khul tơplih kơsô̆ pơlei pơla, tơring Ea Ning, apŭng Cư Kuin, dêh char Đak Lăk tơbăt:“Rim bơngai jang lơ̆m rim khul tơplih kơsô̆ pơlei pơla, atŏk kơtang hơnăp jang pơm jŭk yŭk trong hơlou, năm iung jang đơ̆ng khul hlôi vang chă pơtho ăn kon pơlei tơ̆ rim pơlei pơla. Đơ̆ng noh atŏk iung jang kiơ̆ roi năr roi’lơ̆ng hơ iă tơplih kơsô̆ tơ̆ rim tơring tơrang”.

Kiơ̆ đơ̆ng ƀok Nguyễn Tuấn Hà, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk, truh dang ei lơ̆m dêh char pơjing đei 2.000 khul jang kmăi kŏk kơsô̆ pơlei pơla tơ̆ rim thôn, pơlei, koeng kơphô̆ hăm 11.700 ‘nu bơngai. ‘Nou đei lăng jĭ “Dôm gơng tơroh kloh klĕch” đơ̆ng hơnih chĕp pơgơr tơplih kơsô̆ rim hơnih jang tơm dơnơm hơnhăk kmăi kmŏk kơsô̆, trong jang kơsô̆ truh hăm kon pơlei: “Khul jang kon pơlei pơla ou đei lơ bơngai jang lơ̆m ou khul jang gĭt kăl hloh ‘noh khul kơdră tơring, rim hơnih mơdro sa vang iung jang lơ̆m tơplih kơsô̆. Dak Lăk hơdrin jang dar deh, iung jang hơnơ̆ng, hơdrin yak truh hăm kon pơlei”.

Vă tŏk kơtang hloh dơ̆ng iŏk đei jơnei kơ rim khul jang kmăi kmŏk pơlei pơla, khei năr kơnh, dêh char Dak Lăk hơnơ̆ng atok kơtang rim tơdrong jang pơtho pơhrăm, pơtho tơbăt, atŏk kơtang tơdrong kĕ jang gơ̆h jang găh tơplih kơsô̆ ăn rim bơngai lơ̆m khul. Atŭm hăm ‘noh, iung jang hơdoi hăm rim hơnih bơ̆ jang ƀơm truh, mă kăl rim hơnih jang viễn thông tơ iung pơjing ư̆ng yŭng lơ̆m kmăi điên thoăi chĕp ti vă rơvơn ăn kon pơlei, hơnih kơdro sa iŏk yoa. Đơ̆ng noh, tơgop atŏk lơ măt bơngai kon pơlei iŏk yua kmăi kmŏk kơsô̆, hrôih pơm keh đang hơnih chih răk hơnăn kon pơlei kơsô̆.