Lăp đơ̆ng pơgê hrôih, kơ hrĕng ‘nu kon pơlei oei tơ̆ xăh sơlam Ia Rvê hlôi akŏm tơ̆ anih bơ̆ jang kơ xăh  vang akŏm tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei” hăm lơ tơdrong jang ‘lơ̆ng hơiă nhen “ năr akŏm ƀĕng chư̆ng”, “ pơgơ̆r khăm jĭ, asong đĕch pơgang, vei lăng jơhngơ̆m jăn ăn kon pơlei”, “kơdeng tơmam ưh kơ hoach jên” păng dôm tơdrong pơchơt kră sơ̆ kiơ̆ tơdrong joăt kơ tơring. Truh akŏm tơdrong jang păng đei khăm jĭ păng asong đĕch pơgang, ƀok Trần Kế Toán, oei tơ̆ thôn 11, xăh Ia Rvê chhôk hơiă tơbăt, tơdrong jang hlôi pơm ‘lơ̆ng dơ̆ng tơdrong 1 jơhngơ̆m đon lĭnh kon pơlei lơ̆m tơring sơlam. Hơdai hăm pơlung jơhngơ̆m đon vă kon pơlei chơt hơiă pơyan puih mak sơng têt, hơdrin hloh dơ̆ng lơ̆m hơtŏk tơiung mŭk drăm, tơpôl, pơjing tơring sơlam roi pran kơjăp dơ̆ng:

 “Pơgơ̆r tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei” âu ‘noh tôch kơ ‘lơ̆ng, tơƀôh tơdrong bơngơ̆t truh đơ̆ng Đảng, teh đak, rim kơdră păng ‘nâu kŭm tơƀôh tơdrong tơklep đơ̆ng lĭnh păng kon pơlei. Đĭ đăng rim kon pơlei chhôk hơiă ngăl, pơlung kon pơlei hơmet ‘lơ̆ng rim tơdrong mơmat tat, hơdrin hơtŏk tơiung mŭk drăm tơpôl, sut pơngot tơjur dơnuh hin.”

Đại tá Phạm Hữu Chiến, Bí thư anih jang Đảng, Chính uỷ Ƀô̆ đô̆i vei lăng tơring sơlam dêh char Dak Lak tơbăt, tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei” đei pơgơ̆r rim sơnăm vă vang tơgŭm dôm tơdrong mơmat tat, tơgŭm kon pơlei dôm hơdrĕch hơdrŭng tơ̆ tơring sơlam đei Têt hiôk tơnŏ. Sơnăm ‘nâu, tơdrong jang pơjao 3 tŏ hnam “pơbŭng hnam tơnŏ tơring sơlam”; nŭng 2.800 tŏ ƀĕng chư̆ng; asong 220 tơpu tơmam ăn dôm ŭnh hnam teh đak tơgŭm, ŭnh hnam đei tơdrong arih sa mơmat tat; hơdai hăm asong tơmam ăn 57 ‘nu mon hŏk tro tŏk bŏk đei Ƀô̆ đô̆i vei lăng tơring sơlam tơgŭm lơ̆m tơdrong jang “ tơgŭm oh truh tơ̆ hnam trưng” păng “ kon rong kơđông lĭnh tơring sơlam”; khăm hơmet jĭ, pơtho tơƀôh jơhngơ̆m pran, asong pơgang đĕch ăn kơ dang 300 ‘nu. Đại tá Phạm Hữu Chiến pơma hơdăh, tơdrong jang âu jing tơdrong vang tơgŭm hai, băt bơnê hai đơ̆ng ƀô̆ đô̆i vei lăng tơring sơlam hăm kon pơlei tơ̆ tơring sơlam:

“Tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei”oei jing tơdrong băt bơnê kon pơlei dôm hơdrĕch hơdrŭng tơring sơlam lơ̆m tơdrong jang, vei lăng tơdrong pơm tơm hơgăt teh, vei sơđơ̆ng tơring sơlam teh đak lơ̆m dôm sơnăm âu ki. Tơdrong jang đei pơgơ̆r tơ̆ xăh Ia Rvê năr ‘nâu ‘noh jĭ tơdrong jang pơih blŭng tơdrong jang đơ̆ng kang ƀô̆, khŭl linh ƀô̆ đô̆i tơring sơlam dêh char tơ̆ 4 xăh sơlam, vang tơgŭm yua kơ 1 pơyan puih mak phĭ tơnŏ, 1 Têt ngôi hơdai ăn kon pơlei dôm hơdrĕch hơdrŭng tơring sơlam.”

Chhôk hơiă ƀơ̆t vang truh akŏm Tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei” kŭm hăm kang ƀô̆, khŭl linh păng kon pơlei xăh Ia Rvê, ƀok Y Biêr Niê, Phŏ Bí thư Anih jang Đảng dêh char Dak Lak tơbăt, tơdrong jang tơpă jing năr akŏm đơ̆ng kon pơlei dôm hơdrĕch hơdrŭng lơ̆m tơring sơlam; pơm đei tơdrong jang joh ayŏ ‘lơ̆ng hơiă, ƀĕnh tơdrong ‘lơ̆ng joh ayŏ hơ drĕch hơdrŭng, hơnhăk tơdrong hiôk chơt ăn kon pơlei mưh pơyan puih mak truh. Ƀok Y Biêr Niê pơ ư kơ dôm kang ƀô̆, khŭl linh tơring sơlam dêh char hlôi ling lang kơ sơ̆t hơdăh đei hơnăp jang đơ̆ng khŭl linh iung tơblăh, khŭl linh bơ̆jang, khŭl linh pơm tơlĕch, tơ̆ yơ kăl ‘noh đei ƀô̆ đô̆i, tơdrong hơyơ mơmat đei ƀô̆ đô̆i. Ƀô̆ đô̆i vei lăng tơring sơlam dêh char ‘nao jang đang ‘lơ̆ng hơnăp jang vei lăng tơdrong pơm tơm hơgăt teh, sơđơ̆ng sơlam teh đak, jing khŭl linh iung jang vang sut pơngot, tơjur dơnuh hin, vei lăng jơhngơ̆m pran kon pơlei, hơtŏk tơiung mŭk drăm tơpôl tơ̆ tơring sơlam oei lơ mơ mat tat hai:

“Tơdrong kăp gĭt tơpă mă tơdrong jang “ Pơyan puih mak tơ̆ tơring sơlam pơm tơnŏ jơhngơ̆m kon pơlei” hơnhăk ăn ‘noh jĭ tơƀôh hơnăp jang, tơdrong ‘mêm, tơdrong băt bơnê đơ̆ng khŭl linh tơring sơlam hăm kon pơlei tŏk bŏk măng năr kŭm hăm ƀô̆ đô̆i tơring sơlam bơ̆ jang, pơm tơdrong tơm kăl tơring sơlam, sơkơ̆t hơdăh tơdrong 1 ƀơ̆r đon linh kon pơlei tơklep hơdai, hơtŏk dơ̆ng jơhngơ̆m pran, tơdrong lui, đon hơdrin vang hơdai băl vei lăng kơjăp tơdrong pơm tơm tơring sơlam gĭt kăl kơ Teh đak.”