Dôm năr hơtuch sơnăm, kon pơlei plei Chiềng păng plei Đừng Nhạp, xăh sơlam Ia Lốp, apŭng Ea Súp, dêh char Dak Lak tôch chhôk hơiă ƀơ̆t mưh truh 6jơ kơsơ̆, ŭnh điên trong ‘nao đei ƀô̆ đô̆i vei lăng tơring sơlam chô̆ pơm hơdăh brach lơ̆m pơlei. Ƀok Lang Văn Tuyển, Bí thư chi bộ plei Chiềng tơbăt, ŭnh điên tơ̆ trong pơm ăn trong ƀrach ƀrônh pă đei gueo măng klăm, bơngai bu brŏk đơ̆ng jang mơ̆t ngôi kơtă lơ̆m hnam nhen hơdrol sơ̆ bơih. Tơ plih lơ̆m noh, đei trong ŭnh điên hơdăh, tơ̆ gơmăng kon pơlei lĕch tơ̆ trong, pơma dơnuh, hơhiĕk chơt hơ iă hloi tơpă, tơdrong ‘mêm rông ƀôt sa roi kơjăp, tơdrong năm vih vơ̆t kŭm sơđơ̆ng ƀiơ̆:

“Đei hơdăh ƀrach tơ̆ dôm trong glung ‘noh tơjur đei tơdrong gre tơ̆m prăh băl, trong ‘nâu khei ‘năr pơm đĭ đunh bơih, kơna dang ei đĭ hư tôch kơ lơ, dang ei đei ŭnh điên tơ̆k hơdăh âu ‘noh năm vih vơ̆t kŭm hiôk ƀiơ̆. Mă 2 ‘noh jĭ tơdrong sơđơ̆ng đei vei lăng ‘lơ̆ng hloh. Ŭnh điên âu tôch kơ ‘lơ̆ng păng kon pơlei tôch kơ răp gô.”

Thiếu tá Vũ Văn Dương, Chính trị viên phŏ Kơđông lĭnh vei lăng sơlam Ea Hleo tơbăt, tơdrong jang “ Tơ̆k hơdăh tơring sơlam - tơ̆ plei Chiềng păng plei Đừng Nhạp ‘noh jĭ tơdrong jang mă 4 yua đơ̆ng Kơđông lĭnh vei lăng tơring sơlam Ea H’Leo pơgơ̆r tơlĕch jang lơ̆m xăh Ia Lốp. Mĭnh tơdrong jang ‘noh đei jrăng pơsey păng dôm kơ ƀŏng ŭnh đeng tơ̆k hơdăh 200W, yua ŭnh hơyuh măt ‘năr, đei pơm pơih hơdăh kiơ̆ khei ‘năr hơgăt. Dang ei anih jang tŏk bŏk krao hơvơn dôm anih jang mơdro sa, bơngai đei jơhngơ̆m đon ‘lơ̆ng chă tơgŭm đe vă vang tơlĕch jang dơ̆ng dôm tơdrong jang tơ̆k hơdăh tơring sơlam, tơgop pơtrŭt hơtŏk tơiung mŭk drăm tơpôl, vei sơđơ̆ng tơ̆ tơring:

“Tơ̆ hơnăp kơnh, anih jang hơnơ̆ng bơ̆jang kiơ̆ tơdrong athei đơ̆ng kơdră Đảng, anih tơm pơgơ̆r linh vei lăng tơring sơlam dêh char kŭm gô jang hơdai hăm dôm anih jang, khŭl grŭp tơpôl, tơring vă krao hơvơn dôm khŭl jang, bơngai đei jơhngơ̆m đon ‘mêm mơnat hơnhăk ba pơm roi lơ roi ‘lơ̆ng dôm tơdrong jang tơ̆k hơdăh tơring sơlam. Yua kơ trong nơnăm tơ̆ tơring roi ‘năr roi kơ nê̆, vă vei sơđơ̆ng ‘lơ̆ng, tơgop vei sơđơ̆ng lơ̆m tơring ‘noh nhôn gô jang hơdai vă pơjing tơdrong jang tơ̆k hơdăh tơring sơlam.”

Vang yak hơdai hăm ƀô̆ đô̆i vei lăng tơring sơlam Dak Lak lơ̆m tơlĕch jang dôm tơdrong jang tơ̆k hơdăh tơring sơlam khei ‘năr âu ki đei lơ khŭl jang, bơngai păng dôm grŭp chă năm tơgŭm đe. Mŏ Bùi Thị Nữ tang măt kơ grŭp chă năm tơgŭm đe NDG, đơ̆ng pơlei tơm Hồ Chí Minh năm trŭh tơ̆ xăh sơlam Ia Lốp tơbăt, ƀôh đei tơdrong gleh hrat đơ̆ng kon pơlei păng tơdrong mơmat tat đơ̆ng kang ƀô̆, khŭl linh, grŭp hlôi păng tŏk bŏk hơdrin krao hơvơn vă tơgŭm dơ̆ng lơ tơdrong jang ‘lơ̆ng hơiă:

“Ĭnh ƀôh Ƀô̆ đô̆i vei lăng tơring sơlam ‘noh tôch kơ hơ iă păng ling lang yak hơdai hăm kon pơlei. Kon pơlei tơring sơlam ‘noh tôch kơ mơmat tat, đe arih tơ̆ tơring mơmat tat ưh kơ đei pŭn ai nhen nhôn tơ̆ pơlei tơm kơ na nhôn rơih tơring sơlam vă tơgŭm ăn kon pơlei dă ƀiơ̆ kơ mơ mat tat ƀiơ̆. Păng grŭp rơih Ƀô̆ đô̆i vei lăng tơring sơlam yua kơ đe sư tôch kơ tơnăp tơgŭm kon pơlei. ‘Ngoăih kơ tơdrong jang tơ̆k hơdăh ƀrach gô đei lơ tơdrong jang nai ‘noh grŭp nhôn gô hơmet jơ ‘năr vă hơ len lăng dơ̆ng.”

Hloh 3 sơnăm tơlĕch jang tơdrong jang “ Tơ̆k hơdăh tơring sơlam” truh dang ei, Ƀô̆ đô̆i vei lăng tơring sơlam dêh char Dak Lak hlôi jang kiơ̆ đei hloh 10 tơdrong jang tơ̆k hơdăh trong ăn dôm pơlei pơla tơ̆ 4 xăh sơlam kơ 2 apŭng Ea Súp păng Buôn Đôn, hăm kơsô̆ jên kơ hrĕng triệu hlak jên. Đại tá Đỗ Quang Thấm, Phŏ Chính uỷ Ƀô̆ đô̆i vei lăng tơring sơlam dêh char Dak Lak tơbăt, tơdrong jang tŏk bŏk đei păr ang pran kơ tang, kŭm hăm tơdrong jang đơ̆ng dôm khŭl linh ‘noh lơ anih jang, dôm bơngai kŭm hlôi păng tŏk bŏk tơgop hơnhăk dôm tơdrong jang tơ̆k hơdăh trong hăm dôm pơlei pơla. Dôm tơdrong jang ‘noh tŏk bŏk tơgop pơm tơplih um ai tơring tơrang, pơjing tơring tơrang ‘nao tơ̆ tơring sơlam. Kiơ̆ đơ̆ng tơgŭm tơdrong jang vei lăng tơdrong pơm tơm hơgăt teh, sơđơ̆ng sơlam teh đak đei ‘lơ̆ng hloh:

“Jang kiơ̆ tơdrong jang pơjing tơring tơrang ‘nao, ‘noh nhôn jang hơdai hăm tơring tơlĕch jang tơdrong jang tơ̆k hơdăh tơring sơlam. Dang ei nhôn kŭm hlôi tơlĕch 1,2 tơdrong jang tơ̆ dôm xăh sơlam, tơgop jang kiơ̆ ‘lơ̆ng dôm tơdrong hơgăt pơjing tơring tơrang ‘nao. Kiơ̆ đơ̆ng noh, jang ‘lơ̆ng tơdrong jang krao hơvơn, tơroi tơbăt ăn kon pơlei pơm kiơ̆ ‘lơ̆ng trong tơlĕch jang, tơdrong tơgŭm đơ̆ng Đảng, khôi luơ̆t đơ̆ng teh đak, mă loi ‘noh jĭ hơtŏk hơnăp jang đơ̆ng kon pơlei hăm tơdrong jang pơjing, vei lăng tơdrong pơm tơm, sơđơ̆ng tơring sơlam teh đak.”

Dôm tơdrong jang tơ̆k hơdăh tơring sơlam đơ̆ng ƀô̆ đô̆i vei lăng tơring sơlam tŏk bŏk hơnhăk truh tơdrong hiôk chơ̆t ăn kon pơlei tơ̆ tơring sơlam dêh char Dak Lak. Ưh khan lăp tơgŭm ăn um ai tơring tơrang sơlam tơplih ‘lơ̆ng, dôm tơdrong jang ‘noh oei tơgŭm tơdrong tơgoăt 1 ƀơ̆r đon đơ̆ng linh kon pơlei roi ‘năr roi ‘lơ̆ng hơiă, tơdrong vei lăng tơring sơlam roi đei yua hloh dơ̆ng.