- ‘Nhŏng Phen Niê ăi, ih tơroi lăng dôm tơdrong mă ih hlôi ƀôh hơdăh lơ̆m dôm tơdrong bơ̆ jang lơ̆m khul păng găh tơdrong choh jang sa?

Đảng viên Y Phen: Jĭ bơngai chĕp kơ̆l Khul kjon pơlei choh jang sa tơring Dray Săp, păng jĭ bơngai đang viên, kơdih ba hơdrin jang keh đang dôm tơdrong jang đei pơjao, hơnơ̆ng pơm jŭk yŭk trong hơlau lơ̆m rim tơdrong jang ‘mơ̆i vă kon pơlei lơ̆m khul jang kiơ̆. Ăp ba jang sa iŏk đei kơjăp ‘noh kon pơlei mă lui, mă vang jang kiơ̆. Ba jei pơtho ăn kon pơlei choh jang sa vă tơdrong hơrih sa sơđơ̆ng. Lơ̆m ŭnh hnam jei hơdrin mă kăl ‘noh kon hơkăn, đơ̆ng rŏng ‘noh kơtum kơtŏng ‘nhŏng oh hơrih sa ‘lơ̆ng hơ iă, pơm kiơ̆ kơjăp khôi luơ̆t teh đak, pơnam jang sa, yŭk trong hơlau vă kon pơlei kiơ̆ yok rok jơ̆ng jang kiơ̆. Jĭ bơngai đảng viên Đảng Cộng sản Việt Nam ba hơnơ̆ng pơm jŭk yŭk trong hơlau lơ̆m rim tơdrong jang, pơtho tơbăt dôm trong bơ̆ jang đơ̆ng Đảng, Khôi luơ̆t Teh đak vă kon pơlei băt, vă kon pơlei pơm kiơ̆. Đơ̆ng noh, kon pơlei tơgoăt tơgoăl dih băl hloh dơ̆ng lơ̆m rim tơdrong jang lơ̆m tơring.

- Ŏ ah, hrei au ih ‘noh mĭnh lơ̆m tŏ sĕt bơngai kơ khul kon pơlei choh jang sa tơring Dray Săp jang sa iŏk đei hlŏh pơđăm hrĕng triu hlak jên đơ̆ng rong kon tơrong păng choh jang sa. Vă iŏk đei lơ lau ‘noh, ih hlôi tơlĕch jang lơ liơ, hŏ ‘nhŏng?

Đảng viên Y Phen Niê: Ŭnh  hnam nhôn đei hloh 5ha teh choh jang sa. Ŭnh hnam bơ̆n jang ƀa đak, jang tiu, ksu, chehphe ... Lơ̆m minh sơnăm ŭnh hnam jang sa iŏk đei hloh 500 triu hlak jên, tơklăh pơđĭ kon jên tơmơ̆t jang oei iŏk đei hloh 300 triu hlak jên ... ‘Ngoăih kơ ‘noh, ŭnh hnam jei pơm 2 hơnih rong nhŭng đei să truh 200 met vuông, rong đơ̆ng 5-6 tŏ nhŭng yŏng, mưh hăp su ‘noh ba rong kon, truh tĭh ‘noh mă tĕch ăn kơ đe. Dang ei đei dang 50-60 tŏ nhŭng, mĭnh hlông rong tĕch ăn kơ đe dang 4 tân nhŭng.

- ‘Ngoăih choh jang sa mơdro sa hơgei, ih oei pơm jŭk yŭk trong hơlau lơ̆m tơdrong tơgop tôm kon jên tơ iung pơjing tơring tơrang ‘nao tơ̆ tơring. Ih tơroi lăng găh tơdrong ‘nau?

Đảng viên Y Phen Niê: Lơ̆m tơdrong jang tơ iung pơjing tơring tơrang ‘nao ba jei yŭk hơlau chă pơrô̆ hơvơn kon pơlei atŏk tơ iung mŭk drăm, vei lăng năng năng tông sơđơ̆ng pơlei pơla, tơ iung pơjing hơrih sa phĭ tơtŏ dơnŏ ‘lơ̆ng dơ̆ng kơjăp. Hăm hơnăp jang jĭ 1 ‘nu bơngai đang viên, ba jei hơdrin chă pơrô̆ pơrôp, pơtho tơbăt ăn kon pơlei găh tơdrong, Teh đak hăm kon pơlei vang iung jang, tơ iung pơjing tơring tơrang ‘nao ‘lơ̆ng hơ iă. Ba jei hơnơ̆ng chă pơtho khan ăn kon pơlei tơgoăt tơgoăl pôm nơ̆r ƀơ̆r đon, mĭnh jơhngơ̆m đon tơ iung pơjing pơlei pơla atŏk tơ iung păng phĭ tơtŏ dơnŏ ‘lơ̆ng dơ̆ng kơjăp.

- Jĭ Kơdră chĕp pơgơ̆r Khul kon pơlei choh jang sa tơring Dray Săp, dôm sơnăm au ki, tơdrong tơgŭm djru kon pơlei găh kih thuơ̆t, kon jên jang sa, kon yŏng, hơdrĕch ‘long pơtăm ... vă kon pơlei atŏk tơ iung mŭk drăm, xut xa pơngot rơvĕt tơjur dơnuh lei tơlĕch jang lơ liơ hŏ ‘nhŏng?

Đảng viên Y Phen: Hăm kơchư̆k Kơdră chĕp pơgơ̆r Khul kon pơlei choh jang sa, ba hơnơ̆ng chă pơma dơnuh, jang hơdoi hăm rim kŏng ty, hơnih mơdro sa, rim kih sư vei lăng choh jang sa vă pơtho tơbăt kih thuơ̆t ăn kon pơlei lơ̆m choh jang sa, pơtăm vei lăng tiu, chehphe, ksu, rim ‘long sa plei, rong kon rơmo, nhŭng, iĕr, pơbe ... vă kon pơlei băt hlôh ƀôh nhên, jang kiơ̆ khoa hŏk kih thuơ̆t gơ̆h hơgei hrei au lơ̆m choh jang sa, đơ̆ng noh hơnhăk đei iŏk yua kơ jăp ăn kon pơlei. Ba jei hơnơ̆ng iung jang hơdoi hăm rim hơnih mong jên vă vang tơgŭm ăn kon pơlei ŭnh hnam tơnap tap gơ̆h tŏk iŏk kon jên, đei kon jên tơmơ̆t jang sa, atŭm dih băl atŏk tơ iung, pơjing rơvơn jang sa đei iŏk yua kơ jăp ăn rim ŭnh hnam.

- Lei ah, bơnê kơ ih ‘nhŏng hơ!