Jĭ tơring hơlam kơ 2 xăh Đắk Nuê păng Đắk Liêng kơna trong gre 27, jăl kơdâu klĕch plei Tơ, xăh Đắk Liêng, apŭng Lắk, dêh char Đắk Lắk adrol sơ̆ jĭ 1 anih hơnơ̆ng đei bơngai chă hŭt râm rĕk kư kă, mong pôi râm rĕk jung vă truh 100m. Vă găn lê̆ tơdrong ‘nâu, khul druh dăm 2 xăh Đắk Liêng păng Đắk Nuê hơnơ̆ng chă mong akŏm păh sŏh hơmet râm rek, hơdai hăm ‘nŏh chô̆ camera hơlen năng vă chă ƀôh păng sek tơlang dôm bơngai pơm glăi.

Kiơ̆ mŏ Sao Mai Len, Bí thư Đoàn xăh Đắk Liêng, tơdrong pơchĕh “chô̆ camera vei sơđơ̆ng vă sut lê̆ anih đe hŭt râm rĕk kư̆ kă âu” đei bơ̆ jang đơ̆ng khei 7/2023, ƀôh đei yoa tơpă: "Adrol ki nhôn hơtâp kơƀang chih “ưh gơ̆h hŭt râm rek” bơih ră mă lei ưh đei xa kiơ. Đơ̆ng rŏng kơ nhôn chô̆ camera ‘nŏh ƀôh 2 ‘nu bơngai pơm glăi, mă 1 nhôn athei sư hyum hŭt tơ̆ nai dơ̆ng. Oei 1 ‘nŏh Anih vei lăng kon pơlei xăh phak sư 1 triu hlak jên. Pơma atŭm đơ̆ng rŏng kơ nhôn chô̆ camera ƀât dâu ‘nŏh lơ bơngai pă đei chă hŭt râm rĕk kư̆ kă bơih. Đon hlôh vao đơ̆ng kon pơlei roi tŏk, pă đei bu pơm glăi dơ̆ng bơih."

Mŏ Phan Thị Hoa, tơ̆ plei Tơ, xăh Đắk Liêng, arih xa jê̆ kiơ̆ noh, kŭm tơroi truh đon tơplih ‘lơ̆ng thoi âu: “Đơ̆ng năr chô̆ camera ‘nŏh ƀôh ‘you rơgŏh tơpă, dang ei nhen pă đei bu chă hŭt râm rĕk ƀât dŏh bơih. Pơm thoi yơ vă cham char, trong rơgŏh ‘lơ̆ng ‘nŏh inh ‘mĕh kang ngăl, kơlih yoa tơdrong ‘nŏh sư tôch đei yoa ăn tơpôl.”

Găn găn đĭ tơdrong hŭt râm rĕk tơ̆ tơring sơlam, đoàn viên, druh dăm 2 xăh Đak Liêng păng Đăk Nuê oei pơgơ̆r pơtăm ‘ngiĕt ƀum ngô tơter trong. Truh dang ei, tơring âu pơtơm đei pơkao lĕch tôch ‘lơ̆ng, năng tôch hơiă.

Kiơ̆ ‘nhŏng Phạm Ngọc Thắng, Bí thư Đoàn apŭng Lắk, chô̆ camera păng pơtăm pơkao vă sut hŭt anih đe hŭt râm rĕk ‘nŏh jĭ trong jang ‘nao, tôch lăp hăm tơring. Kiơ̆ đơ̆ng noh vang tơgop pơm hơtŏk hơnăp jang đơ̆ng druh dăm lơ̆m tơpôl găh tơdrong vei lăng cham char, găh nŏh dơ̆ng dôm tơdrong jang vang vei lăng cham char, năr 6 jang tơgŭm dăh mă năr 7 rơgŏh ‘lơ̆ng oei đei pơgơ̆r hơnơ̆ng đơ̆ng sơ̆ truh dang ei. Tơdrong chô̆ camera păng tơlĕch lơ trong phak jên ưh kơsĭ vă thu mong jên phak ôh, mă kiơ̆ đơ̆ng tơdrong phak âu vă pơtho đon ăn lơ bơngai, tơgŭm ăn kon pơlei đei đon mong akŏm râm rĕk ‘lơ̆ng ƀiơ̆.

“Kiơ̆ trong jang thoi âu ‘nŏh tôch hơiă păng tôch lăp, đoàn viên druh dăm gơ̆h iŏk đei tơgŭm lơ̆m tơdrong vei lăng cham char. Tơ̆ hơnăp kơnh, Khul kơdră chĕp kơ̆l Anih jang đoan apŭng vă tơlĕch jang jơ̆p 11 xăh, thĭ trơ̆n, 1 xă jang 1 anih. Đơ̆ng rŏng kơ ‘nŏh xăh jang hơdoi hăm Khul vei lăng pơlei pơla vă pơih xă trong jang ‘nâu. Chô̆ camera âu blŭng a hlôi pơm hơtŏk đei đon hlôh vao đơ̆ng kon pơlei, hơdai hăm ‘nŏh gô tơlĕch hloi tơdrong phak jên, đơ̆ng noh kon pơlei roi hlôh vao ƀiơ̆. Kŭm hơpơi ‘mĕh pơlung đei bôl boăl đoàn viên, druh dăm pơjing dôm HTX mong akŏm râm rĕk, tơdăh iŏk đei tơdrong drơ̆ng nơ̆r vang tơgop đơ̆ng kon pơlei lei tôch ‘lơ̆ng.”

Kŭm kiơ̆ ‘nhŏng Phạm Ngọc Thắng, tơdrong chô̆ camera păng pơtăm pơkao vă găn đe hŭt râm rĕk kư̆ kă, mă đơ̆ng đĭ đei yoa ‘lơ̆ng bơih ră, mă lei ưh kĕ găn đĭ tơdrong ‘nâu đơ̆ng tơm hloi ‘mơ̆i. Ưh đei hŭt râm rĕk ƀât dâu, ‘nŏh kon pơlei chă trong hŭt râm rĕk tơ̆ nai dơ̆ng, kơlih yoa hrei ‘nâu lơ pơlei, xăh lơ̆m apŭng tam mă đei anih tuh, sŏh râm rĕk păng tam mă đei khul jang dônh akŏm râm rĕk ‘năi. Lăp gô truh lai yơ tơdrong mong akŏm, chơ tuh, sŏh hŭt râm rĕk đei sek tơlang ‘lơ̆ng đĕch dôm camera, pơgar pơkao, ‘ngiĕt pơtăm pơrŏ tơter trong gơ̆h đei yoa đunh đai.