3 sơnăm vih tơ̆ âu, gơnơm tơplih ming 1 păh pơgar chĕh phe kră, chă pơtăm dơ̆ng ‘long mur rong sơdrông pơm brai, mŭk drăm hnam ƀok K’Bát, tơ̆ plei Păng Dung, xăh Đạ K’Nàng, apŭng Đam Rông tŏk roi ‘lơ̆ng. Ƀok K’Bát tơroi, adrol sơ̆ lăp jang hơdrô̆ chĕh phe kơna 1 sơnăm lăp phĕ 1 vât, đơ̆ng năr pơtăm ‘long mur rong sơdrông pơm brai khei yơ kŭm đei jên ngăl. Ưh hơdrô̆ unh hnam ƀok, mă lơ kon pơlei tơ̆ âu vang tơplih ming ‘long pơtăm kiơ̆ trong jang đơ̆ng khul kơdră tơring tơlĕch ngăl, đơ̆ng nŏh tơdrong arih xa kơ kon pơlei roi tŏk ƀiơ̆ pơtêng hăm adrol sơ̆.

“Adrol sơ̆ ƀât tam mă jang kiơ̆ KHKT ‘nŏh chĕh phe ưh kơ đei plei lơ, tơdrong arih xa kơ kon pơlei tôch pơmat tat. Đơ̆ng năr jang kĭ ki thuơ̆t, tơplih ming ‘long pơtăm, iŏk 1 păh tĕh chĕh phe vă pơtăm dơ̆ng ‘long mur rong sơdrông pơm brai păng 1,2 kơ loăi ‘long xa plei nai tơdrong jang xa đơ̆ng kon pơlei roi tŏk ƀiơ̆. Hrei ‘nâu mŭk drăm lơ̆m hnam nhôn pơma adrô̆, kon pơlei tơ̆ tơring pơma atŭm tŏk ƀiơ̆ kơ adrol sơ̆ 'lơ 'lŏ bơih”.

Nhen thoi nŏh mơ̆n, ƀok Lơ Mu Ha Bình, tơ̆ plei Đạ Mun, xăh Đạ K’Nàng tưk mŭk drăm hnam tơnŏ tŏk ‘lơ̆ng hlŏh dơ̆ng đơ̆ng rŏng kơ tơplih 2ha chĕh phe jing pơtăm 'long mắc ca. Ƀok Bình tơroi, blŭng a pơngơ̆t dêh, mă lei gơnơm đei kăn ƀô̆ pơtho tơƀôh ăn trong pơtăm, vei rong kơna pơgar 'long hơnơ̆ng bluh jing 'lơ̆ng. Lơ̆m pơyan âu ki, pơgar mắc ca phĕ đei 2 tân plei, unh hnam iŏk đei vă jê̆ 200 triu hlak jên đơ̆ng rŏng kơ trư tôm jên jang.

Ƀok Lơ Mu Ha Bình pơma: “Pơtăm ‘long mắc ca đei yoa lơ păng sơđơ̆ng tơpă, pơtăm ƀônh, ưh đei gleh hrat păng jên jang ưh kơ đei lơ nhen pơtăm cheh phe. Đơ̆ng năr pơtăm kơ loăi ‘long ‘nâu, mŭk drăm hnam nhôn roi tŏk ƀiơ̆. Bơnê kơ Đảng, tĕh đak tơƀôh trong, tơgŭm ăn kon pơlei tơplih ming ‘long pơtăm, hơnhăk ba tơdrong đei yoa lơ ăn unh hnam”.

Hrei ‘nâu ‘ngoăih kơ 3.200 ha cheh phe, Đạ K’Nàng hlôi pơtăm hơlam đei 885ha ‘long mắc ca, kơhrĕng ha ‘long xa plei păng ‘long mur rong sơdrông pơm brai, 60ha ‘nhot, pơkao lơ kơloăi kiơ̆ trong choh jang hăm kơmăy kơmŏk ‘nao. ‘Ngoăih kơ ‘nŏh, oei đei 1,2 hơgăt tĕh pơtăm pơlong năng ‘long pơgang dơ̆ng, blŭng a kŭm ƀôh tôch kơlăp. Kăl pơma ‘nŏh, prit laba đơ̆ng Đạ K’Nàng đei chih tơbăt jĭ tơmam OCOP păng đei tĕch ăn lơ tĕh đak lơ̆m tơring bơih. Mŭk drăm roi tŏk, iŏk yoa roi lơ, jô̆ păh lăp kiơ̆ kơ̆l bơngai tŏk truh 45 triu hlak jên 1 ‘nu 1 sơnăm; kơsô̆ unh hnam tơnuh tơ̆ Đạ K’Nàng jur tôch hrĕnh, đơ̆ng 17% jur pă 5% kiơ̆ tơdrong hơgăt ‘nao.

Kră pơlei Kon Sơ Ha Wớp, tơ̆ plei Đạ K’Nàng, xăh Đạ K’Nàng tơroi, mŭk drăm roi tŏk, đon hlôh vao đơ̆ng kon pơlei kŭm roi tŏk. Bu bu kŭm adrin choh jang xa, ưh pă đei đon gơnang yoa, xa hơpăh đơ̆ng tĕh đak tơgŭm ăn bơih. Đơ̆ng nŏh, tơdrong pơvei, oei xa hơdai mât 1 ƀơ̆r đon roi ‘lơ̆ng, tơdrong sơđơ̆ng chinh trĭ, sơđơ̆ng lơ̆m tơpôl đei vei kơjăp. Kon pơlei đei đon vang bơ̆ jang pơjing pơlei pơla pơdrŏng, ‘lơ̆ng rŏ.

“Adrol sơ̆ tam mă đei trong, hnam trưng, hnam pơgang hrei ‘nâu đei tôm bơih, đei ƀôh ƀiơ̆ sơ̆ ‘lơ ‘lŏ. Lơ̆m xăh nhôn adrol sơ̆ pơtăm chĕh phe, ưh đei pơtăm hơlam ‘long kiơ dang ei đe tơplih ming, pơtăm bơ̆n ‘long mur rong sơdrông pơm brai. Pơtih gia rim hnam rong 1 kơhôp sơdrông pơm brai ‘nŏh kŭm iŏk đei 12 triu 1 khei, pha ƀiơ̆ pơtêng hăm jang chĕh phe. Pơma atŭm adrol sơ̆ kon pơlei tơ̆ âu ưh kơ hlôh trong jang xa, 2,3 sơnăm tơjê̆ âu pha bơih, đei đon adrin jang xa bơih. Ưh pă đei gô chang đe tơgŭm ăn, dôm tơdrong juăt ưh ‘lơ̆ng đei hŭt lê̆ păng jang kiơ̆ lơ tơdrong tơplih ‘nao”.

 Xăh Đạ K’Nàng đei vă jê̆ 2.000 unh hnam, lơ̆m nŏh kon pơlei kon kông hlŏh 45%. Kiơ̆ ƀok Nguyễn Bá Nhân, Kơdră vei lăng kon pơlei xăh Đạ K’Nàng, gơnơm đei trong jang trŏ ƀlep đơ̆ng Anih chĕp kơ̆l đảng păng khul kơdră tơring lơ̆m tơdrong tơplih ming ‘long pơtăm kiơ̆ trong pơm hơtŏk kơjă tơmam, Đạ K’Nàng hlôi pơjing đei lơ tơring pơtăm ‘long lăp ‘lơ̆ng. Gơnơm thoi nŏh, ƀât mă jơ̆p lơ̆m tĕh đak oei tơjră hăm tơdrong pơmat tat yoa đơ̆ng jĭ Covid-19, Đạ K’Nàng oei jang kĕh tơdrong pơjing tơring tơrang ‘nao lơ̆m sơnăm 2021. 

Ƀok Nguyễn Bá Nhân, pơma: “Đạ K’Nàng 5,6 sơnăm adrol sơ̆ lăp jang hơdrô̆ chĕh phe đĕch, xăh pơgơ̆r bơ̆ jang tơplih ming ‘long pơtăm, hơnhăk đei iŏk yoa lơ tơpă. Jên jang xa đei jô̆ păh lăp kiơ̆ kơ̆l bơngai tŏk lơ; unh hnam tơnuh đơ̆ng 17% dang ei pă 5,03% kiơ̆ tơdrong hơgăt lơpang. Kon pơlei kon kông đei lơ unh hnam jang tŏk jing đei ƀôh, ƀât lăp lơ unh hnam jing pơdrŏng. Hrei ‘nâu xăh nhôn hơnơ̆ng adrin pơjing tơring tơrang ‘nao đei ƀôh dơ̆ng, hơnhăk xăh Đạ K’Nàng roi đunh jang tŏk roi pran”.

Hơdai hăm tơdrong tơplih ming ‘long pơtăm, pơjing dôm tơring pơtăm ‘long hăm rim kơloăi ‘long lăp ‘lơ̆ng, Đạ K’Nàng oei hơtŏk tơdrong jang hơdoi păng pơm hla ar pơkăp răt iŏk pơđĭ tơmam đơ̆ng tơring jang đei. Hăm trong jang ‘nâu, ưh jor Đạ K’Nàng gô jang kĕh tơdrong pơjing tơring tơrang ‘nao đei ƀôh lơ̆m sơnăm 2024 nhen thoi đon pơhnŏng đei tơlĕch.